Luka 8

1Pambele patsitsitsi pwu umwene akagenda vuvule akamala uvutsenge vwoni nuvuvaha nuvudebe, akasimilitsa inongwa innonu tsa ludeva lwa Nguluve. Avakitsigo navavili vakava nave. 2Navene navadala avange vakagenda nave uvwu avaponitse nimepo imbivi nuvutamu vuvule. Va-Malija uvi vatetsage va mu-Magatala uvi tsahumilemwo mmwene imepo imbivi lekelakupamato, 3nu-Johana undala va Kusa uńivaha va Heloti, nu-Susana navange vavongosu. Vwu vakavatanga ukuvasugila najujwa navakongi va mwene nikyuma kya vene.

4Vwu valundamine avanu ikipuga avahumile mbutsenge mwoni-mwoni avatungaga, pwu akatsova ikihwanihitso akata: 5Alikwo umunu uvi alahaga imbeju jya mwene. Vwu ali pakulaha pwu ijyinge jikatsigwa panzila jikakadwa, nisidege sya kukyańa sikahola sikamala. 6Ijyinge jikatsigwa palunalavwe, jikaduṅupala ulwakuva najili nuvuńesu. 7Ijyinge jikatsigwa pamitwińo, nigyene imitwińo vwu gimelile panine najyo gikahopotsa. 8Ijyinge jikatsigwa pakilunga ikinnonu, jikamela jikahupa iseke imilevulu kitsigo. Vwu atsovile tsitsitsi pwu akata: Uvi ali nimbulukuto, vi apulihitsage.

9Pwu vakambutsa avakongi va mwene vakata: Ikihwanihitso iki kyu kinu kiki? 10Umwene akavavula akata: Uńe mupevilwe ukutsivona itsa kuvutitu itsa ndudeva lwa Nguluve. Avange vivulwagwa si sihwanihitso isyakuta nupwu vilola navikutsivona, nupwu vipulika navikutsimańa. 11Ikyene ikihwanihitso kyu iki: Imbeju lyu limeńu lya Nguluve. 12Avali munzila vwu vivona vapulike uńalilusu ikwitsa ukulińaga ilimeńu munumbula tsa vene ukuta valaponelaga ndwidiko. 13Avali palunalavwe vwu vivona vapulike vikwupilila ilimeńu vihekela, igyene imilela naviva nagyo, navikwumilitsa ukwidika, lungave lusiku vigelwa navihava ukwileja. 14Ijigwa mmitwińo vwu vivona vapulike vikisagila uvukavi nuvunnonu vwa nkilunga vwoni vukuvagoga, niseke natsisika. 15Ijyene ijigwa pakilunga ikinnonu vwu vivona vapulike ilimeńu, avene viva nalyo munumbula innonu ingolosu, vwu vikwumilitsa nukuhupa iseke vatsilaluvipo.

16Ińale angave umunu akotsitse, pwu nigubikila nindelema, nivika pasi pakitala. Bako ivika pakibatilo, voni avikwingila nńumba ukuta vajivone ukumulika. 17Mańa twoni utwa kuvutitu tulavalaluka pavuvalasu lungave lusiku, twoni utwiswikile tulaswikulwagwa tulavonekaga pavuvalasu. 18Mbandikage mpulihitsage vunou itsu mupulika. Mańa uvi ali nasyo isinge, vi ikwongeletsivwagwa ukupevwa nisinge syongosu. Umwene uvi niva nako nakange, vi kipokivwagwa nakene ihwana ali nako.

19Pwu nuvańina navalukololwe vakabiha upwu alipwo, vakalemwa vwu vita twaganile nave ulwakuva ali pagati pakipuga. 20Pwu avanu vakambula vakata: Nuvańoko navalukololwo vimile mumbele mbanu vita tulole nuve. 21Umwene akanda akata: Ujuva navalukololwango vwu avita nukupulihitsa ilimeńu lya Nguluve vita nukulikonga.

22Ilitsuva ilinge akipaka mwiboti navakongi va mwene. Umwene akavavula akata: Tulovokage ińanza tubihage umwambo gulya. Pwu avene vakakuluga iliboti. 23Lino vwu ligenda iliboti pwu umwene akagona itulu. Pwu likavoneka ilikuluguta pańanza, namajiga gakavavukila mwiboti. Vakakuvilwa sitso. 24Pwu avene vakansisimula vakata: Nkuludeva, nkuludeva mańa tuli pakutwivila. Pwu umwene akasisimuka akatanila nalyo ilikuguta, akatanila nago namajiga ga magasi, pwu gakagataluka, kukanunala vuvule. 25Akavavutsa akata: Ulwidiko lwińo luli ndaku? Avene vakata nukudwada vakata nukudega, vakavutsanya vakata: Vi munu nki uju? Mańa ga makuluguta naga magasi gikumwidika itsu ilagila.

26Pwu vakalovoka vakatsisika pakilunga kya va-Gelaseni ikitegeṅine nikya mu-Galilai pańanza. 27Avwene vwu itoga pakimwambo, pwu akaganila numunu va mbutsenge mumwa uvi ali nimepo imbivi. Atengwe kakatale ukugenda vuvule kitaswala ugunge unsabwa nagonili nńumba akava mbuguli vuvule. 28Vi akakuta vwu ambwene UJesu, akangwila mmalunde akilanga akata: Tuli vuki nuńe nuve vi Jesu, vi nswambe va Nguluve unduti? Nditekelesa kwave ndita: Ulaniṅilaga. 29Ulwakuva umwene ajilagye imepo imbivi atye: Huma mmunu uju. Mańa atengulaga sikutsoni ukumusanya kwoni-kwoni. Avanine sikutsoni vakata tunkunge nimińololo nindegehe vakata tundindilile. Umwene akatsidumulanya itsa kunkungila, pwu imepo imbivi jikanswima mundukungo. 30Pwu UJesu akambutsa akata: Liliku ilitavwa lyako? Umwene akata: Nene Kipuga. Ulwakuva tsingye mmwene ńongosu imepo imbivi. 31Pwu vakantekelesa vakata: Vlatutsovaga ukuta mwitagage ndugenge. 32Lino pwukyale ikidimo ikivaha kya ngube, kikalya ilińasi pakidugala. Pwu imepo imbivi tsikantekelesa tsikata: Utupetsage ingube tsilya mwu twingilage. Umwene akidika. 33Pwu imepo imbivi tsikahuma mmunu jujwa tsikatsikwingila mungube. Pwu ingube ikidimo kyoni tsikańilila palugima tsikitaga muńanza, tsikumilwa vuvule. 34Avene avalume avadimaga ingube vwu vatsivwene tsitsitsi, pwu vakańila vakatsitsova mwoni-mwoni mbutsenge vwoni. 35Pwu avenevutsenge vakasisimuka ukubiha kukulola tsitso apelile. Vakatsisika upwu ale UJesu, vakatsivona umunu, uvi tsahumile mmwene imepo imbivi, atamile vunnonu kumalunde kwa Jesu, aswalile nimisabwa, anotsivwe vuvule. Pwu vakadwada. 36Avene avambwene vwu vakavavula itsa kumponya uva mepo imbivi vakata atye atye. 37Pwu avanu va nkilunga kya mu-Gelaseni ikipuga kyoni vakata: Ungahuma nkilunga kitu umu. Mańa uludwado luvavwene lwu lwongosu. Pwu umwene UJesu akipaka mwiboti akakilivuka ukwu ahumile. 38Umwene umunu, uvi tsahumile mmwene imepo imbivi, akantekelesa akata: Ndibihe nuve. Umwene akankilivula akata: 39Bihaga kuvutsenge vwako, uvavulage avanu itsu akupelye Unguluve. Pwu umwene akabiha akatsitsova mwoni mbutsenge itsu ampelye UJesu.

40Lino UJesu vwu atsisike pwu vakamwupilila avanu ikipuga. Ulwakuva voni vampulikilaga. 41Pwu vakavona ihegelela upwu ale UJesu umunu, uvi ilitavwa lya mwene ale vi Jaili umańisi umbaha nńumba jya vene jya kwisajilamwo. Vi akabilukila mmalunde UJesu akantekelesa akata: Tubihage nńumba jyango. 42Ulwakuva ale numwalive mpamato ludiga, uvi amalile imyaka kitsigo nagivili, vi ale pakutsilika. Umwene vwu ita ndibihe, pwu avanu vakakulugana nave ulwakuva kyale kipuga vuvule.

43Pwale numwene undala uvi ale nilimali imyaka kitsigo nagivili. Nikyuma kya mwene kyoni amalile mbatuṅanya, mańa ujyunge nalumańili ukumponya. 44Vi akahegelela mumbele akamwabasa kukilundwa kya mwene kumalunde. Pwu likuma baho vuvule ilimali lya mwene. 45Pwu UJesu akata: Veni ańabasitse baho? Vakabela voni. Pwu nu-Petele navali nave vakata: Nkuludeva ndanavwilola ukukulugana navo avanu ikipuga nukudidana navo? 46Umwene UJesu akata: Ujyunge ańabasitse. Mańa ndivwene amaka ukuhuma mumana mwane umu. 47Pwu lino undala vwu ivwene ukuta vikumbonaga, pwu akahegelela nukudetema, akabiluka pasi akambula itsampelye ukumwabasa akata tswu itsi, akatsitsova vwu vipulika voni avanu. Akambula nitsa kupona ṅani-ṅani akata: Nditye nditye. 48Umwene akambula akata: Vi mwana vango, lukuponitse lwu lwidiko lwako. Bihaga nulunotsehetso.

49Vwu ali pakutsova tsitsitsi, pwu akavoneka ujyunge uvi ahumile pambaha va vene va nńumba jya kwisajilamwo akambula akata: Umwalivo aswe. Ulamwumilitsaga umańisi. 50Umwene UJesu akapulika pwu akata: Uladwadaga vwidikage vuvule pwu ipona. 51Vwu avye kusika nńumba, pwu akavakilivula voni avatetsage twingilaga nave. Akatola vene va-Petele nu-Jakobu nu-Johani nudadaje va mwana nuvańina vwu akingila navo. 52Akavona voni vilila ukuswa kwa mwana. Pwu umwene akata: Kwu bako ukulila, mańa naswili, bako agonelye itulu. 53Pwu avene vakameka ulwakuva vambwene ukuswa umwana. 54Pwu umwene akavahumya voni nńumba, akamwibata ikivoko uminza akamwilanga akata: Vi mwana sisimuka. 55Pwu umwuja gwa mwene gukakilivuka ukwitsa mmwene, akasisimuka ṅani-ṅani, Umwene akavavula akata: Mumpetsage isinu alitsage. 56Pwu avahotsi va mwene vakagangaluka vuvule, Umwene akavalagila sitso akata: Ndambulaga ujyunge umunu itsu ndipelile.

Currently Selected:

Luka 8: Kinga

Highlight

Copy