Vapositili 1

1Mundongotsi tsilya ndakuvigilaga vi Tyopile, mwu ndakuvigye tsoni itsu UJesu atengulaga ukuvomba nukuvavula inongwa avanu, 2ndikatsisika natso palitsuva ilyu atogelaga kukyańa vwu ahumile pakuvalagila mwa Mepo umbalatse avakongi va mwene uvwu avahalile katale. 3Nditsova uvwu ivonehetsagamwo umwumi vuvule vwu ahumile pakukuvilwa upwu avavonekelaga papongosu. Vwu vakalolana nave amatsuva imilevulo gini, akavavula nitsa ludeva lwa Nguluve. 4Vwu valundamine nave pwu akavalagila akata: Ndahumaga mu-Jelusalemu umu. Bako mwu mwitse mutsipulikilage mumu itsu udada mwidiṅine nuńe itsu mupulike nakwane. 5Mańa UJohani vi avotsaga namagasi avanu, lola uńe pasigye padebe pwu ndotsivwagwa mwa Mepo umbalatse.

6Avene vwu valundamine baho vwu vakambutsa vakata: Nkuludeva nda pwu ulamwimikilaga uludeva lwa mwene Isilaeli palitsuva lilyo? 7Umwene akanda akata: Nannogili uńe ukugumańa umwaka nukukamańa nakavalilo ukwu udada atye kwu ka maka gango ndimwene. 8Lola uńe ndupililaga amaka vwu avitsye UMepo umbalatse, pwu ndava vatsovanongwa tsango namu-Jelusalemu namu-Jutai namu-Samalija ndatsisikaga nabaho kisilye ikilunga. 9Vwu ahumile pakutsova ili, pwu akańagwa vwu vilola, ilivingo likatoga nave kumiho kuvene. 10Vwu vandungamye avene vwu ibiha kukyańa, pwu vakakeńemuka avanu vavili vimile upwu vale, vaswalile imisabwa imivalasu 11vita: Ńi vajitu, ńi va-Galilai uńe mwimile kiki, mulungamye kiki kukyańa? UJesu uju vi muvwene ińagwa kwańe, uvi itoga kukyańa lino vi alitsa lulwu mumbwene ukutoga kukyańa.

12Pwu vakasisimuka upwu vale pakidugala ikyu vatetsaga kya mono, vakakilivuka ukubiha mu-Jelusalemu. Ikyene ikidugala iki kyu kili mbwipi nu-Jelusalemu, kili pakajila ka kugendela pasabati. 13Vwu vavye pakusika pwu vakatoga kuńumba jya kukano umwu vavetsaga sikutsoni nu-Petele nu-Jakobu nu-Johani nu-Andileja nu-Pilipo nu-Toma nu-Balitolomai nu-Matai nu-Jakobu uńa-Alipai nu-Simoni umwipukulani nu-Juta uńa-Jakobu. 14Voni ava vakalundamana sikutsoni, vakava numbula mamato jyene pakwisaja. Navene navadala vakava baho nu-Malija uvańina va Jesu navalukololwe va Jesu.

15Pwu palitsuva ilinge akasisimuka UPetele akima pagati pavakongi avanine. Avene avanu avalundamine umwu vale pamilevulo kitsigo nimilevulo givili pakyańa (120). 16Pwu akatsova navo UPetele akata: Ńi vagosi, ńi vajitu uńe natsene tsale tsa kwitsa itsavigilwe itsu UMepo atsitsovelage nndomo mwa Ndaviti itsu antsovage UJuta uvi avalongolelaga mbulongolo avamwibataga UJesu. 17Mańa namwene ale njitu, namwene upilye iligavo lya mbombo tsitsitsi. 18Vi akavile akalunga nisihombivwa isyu vamombile pavugalagala vwa mwene, abye kubiluka kukyańa akabatsuka pagati napagati umana, vukadudika vwoni uvutumbu vwa mwene. 19Tsu tsikapulikika tsitsitsi mańa vatsimańile voni avatsengile mu-Jelusalemu umu, pwu akalunga kalya vakakapa ilya Hakelidama munzovele jya vene. Kwukuta: Kilunga kya nkisa. 20Mańa mwa kalata va ńimbo livigilwe ilyakuta: Uvutsenge vwa mwene upita vwipelage ukuva nsitu vuvule, nujyunge alatsengaga umu, ni lyakuta: Namumwa nambuloleli vwa mwene upita apyanilage ujyunge. 21Pwu avanu uvwu twavetsaga navo sikutsoni imyaka gyoni igyu UJesu unkuludeva atsungutilaga mwavwe umu, 22avatengwe upwu amwotsage UJohani avitsile ukusika palitsuva ilyu atogelage kukyańa vwu twilola twivoni, vwu upita tuhalage ujyunge vi ipelage ukuva njitu namwene ave va kuntsova UJesu ukuta atsukile jilweli.

23Pwu vakavahala vavili. Nu-Josepu uvi vatetsaga vi Balisaba uvi ale vi Jusiti ilitavwa ilinge nu-Matija. 24Pwu vakisaja vakata: Vi nkuludeva vi mańanumbula tsa voni, vwu vavili ava ulage uvi ummalile uve 25uva kupyanila pambombo tsitsitsi napavupositili uvwu ahumile UJuta upwu abihaga papakuva pa mwene jujwa. 26Pwu vakalagula, pwu uvwene uvulagutsi vukamwibata ju Matija. Pwu vakata va kuvalililwa luninye navakitsigo nampamato.

Currently Selected:

Vapositili 1: Kinga

Highlight

Copy