Malika 3

1Pwu akavuja akatsikwingila nńumba tsa kwisajilamwo. Mwu akambona umunu va kivoko ikyumile. 2Avene vakantegelela vakata tulole vwu amponitse pasabati. Ulwakuva avene vakata pwu tukutsivonelaga itsa kunswikila inongwa. 3Umwene akatsova kumunu va kivoko ikyumile akata: Sisimukaga vwime pavuvalasu apa. 4Akavavutsa akata: Kiki kinogye pasabati? nukuvomba innonu nukuvomba imbivi nukuponehetsa uvwumi nukubuda? Avene vakava mye vuvule. 5Umwene akavatsalukila gukavipa. Uvutalamu vwa munumbula tsa vene vukampelela ulususuvalo. Pwu akambula unakivoko akata: Golosa ikivoko kyako. Umwene akakigolosa. Pwu kikanduka ikivoko kya mwene kikava ndikinine. 6Pwu avapalisai vakahumila ṅani panzi vakatsitsovana navakivaga va Heloti vakidinana itsa kuta tumbudage.

7Pwu nu-Jesu navakongi va mwene vakabiha pańanza. Avene avanu va mu-Galilai vakankonga vongosu sitso. 8Navene avapulike itsu apelaga voni vakabiha upwu ale, vakahuma namu-jutai namu-Jelusalemu namu-Itumai namumwambo gulya gwa Jolitani nansilunga sya mu-Tili namu-Sitoni ikipuga ikivaha sitso. 9Umwene akatsova navakongi va mwene akata: Mundondelage akaboti, ulwakuva avanu ikipuga kyoni vańańamike umwene. 10Mańa avaponyaga va vongosu. Pwu vakańilila namumana voni avale nuvutamu vakata tumwabase. 11Natsene imepo imbivi vwu tsimbwene pwu tsikabiluka pasi tsikakuta tsikata: Veve nswambe va Nguluve. 12Umwene akatsitanila sitso akata: Ndatsovaga!

13Pwu akatoga pakidugala akavilanga uvwu anogilwe jujwa. Avene vakabiha kumwene. 14Akavimika kitsigo navavili avakuva nave sikutsoni akata va kuvasuṅa nankutsova inongwa, 15akata vwu vivetsaga namaka ga kuhumya imepo imbivi. 16Akavimika akata nu-Simoni, vi akampa ili Petele ilitavwa, 17nu-Jakobu uńa-Sebetai nu-Johani ununa va Jakobu, vwu akavapa ili Bwaneligesi ilitavwa ilya kuvatsova ukuva vwu vańanzasi, 18nu-Andileja nu-Pilipo nu-Balitolomai nu-Matai nu-Toma nu-Jakobu una-Alipai nu Tatai nu-Simoni va mu-Kana 19nu-Juta va mu-Kalyoti uvi amendamaga ulwambele.

20Pwu akingila nńumba, Pwu vakavuja vakalundamana avanu ikipuga vuvule, vwu navakapavona napakulya isinu. 21Vwu vapulike tsitsitsi avalukololwe, pwu vakahuma panzi vakata tumwibate ulwakuva vakata lumbwene ulukwale.

22Avene avamańakalata avahumile mu-Jelulsalemu vwu vakata: Ali nu-Belisibuli, Natsene imepo imbivi upwu ikutsihumya ikutsihumihitsa mumbaha va mepo imbivi. 23Umwene UJesu akavalundamanya akavavula ikihwanihitso akatsova akata: USetano ujyunge vi ate amumyage ndeti USetano unine? 24Ikilunga kingave kihambuṅine kikyo kyene, pwu vwu nakivakwo. 25Najyene nińumba jingave jihambuṅine jijyo jyene, pwu vwu najivakwo. 26Namwene nu-Setano angave ihambukye, angave ihambuṅinie mwene, pwu vwu nivakwo, bako pwu vwu imalile mwene vuvule. 27Nikwingila nujyunge nńumba jya ńangusu nkugoma isyuma sya mwene vwu tango nankungili umwenenajyo. Lola angave ankungye ṅani, pwu agomage isya nńumba jya mwene. 28Jilweli-lweli ndikuvavula ndita: Tsoni inonga itsu vitula avanu visyikilivwagwa. 29Mańa uvi andukile amadusi UMepo umbalatse, vi nalavuvone lusiku uvusyikilo, bako inongwa jya mwene jikumbadamaga sikutsoni vuvule. 30Tsu akavavula ulwakuva vatetsaga ali nimepo imbivi.

31Pwu nuvańina navalukololwe vakahegelela vakima mumbele mbanu vakansuṅa uva kumwilanga umwene. 32Avanu vambikile pagati pakutama nave. Vwu vakambula vakata: Uvańoko navalukololwo vali apa vita tundole uve. 33Umwene akanda akata: Ujyuva vi veni, avalukololwango vwu valiku? 34Pwu akalolesa akavalola avanu avańengile pakutama akata: Muvavwene ava? Vi jyuva, vwu valukololwango ava. 35Mańa uvi ivomba itsu anogilwe Unguluve, vi mama jujwa, vi matsa vango, vi jyuva jujwa.

Currently Selected:

Malika 3: Kinga

Highlight

Copy