Vapositili 2

1Vwu litsile ilitsuva lya Pentekositi (kukuta lya kumalihitsa imilevulo gihano) pwu vakalundamana paninye voni. 2Pwu vakakeńemuka ṅani-ṅani vuvule ulukuvililo luhumile kukyańa, lukava ndilikuluguta ilivaha. Ulukuvililo ulu lukadiga nńumba umwu valundamine. 3Pwu vakavona indimi itsivye uta tsa mwoto tsikigava tsikwima pakyańa pa voni mpamato-mpamato. 4Pwu voni akadiga UMepo umbalatse, vakatengula baho vakatsovela mundimi imya nduvwu avapye UMepo ukutsitsova tsoni. 5Valemwo mu-Jelusalemu mumwa ava-Juta avanu avandwadaga Unguluve avahumile nsivumbuko-nsivumbuko umwu syavelye isya pasi kuvutandatse. 6Vavwene ulukuvililo ulu lukwujila pwu vakalundamana avanu ikipuga kikyongosu. Pwu vakatimbulana ulwakuva vavwene vitsova munzovele jya vene uju jya mwene uju jya mwene. 7Voni vakakeńemuka mwitumbu vakadega vakavutsanya vakata: Lola voni avitsova apa navali va-Galilai vene? 8Ndeti upwu tupulika inzovele jitu uju jya mwene uju jya mwene umwu twavumbukye twivoni? 9Natwi va-Paliti natwi va-Meti natwi va-Elamiti natwi tutsengile mu-Mesopotamija namu-Jutai namu-Kapadokija namu-Ponti namu-Asija 10namu-Piligya namu-Pampilija namu-Egipiti nansi-lunga sya mu-Libya isyaganye nikya mu-Kilenenatwi va-Loma twi valelano natwi va-Juta vuvule natwi twingye mbu-Juta 11natwi va-Keleti natwi v-Alabu, twivoni twivona vikutsitsovela munzovele tsitu imbaha itsu avombile Unguluve. 12Voni vakakeńemuka mwitumbu vakahama vuvule vakavutsanya mpamato-mpamato voni vakata: Ino tsu tsivetsaga ndeti tsitsitsi? 13Avange vakaheka vuvule vakata: Vagalile amasilu amannonu. 14Pwu vakima nu-Petele navakitsigo nampamato. Umwene UPetele akatotsa ilimeńu lya mwene akavavula akata: Ńi vajitu, Ńi va-Juta nuńe ńivoni ńi mwigona mu-Jelusalemu umu, ukwi mutsimańage tsitsitsi, mupulihitsage vunnonu itsu ndikuvavula. 15Mańa pwu mujagile upwu mwita avanu ava vagalile. Mańa lino pwu pakavalilo ka datu vuvule. 16Bako tsitsitsi tsu itsu atsovaga UJoeli uńamalago upwu atetsaga: 17Vwu itsova vuvule-vule Unguluve ita: Mmatsuva ga kunepo pwu UMepo vango ndilavadudilaga avanu voni, pwu avaswambińo navalivińo valalagaga, pwu navalume vińo valalolaga imboneko, pwu navagosi vińo valagonaga amagona-sivi, 18navene navakivaga vango avagosi navakivaga vango avadala ndilavadudilaga UMepo vango mmatsuva aga, navene ukuta valagage. 19Pwu ndilapelaga nisipelwa kukyańa kuvutandatse nisidego pasi nkilunga nunkisa numwoto nilyosi iliheveluka ukuta lukungugu. 20Nilitsuva likilivukaga likipelaga ṅisi vuvule, numwetsi gukipelaga nkisa, vwu liva pakwitsa ilitsuva lya nkuludeva ilivaha ilidwadwa. 21Pwu voni avikisaja kulitavwa lya nkuludeva vwu viponaga. 22Ńi vajitu, ńi vańa-Isilaeli mupulikage itsu ndikuvavula. UJesu uva mu-Nasaleti umunu uvi Unguluve amwingitsaga mwańe umwu nimbombo tsa maka nisipelwa nisidego isyu Unguluve asipelelaga mumwene jujwa vwu mwilola nuńe ńi voni, nditsova sisyu nsimańile nuńe, 23vi uju ndita Unguluve akavapa uńe, mukantola nduvwu Unguluve isagilye ṅani katale, nduvwu ammańye ṅani umwene, mukantovelela pakidamiṅanye, mukambuda namavoko ga vatsilasimilitso tsa Nguluve. 24Vi uju antsusitse Unguluve ambopwe uluvavo lwa vuswe. Ulwakuva uvuswe navwale vwa kumwibata sikutsoni umwene. 25Nalyene nilya Ndaviti lilotsitse kumwene ilyu atye: Unkuludeva ndikumbona sikutsoni mbulongolo mwane, mańa ali kukivoko: kyango ikyandyo ukuta valangwisaga. 26Pwu jikahekela inumbula jyango, nalwene ululimi lwango lukalulutila. Ena nagwene numana gwango gulagataluka nduhuvilo. 27Mańa uvwumi vwango nulavuleke mbutsuka uve, ndi mbalatse vako nulidike ukuta ndikumańe ukuvola. 28Umbulile inzila jya vwumi, ulanditsa nuluhekelo mwitumbu kumiho kwave. 29Ńi vajitu, umwene untengutsi vitu UNdaviti, ukwi ndintsove vuvule ndilasihaga nitsinge, mańa umwene aswe vansilile, uvuguli vwa mwene tuli navwo apa nalino. 30Ulwakuva ale namalago ulwakuva alumańile ukuta Unguluve vidiṅine nave ulwidiṅano ulwakuta: Ijyinge imbeju mungongo mwave jilatamaga pakińalwangula kyako kya vutwa, 31pwu akalola mbulongolo akatsitsovela ṅani vwu tsikanale itsa kutsuka ju Kilisiti, akantsova jujwa upwu akata: Nandekili mbutsuka numana gwa mwene naguvumańili ukuvola. 32Vi ju Jesu uju uvi Unguluve antsusitse. Tsu tutsivwene uvwe twivoni. 33Lino upwu kintotsitse kukyańa ikivoko ikyandyo kya Nguluve, upwu upilye UMepo Umbalatse kwa dadaje nduvwu vidiṅine nave ulwidiṅano, pwu adudile ukwu mwilola nuńe ukwu mupulika. 34Mańa umwene UNdaviti natogili kukyańa mańa itsova jujwa ita: Unkuludeva atsovile kunkuludeva vango atye: Tama kukivoko kyango ikyandyo, 35ukasike ukwu avatavangwa vako ndikuvapelaga katamilo ka kuvika amalunde gako uve. 36Lino mummańage ńivoni ńi va nńumba jya Isilaeli jilweli ukuta UJesu uju, uvi muntovelye pakidamiṅanye Unguluve ampelile nkuludeva ampelile Kilisiti.

37Vwu vapulike tsitsitsi pwu inumbula tsa vene tsikatova, pwu vakavutsa kwa Petele nakuvapositili avange vakata: Ńi vajitu uńe tugahage ndeti? 38Pwu akavavula UPetele akata: Nkilivukage ńivoni mwotsivwagwe mwitavwa lya Jesu Kilisiti, mwu muvuvone uvusyikilo vwa nongwa tsińo, pwu mwupililage uvupi vwa Mepo Umbalatse. 39Mańa ulwidiṅano ulwu mwidiṅine Umwene lwińo juńe navana vińo lwa vene, navoni avakuvutale lwa vene, navoni uvwu ikuvilanga Unguluve unkuludeva vitu.

40Akagatsova nagange amameńu gamongosu naga kusimilitsa naga kuvahusanya akata: Ukwi mponage mbanu avavivi va lino ava. 41Voni avalyupililaga vunnonu ilimeńu lya mwene vwu vakotsivwa, pwu vakingila mumpelela ilitsuva ili lyene avanu vaelipu vadatu (3000). 42Vwu vakagimba inongwa itsu vavavulaga avapositili vakajujana sikutsoni umwu valundamanaga avakilisiti numwu vameńulanaga isivanda numwu visajaga ulwisajo.

43Voni umwu vavelye uludwado lukavavona mwitumbu. Ulwakuva avapositili vapelaga nisipelwa nisidego sisyongosu. 44Voni avidike vakava paninye syoni vakalilanila. 45Nisilunga nisyuma sya vene vakagutsa vakagavanya voni vakagelela mbugatsu vwa vene uju uvwa mwene uju uvwa mwene pakuvagavila. 46Namwa Tempeli vakalundamana sikutsoni amatsuva goni, vakava numbula mamato jyene, nakyene ikivanda vakameńulanya nńumba nńumba tsa vene umwu tsavelye, isinu vakalya avanumbula ingatalusu inzilakuva mwoni-mwoni. 47Sikutsoni vakanginya Unguluve, vakava vagane nakuvanu voni. Umwene unkuludeva sikutsoni akongeletsa ukuvingitsa mumpelela avidikaga ukupokivwa.

Currently Selected:

Vapositili 2: Kinga

Highlight

Copy