Malika 2

1Vwu galutile amatsuva pwu akavuja akabiha mu-Kapelinaumu. Akapulikika ukuta ali nńumba. 2Pwu navakahavi ukulunda mańa avanu vongosu. Napandyango pakajaga pakwima avanu ulwakuva vale vongosu. Umwene akavavula inongwa. 3Pwu vakavona avanu vani vampimbile ujyunge unjavo uńalisusa vita tungege kumwene. 4Vavwene navapavweni pakumwingitsa vwu vita tuhegelele nave kumwene ulwakuva vale vongosuno avanu, pwu vakaswikula pakyańa pańumba vakagelela upwo alipwo umwene nńumba, vakamwisa lunine nuvusaga vwa mwene uvwu agonile uńalisusa. 5Umwene UJesu vwu aluvwene ulwidiko lwa vene, pwu akatsova kuńalisusa akata: Vi nswambango ndikusyikye inongwa tsako. 6Lola mwuvale avange avamańakalata avatamile mumwa. Vwu vakisagila mwitumbu vakata, 7tsu ate atsove ndeti vuvule-vule? Ikumelula Unguluve. Twi vanu nda pwali ujyunge uva kunsyikila inongwa umunu unine? Nda nikutsisyikila mwene Unguluve inongwa? 8Umwene UJesu akatsivonela ṅani munumbula jya mwene ukuta tsu vikisagila tsitsitsi mwitumbu, pwu akavavutsa akata: Tsu mukisagila tsiki tsitsitsi munumbula tsińo? 9Lyu lyebepe liliku ilya kumbula uńamasusa uju nilya kuta: ndikusyikye inongwa tsako nilya kuta: Imaga pimbaga uvusaga vwako ubihage? 10Lola ulwakuva ndita mummańage Uńamunu ukuta isyikila inongwa nkilunga umwu, 11pwu ndikukuvula uve ndita: Imaga pimbaga uvusaga vwako ubihage kuvutsenge vwako. Lyu akatsova kuńalisusa ili. 12Pwu umwene akima ṅani-ṅani, akapimba uvusaga vwa mwene akahuma kunzi vwu voni vilola. Pwu vakagangaluka voni, vakanginya Unguluve vakata: Tsu natutsivweni lusiku tsitsitsi.

13Akavuja akabiha kuńanza, Pwu avanu ikipuga kyoni vakankonga upwu ale. Umwene akavavula inongwa. 14Vwu igenda vuvule pwu akambona ULevi uńa-Alipai, akavona atamile pavusangulilo amasango. Vi akamwilanga akata: Tsuvula uṅonge. Pwu umwene akima akankonga. 15Avwene vwu atamile pakulya isinu nńumba jya Levi pwu navasangutsi navatulanongwa vongosu vakatsitama nu-Jesu navakongi va mwene pakulya isinu. Mańa vale vongosu avagendaga nave sikutsoni. 16Avene avamańakalata navapalisai vwu vambwene ukutama navatulanongwa navasangutsi pakulya isinu, pwu vakatsova kuvakongi va mwene vakata: O, vwu agahile, ilya nu kuńwa navasangutsi? 17Umwene UJesu akapulika. Pwu akavavula akata: Avadulusu vwu navikundonda untuṅanya, va vatamu lweli vwu vikundonda. Nanditsili kukuvilanga avagolosu, bako nditsile kukuvilanga va vatulanongwa.

18Avakongi va Johani navapalisai vale nulwiho lwa kusileka isinu. Pwu avange vakatsikumbula vakatsita: Lola avakongi va Johani navakongi va vapalisai vasilekile isinu. Avako navikusileka kiki? 19Umwene UJesu akanda akata: Pwu vate vasileke ndeti isinu avalyasinu sya pavutegulane vwu tango vale nave untegulandala? Tango vwu vali nave untegulandala pwu navanogili ukusileka isinu. 20Lola likwitsa ilitsuva ilyu valavonaga untegulandala ajagile, pwu lweli valasilekaga isinu ilitsuva ili. 21Nakuli ujyunge uvi ipabikila ikipabikilo kya nsabwa umpya pansabwa undala. Mańa angave ujyunge apabikye, pwu ikipabikilo ikipya iki nakikwibata pansabwa undala, bako kipapuka vuvule pwu unsabwa gwongeletse ukuswa. 22Nakuli ujyunge uvi iduda uńeke gwa masilu mmipako imilala gya masilu. Mańa angave umunu adudilemwo, pwu uńeke gulendula imipako gya masilu, pwu amasilu gadudikage nagyene nimipako givejangikage. Bako uńeke gwu upita umunu adudage mmipako imipya vuvule.

23Ulunge pasabati vwu igenda panzila jya nsilimila sya ngano, pwu avakongi va mwene vakasulubula isisotso vwu vigenda. 24Pwu avapalisai vakatsova nave vakata: Lola avakongi vako vivomba akali mwiko ukuvomba pasabati. 25Umwene akanda akata: Nda nantsivweni uńe mwa kalata itsu avombage UNdaviti palya sijage isinu palya jivave inzala najujwa navale nave? 26Palya ingilaga nńumba jya Nguluve pamwaka gwa kuvela ukuva nteketsi umbaha Abyatali, palya alitsaga isivanda isivalatse, isyu sikutsoni nalili lusiku ujyunge, isyu valitsaga vene va vateketsi, palya umwene avapetsage navene uvwu ale nave? 27Akongeletsa UJesu akata: Unguluve upwu ampelaga usabati pwu akata ivetsaga va munu, ndatetsaga atye umunu ivetsaga va ju sabati. 28Pwu namwene usabati Uńamunu vi nkuludeva va mwene.

Currently Selected:

Malika 2: Kinga

Highlight

Copy