Malika 15

1Pwu vakalava pavusiku vakalundamana avateketsi avavaha navańivaha avenekivumbuko nululundamano lwoni lwa vatsovanongwa vakatsovana. Pwu vakankunga vakangega vakatsikumilikila UPilate. 2Pwu UPilate akambutsa akata: Nda veve nkuludeva va va-Juta? Umwene akanda akata: Nduvwu vwitsova. 3Pwu avateketsi avavaha vakambulila ńongosu vuvule. 4Pwu UPilate akavuja akambutsa akata: Nda navukwanda ilinge? Nda navupulika itsu vikukuvulila? 5Umwene UJesu akabela nukwanda ilinge. Pwu namwene UPilate akadega.

6Sikutsoni palitsuva ilivalatse akava nulwiho lwa kuvavopolela mpamato uva muńololo, uvi vamalaga avene. 7Lino ale muńololo ujyunge uvi vatetsaga vi Balaba ilitavwa. Vi vamwibite lunine navo avakilivuṅanaga uvutsenge avabudile numunu vwu vakilivuṅine uvutsenge. 8Pwu avanu ikipuga kyoni vakatoga ukubiha kwa Pilate vakatsita: Ungatuvopolelaga ujyunge umunu lino nduvwu vukutuvopolela sikutsoni. 9Umwene UPilate akanda akata: Pange mutye ikutuvopolelaga unkuludeva va va-Juta. 10Ulwakuva avamańile avateketsi avavaha ukuta kavasuṅile akavini vuvule upwu vangegile kumwene. 11Avene avateketsi avavaha vavahambulye ṅani avanu vatye nkatetsage: Utuvopolelage ju Balaba. 12Umwene UPilate akavuja akavavutsa akata: Ndigahe ndeti nunkuludeva va va-Juta? Mumbulage. 13Pwu avene vakavuja vakaswanganya vakata: Untovelelage pakidamiṅanye. 14Umwene UPilate akata: Atulile inongwa ṅi? Avene pwu vakongeletsa sitso ukuswanganya vakata: Untovelelage pakidamiṅanye. 15Umwene UPilate akata ndivakelage avanu, pwu akambopola ju Balaba. Umwene UJesu akavapa ukuta vantovage nisikoti, vantovelelage pakidamiṅanye.

16Pwu avasikali vakabiha nave nńumba jya mbembenuka vakatsikungongolela ikipuga kyoni kya vajavo. 17Vakanswika ugwańingilitsa unduṅu, vakahona nuludiṅulilo lwa mitwińo lwu vakambika pantwe. 18Vakampembetsa vakata: Tukukupembetsa vi nkuludeva va va-Juta. 19Vakantova nulugugu pantwe, vakambehela namati, vakasugama pasi vakabiluka kumwene. 20Vwu vamekile vuvule-vule pwu vakansula ugwańingilitsa unduṅu gulya, vakavuja vakanswika imisabwa gya mwene. Pwu vakabiha nave pakuntovelela pakidamiṅanye. 21Vakamwibata ujyunge umunu uvi ilitavwa lya mwene ale vi Simoni va mu-Kilene, udadaje va va-Alekandeli nu-Lupu, uvi ahumile kukilimila atye ndilute vuvule. Vi vakamwumilitsa ukuta ampimbile ikidamiṅanye kya mwene. 22Vakatsisika nave upwu vita pwu pa-Goligata, kwu kuta pwu paliṅala lyantwe. 23Vakata tuńwesage namasilu agahangile nuntuguva gwa mila. Umwene akabela. 24Vwu vantovelye pakidamiṅanye, pwu vakalagulila pakugavana imisabwa gya mwene ukuta ujyunge atole akanu aka ujyunge akanu aka. 25Ukwene ukuntovelela pakidamiṅanye kwu vakantovelela pakavalilo ka datu. 26Natsene inongwa itsu vambudilaga vakatsiviga vakatsivika pakyańa vakata: UJU VI VI NKULUDEVA VA VA-JUTA. 27Vakavatovelela lunine nave pasidamiṅanye sya vene navabudi vavili. Ujyunge vakambika kukivoko kya mwene ikyandyo, ujyunge kukivoko kya ṅigi, umwene akava pagati. 28Pwu kwu kwitsa tsitsile itsa kalata uvi atetsaga: Vamanzitse navatulanongwa. 29Mańa voni avalutaga vakamelula vakatiga nimitwe gya vene vakata: O vi ulumańile ukumamula ińumba imbalatse nukutsenga imya amatsuva gadatu, 30uli nakiki ukwipoka vimwene, uli nakiki ukwika pakidamiṅanye? 31Navene avateketsi avavaha navamańakalata vuvule-vule vakameka vakata: Avange avapokaga sikutsoni, ali nakiki ukwipoka mwene lino? 32Ali nakiki ukwika pakidamiṅanye nuvwe tudegage twidikage humbe vi Kilisiti, humbe vi nkuludeva va avańa-Isilaeli jilweli. Navene avatovelilwe lunine nave pasidamiṅanye sya vene navene vakanduka sitso.

33Pwu pakavalilo ka ntanato jikagwa iṅisi ikilunga kyoni jikatsisika pakavalilo ka budikakupamato. 34Pakavalilo ka budikakupamato pwu UJesu akakuta ilimeńu ilivaha akata: Eloi, Eloi lama asabakatani, kwu kuta: Vi Nguluve vango, vi Nguluve vango undekile kiki? 35Avange avale baho vwu vipulika ilimeńu ili pwu vakata ikumwilanga Elija. 36Pwu ujyunge akanila ṅani-ṅani akatola akasabwa akatsaba mmasilu, akingitsa ndugugu akańwesa, Akata: Leka, tulole vwu itsile Elija kukumpoka. 37Umwene UJesu akavuja akakuta ilimeńu ilivaha pwu akaluta pakutsilika. 38Pwu nilivalika ilyu vapindile nńumba imbalatse likalenduka likahuma pakyańa likatsisika pasi gakipela gavili. 39Umwene undongotsi va vasikali uvi imile baho, uvi andolaga, vwu ambwene ukukuta vuvule-vule vwu iswa, pwu akata: Jilweli ale nswambe va Nguluve umunu uju. 40Pwu vale baho navadala, vwu vakalola pavutale. Vali nu-Malija va mu Magatala, nu-Malija uvańina va Jakobu undebe nu-Jose nu-Salome. 41Vwu avankongaga vwu ali mu-Galilai avambombelaga nimbombo, navange vuvule va vongosu avatogile nave vwibiha mu-Jelusalemu.

42Pakimihe palitsuva lya kwinotsehetsa pasabati, 43pwu UJosepu va mu-Alimatai uńivaha umwimikivwa uvi namwene alupulikilaga uludeva lwa Nguluve, akidulusa vuvule akingila pa-Pilate akatsidova ummana gwa Jesu. 44Umwene UPilate akadega vwu ita aswe katale. Pwu akamwilanga undongotsi va vasikali akambutsa akata: Ndaswe katale? 45Undongotsi va vasikali vwu ambulile, pwu akampa ummana UJosepu. 46Umwene akatsigula unsabwa umbalasu akantumbula pakidamiṅanye akambinila munsabwa ugu akatsikumbika mbuguli uvwu vapunzile ndunalavwe, akabilusa iliganga akalivika pandyango gwa vuguli. 47Avene va-Malija va mu-Magatala nu-Malija uvańina va Jose vakalola umwu vambikaga.

Currently Selected:

Malika 15: Kinga

Highlight

Copy