Malika 1

1Vwu lyagahile vuvule-vule ukutengula ilivangeli ilikuntsova UJesu Kilisiti unswambe va Nguluve. 2Likongile avigage UJesaja uńamalago upwu atetsaga: Lola ndikukusuṅilaga unsuṅwa vango uva kulongola mbulongolo mwave, vi alagahaga inzila jya kugendamwo uve. 3Ilimeńu lya mwilangi likwilanga ndukungu lita: Munotsage unsevo gwa ntwa, ndiṅanyage inzila tsa mwene. 4Vwu akagaha vuvule-vule UJohani umwotsi ukuvoneka ndukungu, akavavula avanu akata: Mukilivukage pwu mulotsivwagwa pwu mukwupililaga uvusyikilo vwa nongwa tsińo. 5Pwu vakahuma ukubiha kumwene avanu ikilunga kyoni kya mu-Jutai voni nava mu-Jelusalemu, voni akavotsa ndugasi ulwa Jolitani. Avene vakipala inongwa tsa vene. 6Umwene UJohani aswalaga ugwańingilitsa gwa lwage lwa ngamila, ihudikaga ingwamba jya lukova nkivino, alitsaga namakivale nuvwuke vwa nzuke. 7Akasimilitsa akata: Pambele pane pwu ikwitsaga uvi andutile amaka une, uvi nandinogili nukwinama pakuvopola utukova twa nsikato sya mwene. 8Une ndivotsitse namagasi, umwene alavotsehetsaga ju Mepo umbalatse.

9Mmatsuva aga pwu UJesu akahuma mu-Nasaleti nkilunga kya mu-Galilai akabiha kwa Johani. Vi akamwotsa mwa Jolitani. 10Avwene vwu itoga mmagasi, pwu akavona kukyańa kudinduka, akavona UMepo ikumwikila uta ngundya. 11Akavona nilimeńu lihuma kukyańa lita: Vi nswambango uve, vi ngane kwane, vi uṅelye uve. 12Pwu nakahava UMepo ukutsikumbika ndukungo. 13Mwu akatsilinda amatsuva imilevulo gini (40) ndukungo umu. USetano akangela. Akalinda niṅanu tsa ndukungo. Avasuṅwa va Nguluve vakangegela isinu.

14Avwene vamwibite UJohani, pwu UJesu akabiha mu-Galilai akasimilitsa inongwa innonu tsa Nguluve 15akata: Umwaka gwitsile, uludeva lwa Nguluve luhegelye, mukilivukage mutsidikage inongwa innonu itsi. 16Ilitsuva ilinge vwu igenda pamwambo pańanza jya mu-Galilai, pwu akavavona nu-Simoni nu-Andileja unnuna va Simoni, akavona vilaha ulwelo lwa vene muńanza. Ulwakuva vale valovi. 17Pwu UJesu akatsova navo akata: Tsukwi muṅongage, ndikuvapelaga ukuva valovi va vanu. 18Pwu vakatsileka baho ṅani-ṅani vuvule ińelo tsa vene, vakankonga jujwa. 19Vwu alutile padebe pwu akavona nu-Jakobu uńa-Sebetai nunnunave UJohani, akavona vihona ińelo tsa vene mwiboti. 20Navene akavilangila ṅani vuvule. Pwu vakandeka mwiboti udadajavo USebetai navavombi. Avene vakankonga jujwa.

21Vakagenda vakatsisika mu-Kapelinaumu. Pasabati pwu vakingila nńumba jya vene jya kwisajilamwo akavavula inongwa. 22Pwu vakadega vuvule itsu avavulaga, ulwakuva vwu ikuvavula inongwa avonekaga ukuva vi vi mwenenatso jujwa, natsovili ndavamańakalata. 23Pwu vakakeńemuka mwale nńumba jya kwisajilamwo umunu va mepo imbivi ikwilanga 24ita: Tuli viki nuvwe nuve vi Jesu va mu-Nasaleti. Vwitsile nkutujatsa vuvule. Tukumańile mańa veve mbalatse va Nguluve. 25Umwene UJesu akantanila akata: Nunala, uhume mmunu uju! 26Pwu imepo imbivi jikamusanihitsa kwoni-kwoni umunu jujwa, jikahuma vwu jikutile sitso. 27Pwu vakadega voni, vakavutsanya vakata: Kyu kinu kiki iki? Tsu nongwa imya tsitsitsi? Mańa imepo imbivi ikutsilagila, itsene pwu tsikumwidika. 28Pwu akapulikika ṅani-ṅani nsilunga syoni isibadiṅine nikya mu-Galilai.

29Pwu akahuma nńumba jya kwisajilamwo akabiha nńumba jya va Simoni nu-Andileja. Mwu akingila nava-Jakobu nu-Johani. 30Umwene unkwive va Simoni vakavona ali pavugono ali nimungu. Tsu vakambulila ṅani UJesu. 31Pwu umwene akahegelela akamwibata ikivoko akamwimya. Pwu imungu jikandeka ṅani-ṅani, Pwu umwene akavagegela isinu baho. 32Kumihe vwu lisemile ilitsuva, pwu vakavagega kumwene voni avatamu navali nimepo imbivi. 33Avambutsenge vwoni vakava pandyango. 34Umwene akavaponya voni avatamu uvutamu vwoni, akatsihumya nimepo imbivi ńongosu vuvule. Akabela vwu imepo imbivi tsita tutsove ulwakuva tsammańile. 35Pavusiku akalava ukuhuma UJesu vwu likanale nilitsuva ukuhuma, akabiha ndukungu mwu akatsikisaja. 36Avene va-Simoni navanine vakatsikundonda. 37Vwu vambwene pwu vakata: Mańa voni vali pakukulonda. 38Umwene akata: Tubihage mwoni nambutsenge uvunge mbwipi umu, namwene ndikavavulage inongwa avanu, mańa tsu tsitso nditsile. 39Pwu akamala kyoni ikilunga kya mu-Galilai, akata nukuvavula inongwa nńumba tsa vene tsa kwisajilamwo, akata nukutsihumya imepo imbivi.

40Ulunge pwu akahegelela kumwene umunu uńabuba, Vi akasugama pasi akatekelesa kumwene akata: Ungave unogilwe pwu ulumańile ukumonya. 41Umwene UJesu ikisa kikambona mwitumbu, akagolosa ikivoko akamwabasa mumana akata: Ndinogilwe uponage. 42Vwu umwene atsovile ili pwu ibuba jikajaga akapona. 43Pwu UJesu akansumusa ṅani-ṅani, akatanila sitso 44akata: Uve miho ulambulaga nujyunge umunu. Bihaga ukavoneke kunteketsi ukangegele isya kutekela isya pakuponela uve isyu alagye UMose. Syu sivetsage sya kumańilamwo avene. 45Umwene umunu uju vi akabiha, akatsitengula ukutsitsova sitso, akatsitsova mwoni-mwoni inongwa tsitsitsi. Pwu UJesu akalemwa ukwingila pavuvalasu mbutsenge uvwu angave atye ndigendemwo–tsu nongwa tsitsitsi–bako akava mumalavwa vuvule. Pwu avanu vakahuma mwoni-mwoni ukubiha upwu alepwo.

Currently Selected:

Malika 1: Kinga

Highlight

Copy