Malika 16

1Vwu alutile usabati pwu va-Malija va mu-Magatala nu-Malija uvańina va Jakobu nu-Salome vakatsigula imituguva vakata: Tutsikumbakaga. 2Vakalava pa litsuva ililongotsi lya juma vwu likanale ukuhuma ilitsuva. 3Vakavutsanya munzila vakata: Veni ikutuvusihitsaga iliganga pandyango gwa vuguli? 4Vwu vita tulole pwu vakavona iliganga libilwike,–ulwakuva lyale livaha sitso. 5Pwu vakingila mbuguli, vakavona undume atamile kukivoko ikyandyo, iswikile ugwańingilitsa untale umbalasu. Pwu vakakeńemuka. 6Umwene akata: Kwu bako ukukeńemuka, Mukundonda ju Jesu va mu-Nasaleti uvi atovelilwe pakidamiṅanye. Mańa atsukile namuli umu pwu apa vangonitse apa. 7Mbihage lino nkavavule avakongi va mwene naju Petele nkatetsage: Ilongolela ukubiha mu-Galilai, Mwu ndatsikumbonaga nduvwu avavulye ṅani, 8Pwu vakahuma mbuguli, vakańila ulwakuva vadwadaga nuludwado lwongosu luvavwene, Vakabela nukumbula ujyunge umunu ulwakuva vadwadaga.

9Umwene UJesu vwu atsukile palitsuva ililongotsi lya juma pavusiku, pwu akalongola ukumbonekela UMalija va mu-Magatala uvi amumitse imepo imbivi lekelakupamato. 10Pwu umwene UMalija akabiha akatsikuvavula avale nave sikutsoni, ulwakuva vwu vasusuvye valilaga. 11Vwu ikuvavula ita: Mwumi ndimbwene pwu avene navatsivweni.

12Ulwambele akavona vigenda inzila vavili vibiha nkilunga, pwu navene akavavonekela. Akava ndujyunge vuvule vwu ikuvavonekela. 13Pwu vakabiha navene kukuvavula avajavo. Natsene nitsa vene navatsivweni navene.

14Ulwambele vwu vatamile pakulya avali kitsigo nampamato pwu akavavonekela akavatanila iṅani tsa vene nuvudulusu vwa numbula ulwakuva navidike kuvene avambwene ukutsuka. 15Akavavula akata: Mbihage nkilunga kyoni nkasivule isipelwa syoni inongwa innonu. 16Uvi ita nukwidika ita nukwotsivwa vi alapona, mańa uvi nikwidika vi alahigwa. 17Isyene isipelwa isikuvakongaga avene vangave vidike syu isi: Imepo imbivi valatsihumihitsaga mwitavwa lyane, valatsovela nindimi imya. 18Nińandalwe valibata vuvule. Nupwu vangave vanwe isinge isya kuvatega nasilavagahe kinu. Avatamu valavavika amavoko pwu vipona.

19Vwu atsovile unkuludeva tsitsitsi navene pwu akatoga kukyańa, kwu atamile kukivoko ikyandyo kya Nguluve. 20Avene pwu vakahuma baho vakatsitsova mwoni-mwoni inongwa. Unkuludeva akavatanga pambombo tsa vene, ilimeńu akalipela amaka nsipelwa isyavakongaga. Ameni.

Currently Selected:

Malika 16: Kinga

Highlight

Copy