Malika 5

1Pwu vakalovoka ińanza vakatsisika umwambo gulya nkilunga kya va-Galaseni. 2Avwene vwu ihuma mwiboti pwu akaganila numunu va mepo imbivi, uvi ahumaga mbuguli. 3Vi avetsaga mumbuguli sikutsoni. Avalemile voni avanu vwu vita tunkunge nimińololo agilemile. 4Mańa sikutsoni vatetsaga tunkunge nansyuma sya mmalunde nammińololo, umwene pwu agidumulanyage imińololo gya vene, isyene isyuma ańukage piganga. Pwu nakuli ujyunge uva kunkunga. 5Sikutsoni vuvule napamuńi napakilo pwu akava mbuguli nansidugala akakuta akihoma namaganga. 6Lino vwu ambwene UJesu kuvutale pwu akańilila akabiluka kumwene akakuta sitso akata: 7Tuli vuki nune nuve vi Jesu vi nswambe va Nguluve unduti! Mańa nakwa Nguluve nditekelesa kwave ndita ulaṅinilaga. 8Ulwakuva avwene UJesu ita: Vimepo vi mbivi huma mmunu uju. 9Pwu UJesu akambutsa akata: Veve veni ilitavwa? Umwene akanda akata: Nene Kipuga ilitavwa lyane, mańa tuli vongosi. 10Akatekelesa sitso kwa Jesu akata: Ulatuvingaga nkilunga iki. 11Pwugwale baho nundimo gwa ngube gukalya ilińasi pakidugala. 12Pwu imepo imbivi tsikatekelesa kumwene tsikata: Utupetsage ingube tsilya mwu twingilage. 13Umwene UJesu akidika. Pwu imepo imbivi tsikahuma tsikatsikwingila mungube. Pwu ingube undimo gwoni vuvule tsikabiluka palugima tsikitaga muńanza tsoni umwu tsavelye vaelupu vavili (2000) tsikamilwa muńanza. 14Avene avalume avadimaga ingube vakańila vakatsitsova mbutsenge mwoni namunduvanza tsitsitsi. Pwu avenevutsenge vakabiha kwilola itsu apelile. 15Vakatsisika upwu ale UJesu, vakavona umunu uvi ale nimepo imbivi atamile vunnonu aswalile nimisabwa anotsivwe vuvule-nditsova uvi ale ni-Sipuga. Pwu vakadwada. 16Avene avambwene vwu vakavavula itsa va mepo imbivi ukumponya umwene nitsa ngube vakata: Vwu agahile vuvule-vule atye atye. 17Pwu avene vakantekelesa vakata: Ungahuma nkilunga kitu umu. 18Avwene vwu ikipaka mwiboti, pwu uvamepo imbivi ulya akantekelesa akata: Ndibihage nuve nkuludeva. 19Umwene UJesu akabela akata: Bako, bihaga, kuvutsenge vwako nakuvalu kololwo ukavavulage ukatetsage: Vwu agahile unkuludeva atye andililage ikisa. 20Pwu umwene akabiha nkilunga kya mu-Ndekapoli akatsikutsisimilitsa tsoni itsu ampelye UJesu akata atye atye. Pwu voni avanu vakadega.

21UJesu vwu alovwike mwiboti vwu atsisike umwambo ugu, pwu vakalundamana upwu ale avanu va vongosu vwu ali pańanza umwene. 22Pwu ujyunge umbaha va vene uva nńumba jya kwisajilamwo, uvi ale vi Jaili ilitavwa akahegelela kumwene. Vwu ambwene pwu akambilukila mmalunde 23akatekelesa sitso akata: Akalivango kali pakutsilika lino. Ukwi tubihage kwane ukambike ikivoko, atsukage ave mwumi. 24Umwene akabiha nave. Vakankonga navanu ikipuga ki kyongosu, vakakulugana nave. 25Pwu ale baho namwene undala ujyunge uvi ale nilimali imyaka kitsigo nagivili. 26Undala uju akuvilwe kuvatuṅanya vongosu agatye. Mwu amalile ikyuma kya mwene kyoni mbatuṅanya kitapona napadebe umwene, bako uvutamu vukongeletsa ukuvala. 27Vwu apulike itsa Jesu, pwu akagendela nkipuga kya vanu akahegelela kumbele akamwabasa ikilundwa kya mwene. 28Ulwakuva mwitumbu akata: Ndingave ndikumwabasaga imisabwa gya mwene vuvule pwu ndiponaga. 29Pwu likuma baho vuvule ilimali lya mwene. Akivona mumana ukuta aponile uvutamu vwa mwene. 30Pwu umwene UJesu akivonela baho amaka ga mwene ukuta gahumile agange mumana gwa mwene gabye kumunu. Pwu akavakilivukila avanu akavavutsa akata: Veni ańabasitse unsabwa apa? 31Pwu avakongi va mwene vakata: Navwilola avanu ukukulugana vwita veni ańabasitse? 32Umwene akalolesa akandonda uvi amwabasitse. 33Umwene undala uludwado lukambona akadetema ulwakuva ivwene ukupona. Pwu akatsibiluka kumwene akambula tsoni. 34Umwene UJesu akambula akata: Vi mwana vango lukuponitse lwu lwidiko lwako. Bihaga nulunotsehetso nuvutamu vwako vulavujaga vulakuvonaga. 35Vwu ali pakutsova ili pwu vakasika avange avahumile pambaha va vene va nńumba jya kwisajilamwo, vakambula vakata: Umwalivo aswe. Ulamwumilitsaga unkuludeva. 36Umwene UJesu akapulika vwu vikumbula, pwu akatsova nave umbaha va vene va nńumba jya kwisajilamwo akata: Uladwadaga vwidikage vuvule. 37Akavakilivula voni avita tunkonge twingile nave nńumba. Akatola vene ava-Petele nu-Jakobu nu-Johani ununave va Jakobu. Vwu akingila navo. 38Pwu vakingila nńumba jya mbaha va vene va nńumba jya kwisajilamwo. Mwu UJesu akavona ukuswanganya kwa kwene avalilaga ikililo, avakutaga sitso. 39Akingila akata: Ukuswanganya uku kwiki? Ikililo iki kiki? Mańa umwana naswili, bako agonile itulu. Avene pwu vakameka. 40Umwene akavaswima nńumba voni. Pwu akata nudadaje va mwana nuvańina akata navitsile nave vwu akingila navo umwu ale umwana. 41Pwu akamwibata ikivoko umwana akata: Talita kumi, kwu kuta: Vi kahinza, ndikukuvula ndita, sisimuka. 42Pwu akahinza kakasisimuka ṅani-ṅani vuvule kakagenda. Mańa imyaka gya mwene amalile kitsigo nagivili ukugona. Pwu voni vakagangaluka jilweli. 43Umwene akavabetsa sitso akata: Ndambulaga nujyunge umunu. Umwene umwana akata: Vi mumpetsage isinu alitsage.

Currently Selected:

Malika 5: Kinga

Highlight

Copy