Luka 18

1Pwu akavavula ikihwanihitso ukuta umunu upita isajage sikutsoni kitańolomboka. 2Akata: Alemwo ujyunge umiganongwa mbutsenge uvunge uvi nandwadili Unguluve, uvi nali nisoni nakuvanu. 3Lino ale mbutsenge umwu undala unswile uvi akitsa sikutsoni kumwene akata: Uńigilage inongwa jyango ku uvi ikunzigila sikutsoni. 4Tango umwene akabela ukummigila. Pambele pwu akitsova mwene akata: Upwu nandidwada Unguluve nakuvanu nandili nisoni, 5pwu undala unswile uju ndikummigilaga inongwa tsa mwene ulwakuva ikungatatsa, pambele pwu ukuta alambańilitsaga vwu ikuńumilitsa vuvule. 6Pwu unkuludeva akata: Mudege itsu itsova umiganongwa umbivi uju! 7Umwene Unguluve lino pwu ate abelage ukuvagolohetsa inongwa tsa vene avahalilwe va mwene avikuta kumwene napamuńi napakilo, nda asuvilage ukuvapoka? 8Ukwa ndivavule uńe: Nalahave umwene ukuvagolohetsa inongwa tsavene. Apene mańa pwu angave itsile Unńamunu, ndeti pwu itse aluvonage ulwidiko nkilunga umu?

9Avange lola vakitsova vene vakata tuli vagolosu uvwe, vakavagilila avajyavo, vwu akavavula ikihwanihitso akata: 10Ulunge avanu vavili vakatoga vakabiha mwa Tempeli nkwisaja. Ujyunge ali mpalisai, ujyunge ali nsangutsi. 11Pwu umpalisai akima baho akitsova mwene vwu ikisaja akata: Uve vi Nguluve ndisana kwave ulwakuva nandili ndavange avanu, navahumbi navatekavajyavo navaligu. Namwene unsangutsi uju nandiliṅanili nave. 12Nisinu nditsila kavili ijuma mamato. Syoni isyu ndikava, syu ndigava pandevulo (isya kumpa Unguluve). 13Umwene unsangutsi akima kuvutale, akadwada nukulola kukyańa. Bako akitova pakipambaga akata: Vi Nguluve undekepelage ndi ngalo. 14Ukwa ndivavule uńe: Uju vi akavuja kuńumba jya mwene ndungolosivwa vuvule inongwa tsa mwene. Umwene unine ulyavi bako. Mańa voni avikijimika vene vwu valisivwa, voni avikijisa vene vwu valatotsivwa.

15Pwu vakagega navana kumwene vakata akavabasage mumana. Avene avakongi va mwene vwu vavavwene, pwu vakavatanila 16Umwene UJesu vi akavilanga akata: Mbaleke avańa vitse kwane, mukuvabetsa viki? Mańa uludeva lwa Nguluve lwa vene avali vuvule-vule. 17Jilweli-lweli ndikuvavula ndita: Uvi uludeva lwa Nguluve nikulwupilila uta mwana, vi nalingilemwo lusiku.

18Pwu ujyunge uńivaha akambutsa akata: Vi mańisi vi nnonu ndivombe kiki ikya kwingilila pavuhale vwa vwumi vwa sikutsoni? 19Umwene UJesu akata: Vukunzova kiki uvunnonu? Nda kwale ujyunge unnonu? Ndita unnonu ali mpamato vuvule vi Nguluve mwene. 20Indagilo utsimańile ndita? Nulwita ulaligupaga, nulwita ulabudaga, nulwita ulahitsaga, nulwita ulanwaṅilaga unnino nulwita umwimike udadajo nuvańoko, 21Umwene akata: Tsu nditsikongile tsoni tsitsitsi ndihumile natso mbudebe. 22Pwu vwu apulike ili UJesu pwu akambula akata: Kwukale akene akasigye uve. Ugutse nikyuma kyako kyoni uvagavanyage avagatsu, vwu pwu ukavile ikyuma kukyańa. Pwu ukitse uṅongage uńe. 23Umwene vwu apulike ili, pwu akasusuvala sitso ulwakuva ale mmosu sitso. 24Umwene UJesu vwu ambwene ukususuvala pwu akata: Kutalamu avańakyuma ukwingila ndudeva lwa Nguluve! 25Ulwakuva ningamila ukwingila nkiho ka kahonelo nummosu ukwingila ndudeva lwa Nguluve–kwebepe ukugenda ingamila nkiho ka kahonelo. 26Avene avapulikaga vwu itsova pwu vakata: Pwu veni uvi ipona lino? 27Umwene akavavula akata: Nitsu tsivalemile vuvule avanu, umwene Unguluve vi natsindemili. 28Pwu UPetele akata: Lola uvwe tusilekile syoni isitu tukukongile vuvule. 29Umwene akanda akata: Jilweli-lweli ndikuvavula ndita: Voni avita nińumba vita navadala vita navajyavo vita navahotsi va vene vita navana,–syoni vikusilekela paludeva lwa Nguluve, 30vwu valatetsaga nisitupile valupilila nkilunga kya pasi umu, valatetsage namumwa mulya nkilunga ikikwitsa valatsikwupilila nuvwumi vwa sikutsoni.

31Pwu umwene akigava navo avakitsigo navavili akavavula akata: Lola twitoga twibiha lino mu-Jelulsalemu, mwu tsilatsisilila tsoni itsivigilwe kuvańamalago pa ndi Ńamunu. 32Lola valampetsaga avapanzi, vwu valamelulaga valankinilaga valambehelaga namati, 33valantovaga nisonzo vita nukumbuda. Palitsuva lya datu pwu alatsukaga umwene. 34Avene vakalemwa ukutsimańa itsinge, vakavuta vatsivye, pange vapulike itsu atsovaga.

35Vwu ahegelye mu-Jeliko pwu akaganila numunu umbosu akatama paluvasu panzila akadova isya kudova. 36Vwu apulike unsindo gwa vanu pwu akavutsa akata: Kyu kiki? 37Vakambula vakata: Vi Jesu va mu-Nasaleti ilutiṅanya. 38Pwu umwene akamwilanga akata: Vi Jesu vi ńa-Ndaviti uvetsage nikisa kwane. 39Pwu avanu avalongwe mbulongolo vakantanila vakata: Nunala. Umwene pwu akongela sitso ukwilanga akata: Vi ńa-Ndaviti uvetsage nikisa kwane. 40Pwu UJesu akima akata: Mungege kunu. Vwu vitsile nave pwu akambutsa akata: 41Ndigehe nuve? Umwene akata: Vi nkuludeva ndale ndilolage! 42Pwu UJesu akata: Lolaga, lukuponitse lu lwidiko lwako. 43Pwu umwene akalola ṅani-ṅani vuvule. Pwu akanginya Unguluve. Voni avanu avalolaga navene vakanginya Unguluve.

Currently Selected:

Luka 18: Kinga

Highlight

Copy