Malika 12

1Pwu akavavula ikihwanihitso akata: Kwale ujyunge umunu, vi akavyala ungunda gwa mwene gwa masilu, akata nuluvigo aka vigila, akata nińumba jya kukamilamwo amasilu akajava, akata nulukonze lwa kugulolela akatsenga, akavavikamwu navanu va kuvombela, pwu akabiha kukilunga ikinge. 2Vwu gwitsile umwaka gwa masilu, pwu akansuṅa unkivaga uva kuntolela itsinge iseke tsa masilu kuvene avavombelaga. 3Avene vakamwibata vakantova vakankilivula vwu navampili kinu. 4Pwu umwene akavuja akansuṅa ujyunge unkivaga. Vi vakamoma untwe namaganga, vakankilivula vwu vandemitse. 5Umwene akavuja akansuṅa ujyunge. Vi vakambuda. Vwu vakagaha navo vuvule-vule navange va vongosu. Avange vakavatova, avange vakavabuda. 6Pwu avetsaga nunswambe mpamato ludiga ungane sitso kumwene, vi akansuṅa mumbele akata: Umwene unswambango vi vitsikundwadaga. 7Mańa avene avavombelaga amasilu vwu vakavulana vakata: Vi vi mwenevuhale uju, tsukwi tumbudage pwu tuvetsaga twi venevuhale uvwe. 8Pwu vakamwibata vakambuda. Vakamumya mungunda gwa masilu vakantaga. 9Alagaha ndeti navo umwenengunda gwa masilu? Alitsaga nkuvabuda avavombelamasilu ava alavapyanihitsa avange. 10Apene pakalata namupavweni lusiku upwu ita: Iliganga ilyu valigilye avatsengańumba lyu lyipelile ukuva lya kwitotekapwo ińumba jyoni. 11Vwu agahile unkuludeva vuvule-vule, atye livetsage lya kudega uvwe vwu twilola. 12Avene vakata tumwibate, mańa vakadwada kuvanu avalundamine ikipuga kyoni. Ulwakuva vakivwene ikihwanihitso iki, vakata ikututsova uvwe. Pwu vakandeka baho vakavuka.

13Pwu vakansuṅila avange navapalisai navańa-Heloti vakata vwu vangonelage ilimeńu mundomo. 14Pwu vakatsitsova nave vakatsita: vi mańisi tuvwene vwitsova tsitsa jilweli upwu vwitsova, nisoni nuli natso kuvanu. Ulwakuva nujyunge umunu navukumalila mbunnonu kumiho, bako avanu vukuvavula ija jilweli inzila jya Nguluve. Pwu tukukuvutsa twita: Nda kunnonu ukusangula amasango kwa Kesali? Nda mwiko? Tugahage ndeti, nda tusangulage, nda tubelage ukusangula? 15Umwene akavamańa uvunwasi vwa vene akata: Mumbonyage ulutalama lwa masango ndilole. 16Pwu vakampa ulunge. Umwene akata: Ndeti ikihwanihitso iki kyani? Nuvuvige uvu vavigile vwani? Vakata: Vwa Kesali. 17Pwu UJesu akanda akata: E humbe mumpetsage UKesali isya pavu-Kesali vwa mwene, namwene nu-Nguluve mumpetsage isya pavu-Nguluve vwa mwene. Pwu vakadega vuvule.

18Pwu vakahegelela kumwene avasatukai avibela vita ukutsuka kwu nujyunge umunu nitsuka lusiku. Navene vakambutsa nilinge vakata: 19Vi mańisi, lola UMose alagye mwa kalata va mwene atye: Angave ulukololwe va munu aswe, andekile undala va mwene vwu naholili numwana ujyunge, pwu upita ulukololwe amwingilage amolelage avana ulukololwe. 20Ulole pwuvale apa avanamunu lekelakupamato. Pwu umbaha akantola undala, akaluta pakuswa untsilamwana vuvule. 21Pwu akamwingila uva vili. Namwene akaluta pakuswa untsilamwana vuvule. Namwene uva datu vuvule-vule. 22Pwu vakakongana pakumwingila vuvule-vule voni vuvule vwu lekelakupamato, voni vakaswa avatsilamwana vuvule. Kumbele kuvoni pwu namwene undala akavakonga ukuswa. 23Lungave lusiku vwu vatsukile voni avanu, pwu avetsage ndala vaaliku? Mańa voni lekelakupamato vantolile. 24Pwu UJesu akanda akata: Ndita lwulu mujagile ulwu mutye nakalata namummańili, mutye namaka ga Nguluve namugamańili. 25Mańa pakutsuka vwu vatsukile kuvaswe, pwu nukutegulana navalategulane. Bako valava ndavasunwa vuvule va kukyańa. 26Ukwene ukutsuka avaswe namulivweni mwa kalata va Mose umwu ikutuvula itsa pakasitu palya, ilyu Unguluve atsovage nave ilyu atetsage: Nene ndili Nguluve va Abulahamu, ndili Nguluve va Isikaka, ndili Nguluve va Jakobu. Lyu nda namulivweni? 27Umwene Unguluve nda vi Nguluve va vaswe? Bako va vumi. Lwulu mujagile vuvule.

28Pwu akahegelela kumwene ujyunge umańakalata, uvi apulihitsage vwu vikaṅinana nave ulukani, uvi ambwene ukuvalema umwene, vi akambutsa akata: Ululagilo ululuti kundagilo tsoni lwululiku? 29Umwene UJesu akanda akata: Ululagilo ululuti kundagila tsoni ulwita: Pulika vi Isilaeli, mańa Unguluve untwa vitu vi nkuludeva jujwa mwene, 30vi unganilage ninumbula jyako jyoni numwuja gwako gwoni nukwisagila kwako kwoni namaka gako goni. 31Ulunge ulunine ulwita: Namwene unnino unganage nduvwu vwiganile vimwene. 32Pwu umańakalata akidika akata: Jilweli vi mańisi utsovile ugolwise upwu utye alikwo Jujwa mwene, nakuli ujyunge kuluvasu mmwene. 33Nupwu utye nulugano lwa kunganila Jujwa ninumbula jyako jyoni nukwisagila kwako kwoni namaka gako goni, nulugano lwa kungana unnino nduvwu vwiganile vimwene, –lwu lutsilutile uvunnonu inekelo tsoni vuvule, 34Umwene UJesu vwu ambwene ukwanda vunnonu vuvule itsa luhala pwu akambula akata: Uve navwiva patale paludeva lwa Nguluve. Pwu vakadwada ukumbutsa itsinge voni vuvule umwu vavelye.

35Umwene UJesu vwu ikuvamańisa mwa Tempeli, pwu akavavutsa akata: Lyu vatetsage vatsovage ndeti avamańakalata ilyu vita: UKilisiti ńa-Ndaviti? 36Mańa umwene UNdaviti upwu ikuntsovela mwa Mepo Umbalatse pwu ita: Unkuludeva atsovile kunkuludeva vango atye, tama kukivoko kyango ikyandyo ukasikage upwu avatavangwa vako ndikuvapelaga katamilo ka kuvikapwo amalunde gako. 37Lola UNdaviti ikuntsova ukuva vi nkuludeva va mwene. Pwu ate avetsage mwana va mwene ndeti? Avene avanu ikipuga kyoni umwu vavelye vakata: Nonu itsu itsova.

38Vwu ali pakuvamańisa pwu akatsova nalyene nilyakuta: Mbandikage avamańakalata aviswala igyańingilitsa imitale vwu vitsungutila mbutsenge, avita vatupembetsage avanu nduvanza, 39nanńumba tsa kwisajilamwo vita tutame pasitamilo sya vuvaha, nupwu vibiha pakutama pakulya isinu, napene vikihalila pakwimikivwa. 40Vivona valye vuvule inńumba tsa vadala avaswile, pwu viluta pakwisaja ińisajo inale itsa kuṅala. Vwu valutililaga ukuvungwa vwu vihigwa.

41Pwu UJesu pakutama vakalolanaga nikihava ikya kulaha isya kulaha. Akavalola avanu vwu vilaha indalama tsa vene nkihava. Akavona avamosu va vongosu vilaha tsi ńongosu indalama. 42Pwu undala mpamato unswile ungatsu akalaha utusenti utudebe tuvili utuli pakahela kapamato. 43Pwu UJesu akavilanga avakongi va mwene akavavula akata: Jilweli-lweli ndikuvavula ndita undala unswile ungatsu uju avalutile ukulaha voni avalahaga nkihava ikya kulahamwo. 44Mańa voni ava upwu vilaha pwu vitola vwu vavwene tsidigile, umwene uju lweli mbugatsu vwa mwene alahile isyu ali nasyo isya munzala.

Currently Selected:

Malika 12: Kinga

Highlight

Copy