Johani 21

1Ulwambele UJesu akavuja akavavonekela avakongi va mwene pańanza Tibelya. Ukwene ukuvavonekela vwu akagaha vuvule-vule. 2Mańa nu-Simoni Petele nu-Toma, uvi vita vi ńavwehe, nu-Natanaeli va mu-Kana mu-Galilai navańa-Sebetai navange avakongi vavili vale paninye. 3Pwu USimoni Petele akavavula akata: Ndibiha kwilova isomba. Avanine vakata: Twibiha twivoni. Pwu vakalutila ṅani vakipaka mwiboti. Mańa ikilo iji navibate kinu. 4Pavusiku vwu vukye pwu vakavona UJesu imile pamwambo. Avene avakongi navalumańe ukuta vi Jesu. 5Pwu UJesu akavavutsa akata: Ńi vana pange pwutule utunge utwakulya? Avene vakabela vakata: Bako natuli natwo. 6Umwene akata: Ndahage ulwelo kukivoko ikyandyo kwiboti pwu mukutsivonaga. Vakalaha. Pwu vakalemwa ukukwegela ulwakuva tsale ńongosu isomba. 7Pwu unkongi uvi ale ngane kwa Jesu akambula UPetele akata: Vi vi nkuludeva. Umwene UPetele vwu apulike ukuta vi nkuludeva, pwu akaswala ikilundwa kya mwene ulwakuva ale vuvule akitaga muńanza. 8Avene avakongi avanine vwu vakagendela mwiboti ukubiha upwu ale, ulwakuva napale patale pamwambo, pale pamikono vamia vavili (200) vuvule, vakakwegela ulwelo lwa somba. 9Pwu vatogile pamwambo pwu vakavona umwoto gwa matsimya guvika, nisomba tsili pamwoto nisivanda baho. 10Pwu UJesu akavavula akata: Mugege utunge utusomba utwu mwibite lino. 11Pwu UPetele akingila mwiboti, akakwegela ulwelo pamwambo, vakavona tsidigile isomba tsimbaha tsene, vakavala imilevulo kitsigo nimilevulo gihano nidatu pakyańa (153). Napene nupwu tsale ńongosu vuvule-vule, napene vakavona ulwelo naludumwiki. 12Pwu UJesu akavavula akata: Mwitse lino mulavuke. Mańa avene avakongi nakuli ujyunge uvi akakiva ukumbutsa ukuta: Veve veni uve? Mańa vammańile ukuta vi vi Nkuludeva. 13Pwu UJesu akahegelela akatola ikivanda akavagavanya, nisomba vuvule-vule. 14Kwu kuva lwu lwa datu ulwu lwa kuvavonekela avakongi va mwene UJesu vwu atsukile mbaswe.

15Lola vwu valye isya pavusiku sisyo pwu UJesu akatsova nu-Simoni Petele akata: Simoni vi ńa-Johana uvalutile ava ukungana uńe? Umwene akanda akata: Ena Nkuludeva, mańa umańile najyuve ukuta tumańine. Pwu umwene akambula akata: Sugilaga utwana twango twa ṅolo. 16Akavuja ulwa vili akata: Simoni vi ńa-Johana unganile une? Umwene akanda akata: Ena nkuludeva, mańa ummańile ukuta tumańine. Pwu umwene akata: Dimaga iṅolo tsango. 17Akavuja akatsova ulwa datu akata: Simoni vi ńa-Johana tumańine nuńe? Pwu UPetele akasusuvala vwu ivutsa ulwa datu ulwakuta: Tumańine nune, pwu akata: Nkuludeva usimańile syoni, umbwene nuńe ukuta tumańine nuve. Pwu umwene UJesu akata: Sugilaga utukolo twango. 18Jilweli-lweli ndikukuvula ndita: Upwu vwale ndebe pwu ukikunga vimwene unkova gwako nkivino ukagenda mwoni umwu ukanogwa vimwene, lungave lusiku vwu ugosipe, pwu ulatungutsima vuvule amatungutsimo, pwu akukunge unkova ujyunge nkivino, pwu ikukukwegela ukwu nunogilwi uve. 19Tsitsitsi tsu atsovaga itsa kuhwanihitsa uvuswe uvwu alanginihitsa Unguluve umwene. Lola vwu atsovile ili pwu akata: Ṅongage.

20Umwene UPetele vwu ilola mumbele, pwu akambona unkongi uvi ale ngane kwa Jesu, uvi napene napasinu sya kumihe silya vabadiṅine nave UJesu pakulya, uvi atamile kukivoko kya mwene ikyandyo, uvi ambutsaga UJesu atetsage: Nkuludeva vi veni uvi ikukuhendama? 21Vwu ambwene UPetele uju, pwu akambutsa UJesu akata: Nkuludeva uju ibihaku? 22Umwene UJesu akanda akata: Apene pwu ndingave ndinogilwe ukuta nditse ndimbone vwu ndivujile nditsile pwu kiki uve? Uṅongage vuvule uve. 23Pwu likatupukila baho ilimeńu likabiha namba-Kilisiti avajitu ilyakuta: Unkongi uju niswa. Mańa umwene UJesu natili niswa, bako atsovile lilyakuta: Apene pwu ndingave ndinogilwe ukuta nditse ndimbone vwu ndivujile nditsile pwu kiki uve?

24Unkongi uju vi uvi atye nukusimilitsa tsitsitsi atye nukutsiviga. Uvwe tulumańile ukuta ulusimilitso lwa mwene lwa jilweli. 25Pwutsile tsisigye nitsinge ńongosu itsu avombaga UJesu. Tsu tsingave tsatye tsivigivwagwe tsoni uńe ndita avakalata avavigivwagwa pwu-pajagile nkilunga umu apakuvavika.

Currently Selected:

Johani 21: Kinga

Highlight

Copy