Malika 4

1Pwu akavuja akavavula inongwa avanu vwu imile pamwambo pańanza. Pwu vakalundamana upwu ale avanu vavongosu ikipuga vuvule. Pwu umwene akipaka mwiboti ilyale mmagasi, mwu akatama. Avene avanu ikipuga kyoni vakima pamwambo pańanza. 2Pwu umwene akavavula ńongosu inongwa, akatsovela nsihwanihitso pakuvavula, Apene pakuvavula pwu akata: 3Mupulihitsage kunu! Lola undahangano akabiha pakulaha imbeju jya mwene. 4Avwene vwu ilaha, pwu ijyinge imbeju jikatsigwa panzila, pwu isidege sya kukyańa sikahola sikamala. 5Ijyinge jikatsigwa pakilunga kya maganga umwu umanga nagumuli mwongosu. Jyu jikamela ṅani-ṅani vuvule ulwakuva umanga nagumuli mwongosu. 6Vwu ilitsuva litogile pwu jikapya jikuma ulwakuva najili nimilela. 7Ijyinge jikatsigwa pamitwińo, igyene imitwińo gyu gikamela gikahopotsa, pwu najikahupa iseke. 8Ijyinge jikatsigwa pakilunga ikinnonu jikamela. Ijyinge jikahupa iseke imilevulo gidatu, ijyinge jikahupa imilevulo ntanato, ijyinge jikahupa imilevulo kitsigo. 9Pwu umwene akata: Uvi imbulukutu ali natso, vi apulikage. 10Vavwene ijekye pwu avale nave vakahanga navakitsigo navavili pakumbutsa isihwanihitso isi vakata: Kyu kinu kiki? 11Umwene akavavula akata: Uńe muli viki, uńe ndivapye ukuta mutsimańe nitsa kuvutitu itsa ludeva lwa Nguluve, avene avapanzi valya vwu vipulikaga si sihwanihitso, 12nupwu vangave vali nago amiho ga kulolela, pwu ukuta valatsivońaga itsinge, nupwu vangave vali natso imbulukutu tsa kupulihitsa, pwu ukuta valatsimańaga nitsinge, nukukilivuka ukuta valakilivukaga, imbivi tsa vene valavuvonaga uvusyikilo. 13Akavuja akavavula akata: Kingave kivalemile ukukimańa ikihwanihitso iki, pwu isinge isinine ndasimańaga ndeti? 14Isyu ilaha undahi lyu limeńu. 15Avali panzila, vwu avivona ilimeńu lilahilwe vivona vapulike, pwu nihava USetano ukwitsa nkulińaga ilimeńu ilyalahilwe munumbula tsa vene. 16Najyene ijyu ndatetsaga jilahilwe pakilunga kya maganga, najyene vuvule-vule. Vwu uvwu vangave vapulike ilimeńu pwu vihekela pakulyupilila ṅani-ṅani. 17Mańa imilela naviva nagyo, bako va kwima ilitsuva lipamato lyene. Ulwambele vivona ilimeńu livapelye uvukuvilwa nuvuswimo upwu vali nalyo, pwu navihava ukwileja. 18Ijyene ijyu ndatetsaga jilahilwe mmitwińo, najyene jili ponu. Vwu vivona vapulike ilimeńu, 19pwu ikilunga iki kikuvapelela ukwisagila nuvuteki uvukuvateka uvukavi nuvunogwe vwoni uvukwingila mwitumbu, vwu vukuligoga ilimeńu, pwu niseke natsisika. 20Ijyene ijyu ndatetsaga jilahilwe pakilunga ikinnonu, vwu avita nukupulika ilimeńu vita nukulyupilila, pwu vihupa iseke. Avange vihupa imilevulevu gidatu, avange vihupa imilevulo ntanato, avange vihupa imilevulo kitsigo.

21Akatsova navo akata: Ińale vangave vakotsitse nda vigubikila nikiswiswi, nda vivika pasi kukitala? Nda navivika pakyańa pakibatilo? 22Mańa twoni utuvye tuvonekaga lungave lusiku, natwene utwa mbutitu twoni tulavonekaga pavuvalasu. 23Uvi ali natso imbulukutu tsa kupulihitsa, vi apulihitsage. 24Akavavula akata: Mbandikage mpulihitsage vunnonu itsu mupulika. Ikigelelo ikyu mukuvagelela uńe avange, kyu ndagelelivwagwa nuńe, valavongeletsaga upwu mpulike itsu nditsova. 25Mańa uvi ali nasyo isinge, vi ikwongeletsivwagwa ukupevwa nisinge. Uvi niva nako nakange, vi kipokivwagwa nakene angave ali nako.

26Akavavula akata: Vwu lulivwo vuvule-vule uludeva lwa Nguluve, luli ndumunu uvi alahaga imbeju jya mwene nkilimila kya mwene. 27Pwu umwene ita nukugona itulu pakilo, ita nukusisimuka pamuńi, ijyene imbeju jita nukumela jita nukukula, umwene nikujivona. 28Mańa ikilunga kivomba kyene vuvule upwu kipela iseke. Tango kipela ulubelege pwu kipyanitsa isisotso, lino pwu jivoneka jiduluka nsisotso. 29Upwu angave lweli avwene iseke tsidulwike pwu ṅani-ṅani igega umage gwa kubenela ulwakuva kwitsile ukubena.

30Akavuja akata: Uludeva lwa Nguluve tutetsage luli ndi kiki? Tukivone ndaku ikihwanihitso kya kutsovela? 31Tutetsage luli ndakaseke ka nkisina. Mańa akene upwu umunu ivyala mungunda, pwu kiva kadebe vuvule kuseke tsoni nkilunga umu. 32Vwu umunu avyalile pwu kikula, kikuliluta lyoni iliseke ilinine, kipagika amapagika amavaha, pwu nisidege sya kukyańa sihona uvuswa mmatsitsimilo ga kene. 33Vwu akavavula vuvule-vule inongwa, akatsitsovela nsihwanihitso syongosu, akatsova vuvule-vule, akavagelela paluhala lwa vene lwa kutsivona. 34Ukwene ukutsova vuvule, kwu natsovili itsinge. Tsoni itsu avavulaga tsu akatsitsovela nsihwanihitso. Avene avakongi va mwene vwu akavavula vuvule vwu ijekye navo.

35Palitsuva ili pakimihe akavavula avakongi va mwene akata: Tulovokage umwambo gulya. 36Pwu vakakileka baho ikipuga kya vanu. Vakantola vuvule umwene nduvwu ale mwiboti vakaluta. Nagange amaboti gakagenda nave. 37Pwu likavoneka ilikuluguta ilivaha sitso. Amajiga gakavavukila mwiboti, gakadiga amagasi. 38Umwene vwu agonelye kungongo mwiboti pampako gwa kwijimika kuntwe. Pwu avene vakansisimula vakata: Vi mańisi, umwuja uve nagukuli ugwa kuta pange viva pakutwivilila uvwe? 39Pwu umwene akasisimuka akalitanila nalyo ilikuluguta akatsova najyo ińanza akata: Nunala, uve mye vuvule. Pwu ilikuluguta likalitama, kukanunala vuvule. 40Akatsova navo akata: Vwu vudwatsi vuki uńe! Vwu vwebepe vuki ulwidiko lwińo l 41Pwu vakadwada uludwado lwu lwongosu sitso, vakavutsanya vakata: Vi veni uju? Mańa nali likuluguta lipulika kumwene, najyene nińanza jikumwidika.

Currently Selected:

Malika 4: Kinga

Highlight

Copy