Luka 19

1Pwu vakatsisika mu-Jeliko mwu akata ndigendemwo. 2Vwu ali mbutsenge umwu umunu uvi ale vi Sakai ilitavwa, umbaha va vasangutsi uva kyuma kyongosu. 3Vi akata ndimmańe UJesu umwu avelye. Akalemwa ukumbona ulwakuva avanu vale vongosu ikipuga vuvule, umwene ulwakuva ali nsupi. 4Pwu akańilila mbulongolo akatsitoga munkuju akata mwu ndikandolelage vwu iluta, ulwakuva ambwene ukuta mwu igenda. 5Umwene UJesu vwu asike upwu ale, pwu akalola nkyańa akambona akatsova nave akata: Sakai ikaga ṅani-ṅani, mańa nditye nditame nńumba jyako ilelo iji. 6Pwu umwene akika ṅani-ṅani akahekela sitso ukumwupilila. 7Vwu vambwene pwu voni vakihiva vakata: Lola ikwingila nńumba jya ntulanongwa mwu ilinda. 8Pwu umwene USakai akima pavuvalasu akambula unkuludeva akata: Lola nkuludeva, lino pwu ikyuma kyango kyoni ndigavanya pagati napagati ikinge ndikuvapa avagatsu. Uvi ndingave isya mwene ndilye nuvuteki, vi ndikumomba kani pakipamato-kipamato ikyu ndilye. 9Umwene UJesu akanda akata: Ilelo iji pwu uvupoki vwitsye nńumba iji, mańa numunu uju na-Abulahamu. 10Mańa Unńamunu itsile nkulonda avajagile, itsile nkuvapoka.

11Lino vwu vali pakupulika tsitsitsi pwu akongeletsa ukuvavula nikihwanihitso. Kyu akavavula ulwakuva avwene ahegelye mu-Jelusalemu ulwakuva avwene vikisagila vita uludeva lwa Nguluve lwiva pakuvoneka ṅani-ṅani lino. 12Pwu akahwanihitsa akata: Umunu ujyunge uva ndudeva abihaga kukilunga ikya kuvutale kukwupilila uvutwa akata ndilavuja. 13Lino vwu iluta pwu akavilanga avakivaga va mwene kitsigo akavapa indalama kitsigo akata: Tsu mwolosage lino vwu ndilutile. 14Avene avanu va mwene nduvanza vansulile, pwu vakasuṅa avakusuṅa mumbele mmwene vakata nkatetsage: Natunogwa uve ukuta uvetsage nkuludeva vitu. 15Vwu avwene lino itsile ukwu ale kukwupilila uvutwa vwa mwene pwu akata: Muvilange avakivaga uvwundavapye indalama tsango, ndivamane ukwolosa mpamato-mpamato. 16Pwu akahegelela undongotsi akata: Nkuludeva ulutalama lwako lwolwike itsinge indalama inine kitsigo. 17Pwu umwene akata: Mwalimi vi nkivaga vi nnonu! Vwale ngolosu pavudebe, pwu lino vuvetsaga navwo uvuńivaha isilunga kitsigo. 18Pwu akahegelela uva vili akata: Nkuludeva ulutalama lwako lwolwike itsinge indalama inine ihano. 19Namwene akambula akata: Nuve vuvetsaga ńivaha isilunga sihano. 20Namwene ujyunge unjyavo akahegelela akata: Nkuludeva lola ulu ulutalama lwako ndabinile munsabwa gwa masuke. 21Mańa ndadwadaga kwave ulwakuva uli ntalamu, vutola vuvule isyu nuvikili, vwibena umwu nulahili. 22Umwene akata: Tsikukulemaga tsitsa mundomo gwako vi nkivaga vi mbivi uve. Humbe vwamańile ukuta ndili munu untalamu, vwamańile nukutola isyu nandivikili nukubena umwu nandilahili? 23Pwu vwale nakiki ukuvapa ulutalama lwango avikwolosa? Lino vwu nditsile pwu ndili nditolela paninye nivana. 24Pwu akavavula avimile baho akata: Ntole ulutalama lwa mwene ulu mumpe uvi ali nindalama kitsigo. 25Avene vakańaga ṅani-ṅani vakata: Mańa ali natso indalama kitsigo. 26Umwene akata: Ukwi ndivavule uńe, uvi ali nasyo isinge, vi ikwongeletsivwagwa ukupevwa nisinge, umwene uvi nali nako akange, vi ipokwagwa nakukwa angave ali nako. 27Avene avatavangwa vango avabelaga ukuva nkuludeva va vene uńe, vwu mbagege kunu mbabude vwu ndilola.

28Vwu atsovile tsitsitsi pwu akavuka ukubiha ukutoga mu-Jelusalemu. 29Vavwene vwu vahegelye namu-Betipage namu-Betanija vwu valotsitse kukidugala kya mono, pwu akasuṅa avakongi va mwene vavili 30akata: Mbihage mbutsenge vulya mulolana navwo. Vwu musike pwu ndavona ilyana lya ligogovwe-vakungile–ilyu ujyunge umunu nitogili lusiku. Lyu nkavopole mungegele kunu. 31Ngave mbwene ujyunge umunu ivutsa ita: Muvopola lyiki? pwu nkatetsage: Mańa unkuludeva ikulilonda. 32Pwu vakavuka avene uvwu avasuṅile, vakatsivona vwu tsitso atsovile umwene 33Vwu vivopola ilyana lya ligodovwe ili, pwu avenenalyo vakavutsa vakata: Muvopola lyiki ilyana lya ligodovwe ili? 34Avene vakata: Unkuludeva ikulilonda. 35Vakaligega kwa Jesu. Pwu vakatandika isilundwa sya vene pakyańa palyana lya ligodovwe vakantotsa UJesu. 36Vavwene vwu igenda, pwu vakatandika isilundwa sya vene munzila. 37Vwu ahegelye vwu ikile kukidugala kya mono, pwu avakongi va mwene ikipuga kyoni umwu vavelye vakahekela vakanginya Unguluve, vakasitsova syoni isipelwa sya maka isyu vasivwene 38vakata: Nsajivwa unkuludeva uvi ikwitsila mwitavwa lya ntwa, lwu lunotsehetso lwene kukyańa, lwu lwimiko lwene kwa Nduti. 39Pwu avange avapalisai avale nkipuga umu vakatsova nave vakata: Vi mmańisi uvatanilage avakongi vako valaswanganyaga. 40Akanda umwene akata: Ukwa ndivavule uńe, vangave vinunala ava, pwu galalulutila amaganga aga.

41Lola vwu atsisike vwu ilola uvutsenge pwu akavulilila ulwihotsi 42akata: Nuve ungale utsimańe ilelo iji vwu tango pwile itsa kukupelela ulunotsehetso! Lola lino ndisihile kumiho kwave. 43Mańa gikukwitsilaga amatsuva ugwu avatavangwa vako valalima uvuguli vwa kukunyenga, valasigilanila vivigilanila kunu nakunu, 44valakuhemula nuve navana vako mwave mumwa, navalalileke ilinge iliganga palinine. Ulwakuva ubelile ukugamańa amatsuva gako ga kulolwa uve.

45Pwu akingila mwa Tempeli, pwu akavinga voni avagegaga isya kugula. 46Akavavula akata: Mańa livigilwe mwa kalata ilita: Ińumba jyango ńumba jya kwisajilamwo. Uńe lola njipelile ukuva mako jya vanambuda. 47Sikutsoni akavavula inongwa mwa Tempeli. Avene avateketsi avavaha navamańakalata navańivaha avenekivumbuko vwu vakata tumbude, 48tsikajaga lweli itsa kuntega ulwakuva voni avanu vambadamaga vapulikaga tsitsu atsovaga.

Currently Selected:

Luka 19: Kinga

Highlight

Copy