Vapositili 3

1Palitsuva ilinge pwu nu-Petele nu-Johani vwu vavili vakatoga ukubiha mwa Tempeli pakavalilo ka kwisajila pakavalilo ka budikakupamato. 2Pwu vakaganila numunu uńavulema ukuhuma mwa vańina, vi vampimbile avanine. Vi sikutsoni vakatsikumbika pandyango gwa Tempeli ugwu vitambula pandyango unnonu, ukuta pwu adovage isya kudova kuvene avikwingila mwa Tempeli. 3Vwu avavwene nu-Petele nu-Johani vwu vali pakwingila mwa Tempeli pwu atye: Mumetsage isinge isya kudova. 4Umwene UPetele vwu vandolile vantsambukye nu-Johani pwu akatsova nave akata: Lola kunu. 5Pwu umwene alolile nuluhuvilo kuvene, ahuvye atye pange vikuma isinge. 6Pwu UPetele akambula akata: Nitsa pesa nitsa sahabu tsu nandili natso, mańa isyene isyu ndili nasyo syu ndikukupa: Sisimukaga mwitavwa lya Jesu Kilisiti uva mu-Nasaleti ugendage vuvule. 7Pwu akamwibata ikivoko ikyandyo akansisimula. Pwu amalunde nisibutsu sya mwene sikaduluka baho. 8Akatsumba ukusisimuka akima akagenda. Akingila navo mwa Tempeli akata nukugenda akata nukutsumba akanginya Unguluve. 9Voni avanu vakambona vwu igenda vwu ikunginya Unguluve. 10Vakammańa ukuta vi uvi atamilaga isya kidovano pandyango unnonu gwa Tempeli, lukavavona nuludwado nulukeńemuko mwitumbu pa itsi itsimbwene umwene.

11Lino vwu vavwene agimbile ukuva nu-Petele nu-Johani pwu voni avanu vakavańilila vwu vali nduhengo ulu vita lya Selomoni vakadega vuvule, 12Umwene UPetele vwu avavwene pwu akavavula avanu akata: Ńi vajitu, ńi vańa-Isilaeli uńe tsu mwidega kiki tsitsitsi? Uvwe mukutulola sitso kiki, mulinda mwita tumpelye ukugenda uvwe namaka gitu nukudwada-Unguluve kwitu uvwe? 13Bako Unguluve va Abulahamu nu-Isikaka nu-Jakobu, Unguluve va vadadajitu twivoni vi amwimike unkivaga va mwene UJesu uvi uńe mungegile kwa Pilate mukamendama kumiho kumwene vwu umwene ahigile atye mumbopolage. 14Lola uńe mukamendama umwene umbalatse ungolosu, mukandova ju mbudi. 15Umwene undongolela-nzila jya kuvwumi vi mukambuda. Mańa umwene Unguluve vi antsusitse mbaswe. Tsu tutsivwene uvwe. 16Namwene umunu uvi mukundola lino, uvi mummańile ńivoni, upwu adulwike lino, pwu lindulwise li litavwa lya mwene jujwa, lindulwise ndwidiko ulukulyidika ilitavwa lya mwene. Ena ndita lwu lwidiko ulwu apelile UJesu ulwu lumpye umunu uju uvudulusu uvwa mańa vwu mwilola ńivoni. 17Lola ńi vajitu, nuńe ndilumanile ukuta namutsivweni itsu mwavombaga, muli nda vavaha vińo uvwu navatsivweni navene. 18Umwene Unguluve vwu agahile vuvule-vule ukutsitotsa tsoni itsu atsitsovelage mundomo mbańamalago itsu atye: UKilisiti akuvilwagwa. 19Nkilivukage mbujage vuvule pwu ninongwa tsińo tsilasyikilivwa vuvule, 20pwu nagyene nimyaka gya kutsitsimilamwo gilitsaga gilahumaga kumiho kunkuludeva, pwu namwene nu-Kilisiti Jesu uvi mwidiṅine nuńe kakatale atye ndikunsuṅaga pwu alansunṅaga. 21Mańa ikya kukyańa kimwupililage tango, kisike nave pamyaka gya kwandisivwa upwu syoni silandisivwagwa nduvwu Unguluve atsovye katale mundomo mbańamalago va mwene sikutsoni. 22Mańa nu-Mose avavulile avadada akata: Unkuludeva Unguluve vitu alamwimika uńamalago ndune nambanino umu, vi ndampulika tsoni itsu ikuvavula. 23Pwu voni avanu uvwu navikumwidika uńamalago uju, pwu valajatsivwagwa nkivumbuko kya vene umu. 24Voni avańamalago ukuhuma napa-Samweli navakongile kumwene voni avalagaga, navene valitsovaga ilitsuva ili. 25Ńi vana va vańamalago uńe, ńi vana va lwidiṅano ulwu Unguluve vidiṅine nave avadadajińo upwu atsovaga nu-Abulahamu upwu atetsaga: Syoni isivumbuko silasajilwa mumbeju jyako. 26Unguluve vwu ansumwise unkivaga va mwene pwu akatengula ukunsuṅa kwańye ulwakuva atetsaga ndivasajage nulukilivuko ulwu avakilivulaga kuvuvivi vwińo uvwu mwale navwo.

Currently Selected:

Vapositili 3: Kinga

Highlight

Copy