Luka 1

1Ndivwene vagetsitse vongosu ukutupangila mwa kalata tsoni inongwa umwu tsakongine itsivonike ukwipela mwavwe umu, 2tsitsu vatulekye avakivaga va limeńu avalongwe ukutsivona namiho ga vene vwu tsitengula. 3Pwu nuńe ndisimanzitse tsoni, ndihumile natsu pavutengulilo. Pwu nditye ndikukuvigilaga nuve vi Tyopile vi ntwa jilweli, nditye tsikonganaga vuvule mundagilo, 4ulwakuva ndita nuve ugamańe vunnonu amameńu ugwu upulike ukuta vwu gali jilweli.

5Mańa upwu UHeloti avetsage nkuludeva nkilunga kya va-Juta pwu alekwo ujyunge unteketsi uva lukindi lwa vańa-Abija pambombo, ilitavwa lya mwene ale vi Sakalija. Undala va mwene ale vi mwana va Aloni pakivumbuko, ilitavwa lya mwene ale vi Elisabeti. 6Vale vagolosu vwu vavili kwa Nguluve vakakonga namundagilo tsa nkuludeva nambugolosu uvwu asimilitse jujwa, nalikava ilinge ilya kuvatsova itsinge. 7Mańa navale numwana ulwakuva Elisabeti ale ngumba. Napavugogolo vasike vwu vavili. 8Ulunge vwu ali pakumbombela itsa vuteketsi Unguluve pamatsuva ga lukindi lwa mwene, 9nduvwu lwale lwiho lwa vateketsi ulwa kutuṅilitsa, pwu akingila nkutuṅilitsa nńumba imbalatse jya nkuludeva. 10Mańa avene avanu ikipuga kyoni vakava munkwisaja panzi pakavalilo ka kutuṅilitsa. 11Pwu akambonekela unsuṅwa va nkuludeva, akavona imile kukitekelelo kya kutuṅilitsa kukivoko ikyandyo. 12Pwu akakeńemuka sitso USakalija vwu ambwene, lukambona nuludwado. 13Umwene unsuṅwa akata: Uladwadaga vi Sakalija, mańa Unguluve apulike tsitsu vwadovaga. Elisabeti undala vako alakuholela unswambo. Ilitavwa vi vwitse umpetsage ilya Johani. 14Alakupelelaga nukuhekela nukukela sitso. Navange vongosu valahekela vwu aholilwe. 15Mańa alava mbaha kumiho kunkuludeva, amasilu nisinge syoni isikungatsa umunu angave ańwe syu nalańwe isinge umwene. Umwene aladiga UMepo umbalatse mwitumbu mwa vańina. 16Alavakilivulaga kwa Nguluve kuntwa va vene va vongosu avanu mbańa-Isilaeli umu. 17Umwene alagendelaga namumepo jya Elija namumaka ga mwene vwu alongwe mbulongolo mwa Jujwa. Inumbula tsa vadadajavo alatsikilivulaga kuvana va vene, avikwila navene alavakilivulaga visagilage itsa vugolosu, nunkuludeva alangahilaga avanu avanogilwe ukumwupilila. 18Pwu USakalija akambutsa unsuṅwa akata: Tsu nditsimańage ndeti tsitsitsi? Mańa ndili ngogolo, namwene undala vango asike pavugogolo. 19Pwu akamwanda unsuṅwa akata: Uńe ndi Gabilyeli, ndi ndimile sikutsoni kumiho kwa Nguluve. Lino ndisuṅilwe kwave kukutsova nuve kukukuvula inongwa innonu tsitsitsi. 20Lola vwiva mye vuvule lino, nulamańe nukutsova ukutsisika kulitsuva lilyo tsilavonekelaga tsitsitsi ulwakuva ubelile amameńu gango ugwu ndikuvulile, ugwu galitsa jilweli palitsuva lya gene. 21Avene avanu vakampulikila USakalija. Vakadega vwu asuvalye nńumba imbalatse. 22Umwene vwu ihuma pwu vakavona nalumańili ukutsova navanu ilimeńu ilinge. Pwu vakammańila baho avene ukuta aluvwene uluvoneko lumbonekye nńumba imbalatse. Umwene akavavinga ki kivoko, akava kinunu vuvule. 23Pwu akavona gasilile amatsuva ga mbombo tsa mwene pwu akavuja kuvutsenge vwa mwene. 24Pwu vwu agonile pwu Elisabeti undala va mwene akava ńimali, akuva imyetsi gihano akata: 25Vwu agahile vuvule-vule unkuludeva palitsuva lya kundolela vwu amokile ukuhovelivwa kuvanu.

26Vwu gilutile imyetsi gihano mumwetsi gwa ntanato, pwu Unguluve akansuṅa unsuṅwa UGabilyeli nkilunga kya mu-Galilai mbutsenge umwu vita mu-Nasaleti ilitavwa. 27Akansuṅa kuminza ujyunge uvi andavye ungosi uvi ale vi Josepu ilitavwa umwana va Ndaviti pakivumbuko. Umwene uminza ilitavwa lya mwene ale vi Malija. 28Pwu unsuṅwa akingila umwu alemwo akata: Ndikukupembetsa vi ukavile uluhungu, unkuludeva ali nuve. 29Umwene vwu ambwene pwu ilimeńu lilili likampelela ukuginzamuka, akisagila akata: Lwu lupembetso luki lululu? 30Umwene unsuṅwa akambula akata: Uladwadaga vi Malija, mańa uluvwene uluhungu kwa Nguluve. 31Lola ulava ńimali, ulahola umwana undume, vi ulampetsaga ilitavwa ili Jesu. 32Vi alava mbaha, alatsovwa ukuva vi mwana va ju Nduti. Nakyene nikińalwangula kya vutwa kya dadaje nditsova ikya Ndaviti alampa Unguluve untwa. 33Alava nkuludeva va pakivumbuko kya Jakobu sikutsoni. Nuludeva lwa mwene nalulasile lusiku. 34Pwu UMalija akambutsa unsuṅwa akata: Tsu tsivetsage ndeti tsitsitsi vwu nandili nungosi ujyunge lusiku? 35Umwene unsuṅwa akanda akata: UMepo umbalatse alakwitsila namaka ga ju Nduti galakuswika. Pwu numbalatse uvi ulamola alatsovwa ukuva vi mwana va Nguluve. 36Lola nu-Elisabeti unnino namwene ṅimali numwana undume mbugogolo lino. Ugwene ugu gwu mwetsi gwa mwene gwa ntanato vwu ńimali, uvi vikuntsova uvugumba. 37Mańa nasikuli isinge isikundema Unguluve. 38Pwu UMalija akata: Lola ndili munu va nkuludeva, asipelage kwane isyu utsovile. Pwu unsuṅwa akavuka.

39Pwu UMalija akasisimuka ukubiha vwu nagonili sitso, akabiha nsidugala ṅani-ṅani, akatsisika mbutsenge uvunge vwa nkilunga kya va-Juta. 40Akatsikwingila nńumba jya Sakalija akampembetsa Elisabeti. 41Avwene lino Elisabeti vwu ipulika ulupembetso lwa Malija, pwu akavona umwana ikina mwitumbu mmwene. Pwu Elisabeti akadiga UMepo umbalatse, 42akilanga akata: Usajilwe uve uvalutile voni avadala avanino. Nsajivwa namwene numwana uvi uli nave mwitumbu mwave. 43Ndili nakiki uńe, ndi uvańina va nkuludeva vango ate itsage kwane? 44Lola upwu ndipulike ilimeńu lyako lya kumembetsa mumbulukutu tsango pwu ndivwene umwana mwitumbu mwane ikina. 45Va ndugataluko uvi idike vuvule ukuta tsitsage tsitsu ambulile unkuludeva. 46Pwu UMalija akata: Umwuja gwango gukumwimika unkuludeva, 47nuntima gwango guhekela kwa Nguluve vango, 48mańa andolile uvudebe ndi munu va mwene. Lola vitengulaga lino, vikunzovaga ulugataluko isivumbuko syoni sya vanu, 49mańa uńamaka amelye isivaha, nilitavwa lya mwene livalatse. 50Nakyene ikisa kya mwene pwukili nakusivumbuko sya sivumbuko mmbene avikundwada. 51Ikivoko kya mwene kipelile isya maka. Avańalwiginyo palwisagilo lwa munumbula tsa vene avahasitse. 52Avańamaka avisitse pasińalwangula sya vene sya vutwa. Avimike va vadebe. 53Avańanzala avasugye imote. Avamosu navapili kinu. 54Ikuntanga Isilaeli umwana va mwene, mańa ita ndikumbuhitsage ikisa, 55nduvwu atsovile navo avadada nu-Abulahamu nikivumbuko kya mwene sikutsoni. 56Umwene UMalija akagona imyetsi gidatu pa Elisabeti, pwu akakilivuka ukubiha kuvutsenge vwa mwene.

57Pwu Elisabeti ilitsuva lya mwene lya kumola umwana likitsa, Pwu akamola umwana undume. 58Pwu navabadiṅani va mwene navanine vakapulika ukuta unkuludeva andilye ikisa ki kyongosu, pwu vakatsihekela nave. 59Mańa vwu agonile amatsuva nnana, pwu vakatsikegeta umwana. Vakampa ilitavwa lya dadaje ili Sakalija. 60Umwene uvańina akabela akata: Bako, mumpetsage ili Johani. 61Avene vakata: Mańa nakuli ujyunge mbajińo uvalitavwa ili. 62Vakatinila udadaje vakata: Humbe ikutuvulaga jujwa ilyu anogilwe ukumpa umwana. 63Umwene akadova akaganga ka kuvigilapwo. Pwu akaviga akata: Vi Johani ilitavwa lya mwene. Pwu voni vakadega. 64Pwu nundomo gwa mwene gukadinduka ṅani-ṅani, Nululimi lwa mwene lukavopoka, akanginya Unguluve. 65Pwu uludwado lukavavona voni avabadiṅine nave ukutsenga. Inongwa itsi tsikapulikika mwoni nsidugala mwa Juta. 66Voni avapulikaga tsitsitsi vakatsivika munumbula vakata: Ndalipelaga ukuvanki umwana uju? Ulwakuva vavwene ukuva nakyo ikivoko kya Nguluve. 67Pwu USakalija udadaje akadiga UMepo umbalatse akalaga akata: 68Munginyage untwa Unguluve va Isilaeli, mańa avalolile avanu va mwene avapelye ukuvangwa. 69Atwimikye ulusuga ulwa kutupoka nńumba jya Ndaviti jya munu va mwene. 70Ulwu atsovyenani mundomo mbańamalago avalongotsi, 71ulwa kutupoka kuvatavangwa vitu nakukivoko kya vene avatusulile voni. 72Mańa umwene akata: Ndivalilile ikisa avadadajitu, akata ndikumbuhitsage ulwidiṅano ulwu vakidinana navene uluvalatse.

73Mańa akata ndikumbuhitsage ulujigo ulwu anjigye Abulahamu udadajitu twivoni, 74ulwu akata valapokwa kumavoko ga vatavangwa va vene uvwe, pwu vambombele uńe avatsilaludwado, 75avavalatse avagolosu vuvule kumiho kwane sikutsoni gyoni imyaka igya kuvakwo kuvwumi uvwe. 76Nuve vi mwana ulatsovwa ukuva vi namalago va ju Nduti ulwakuva ulanotsa inzila jya mwene. 77Avanu va mwene ulavapa uluhala ukuta vimańe ukuta vuvavangile uvusyikilo vwa nongwa tsa vene, 78ulwakuva kimbwene ikisa mwitumbu Unguluve vitu pwu itsile Umuma-kukyańa, 79uvakuvasosomokela avamuṅisi navambuswe uvakutugolohetsa panzila jya lunotsehetso amalunde gitu. 80Umwene umwana akakula akaduluka numwuja gwa ngati. Akava ndukungu sikutsoni ukutsisika upwu ivonesage kwa Isilaeli kunu.

Currently Selected:

Luka 1: Kinga

Highlight

Copy