Vapositili 4

1Vwu vali pakutsova navanu vuvule-vule, pwu vakahegelela kuvene avateketsi nundolela-Tempeli navasatukai. 2Vwu guvipile itsu vavonaga vikuvavula inongwa avanu nitsu vavavulaga vatetsaga nuvwe tutsukaga mbaswe ulwakuva atsukile UJesu. 3Pwu vakavibata vakavadindila nńumba jya vanńololo vakata tutsimalaga pavusiku. Ulwakuva valivwene lisike ilya kimihe. 4Mańa avene avapulikaga inongwa itsu vatsovaga vakidika vongosu, pwu umpelela gukakula gukasika pavaelipu vahano (5000) ukuvala vene avagosi.

5Lino vwu vukye pavusiku pwu vakalundamana mu-Jelusalemu mumwa navavaha navańivaha avenekivumbuko navamańakalata, 6nu-Hanasi unteketsi umbaha nu-Kajipa nu-Johani nu-Alekandeli voni vuvule navanine va nteketsi umbaha. 7Vwu vavavikile pagati pwu vakavavutsa vakata: Tsoni itsu muvomba tsu muvombela mmaka gani, muvombela mwitavwa lyani? 8Pwu UPetele akadiga UMepo umbalatse akavavula akata: Ńi vavaha mbańa-Isilaeli umwu nuńe ńi vańivaha ńi avenekivumbuko, 9lola mukutuhiga ilelo iji imbombo innonu itsu tumbombye untamu uju, mukutuvutsa mwita: Kimponitse kiki jujwa? 10Pwu ndikuvavula ńivoni uńe, ndikuvavula voni avankivumbuko kya vańa-Isilaeli kyoni ndita: Umunu uju upwu muvwene imile baha undulusu vuvule aponile mwitavwa lya Jesu Kilisiti uva mu-Nasaleti uvi uńe muntovelye pakidamiṅanye uvi Unguluve akantsusa mbaswe. 11UJesu Kilisiti uju lyu liganga ilyu uńe ńi vatsengańumba mwalitagile, ilyipelile ukuva ntwe gwa nguto. 12Nakuli ujyunge uva kutupoka, natupevilwi ilitavwa ilinge twi vanu kunzi kuvutandatse kunu ilya kuponelamwo uvwe.

13Avalulundamano vwu vavavwene nu-Petele nu-Johani ukutsova vuvule kitadwada, vwu vapulike ukuta navakalata navamańisivwi vanu vuvule kwa kalata pwu vakadega, vakakumbuhitsa vwu ava vali nave UJesu. 14Vwu vambwene namwene umunu uvi aponile, pwu tsikajaga itsa kutsova avene. 15Pwu vakavahumya umwu vatsovelaga inongwa, vakavutsanya avene vwu vijyekye 16vakata: Tugahe ndeti navanu ava? Mańa voni avatsengile mu-Jelusalemu umu vavavwene ukuta vapelile ikidego kya pavuvalasu, nuvwe nujyunge nibela, mańa nuvwe tukivwene. 17Mańa inongwa itsi tsilahambaga mwoni mbanu, pwu tusingage tutetsage: Ilitavwa ili ndambulaga nujyunge umunu. 18Pwu vakavuja vakavingitsa vakavabetsa vakata: Mbandikage ndalitsovaga nakukunge ilitavwa lya Jesu nukuvavula inongwa tsa litavwa ili avanu kwu bako.

19Avene lola UPetele nu-Johani vakanda vakata: Nda tsivetsage tsu nnonu kwa Nguluve tungave tupulika kwańe tungave tukundeka umwene Unguluve ukupulika kumwene? Muhigage uńe. 20Mańa uvwe natulumańili ukusiha itsu tutsivwene nitsu tupulike. Tukutsitsova vuvule pavuvalasu. 21Avene vakongeletsa ukuta mbandikage, pwu vakavavopola. Ulwakuva vavwene tsijagile itsa kwimapwo pakuvavungila, ulwakuva vavadwadaga avanu. Avene lola vwu vakanginya Unguluve pitsu avapelye. 22Mańa umwene umunu uvi kyapelilwe ikidego kya kupona imyaka gya mwene gilutile napamilevulo gini (40).

23Vwu vavavopwe pwu avene vakatsikuvavula avajyavo tsoni itsu avateketsi avavaha navańivaha avenekivumbuko vatsovile navwo. 24Avene vwu vapulike tsitsitsi pwu vakatotsa ilimeńu lya vene paninye vakisaja kwa Nguluve vakata: Vi Mwenesyoni vi upelile utye nikya kukyańa utye nikya pasi utye nińanza utye nisili mumwa syoni, 25vi vwatsovye nandomo munkivaga vako UNdaviti udadajitu twivoni ukata: Vaswanganyaga kiki avapanzi? Nisivumbuko sya vanu sikisagilaga kiki itsili vuvule? 26Avakuludeva va nkilunga vimile, navavaha valundamine paninye vamambukye nunkuludeva naju Kilisiti va mwene. 27Mańa jilweli mbutsenge umwu valundamine pa Jesu unkivaga vako umbalatse, uvi umbakile uve, valundamine voni vuvule vatye nu-Heloti nu-Ponti Pilate navapanzi nisivumbuko syoni sya vańa-Isilaeli, 28vitsile kuvomba tsoni itsu ikivoko kyako kyatye ndivombaga, tsoni itsu vwisagye ṅani uve paluhala lwako itsu vwatye tsikwitsaga. 29Lino vi nkuludeva ulolage ulusingo lwa vene ulwu visinga, avakivaga vako voni uvapetsage amaka ukuta ilimeńu valitsovage kitadwada. 30Nikivoko kyako ugolosage kivaponyage avanu, nasyene isipelwa nisidego upelelage mwitavwa lya Jesu unswambo umbalatse. 31Vavwene visajile vuvule-vule, pwu pakalindima upwu valundamine. Voni akadiga UMepo umbalatse, vakatsitsova inongwa tsa Nguluve kitadwada.

32Voni umwu vavelye avidike vwu vakava numbula mamato jyene, vakava mwuja mpamato gwene vuvule. Napave ujyunge uvi atye kyango ndimwene ikyuma kya mwene, bako vakalilanila syoni. 33Navene avapositili vakatsitsova namaka amavaha, vakasimilitsa itsa kutsuka unkuludeva UJesu, nuvugane vwoni vukavavona. 34Nave ujyunge ungatsu ulwakuva voni avale nisilunga, navale nińumba vwu vakagutsa nindalama tsa ligutsi vakatsigega, 35vakatsivika kumalunde kuvapositili. Vwu vakavagavanya voni vakalolela umwu valilaga voni uju isya mwene uju isya mwene, mwu vakavapela.

36Mańa UJosepu uvi avapositili vampye ilya Balinaba, kukuta vi Mwaluhuvilo, uńa-Levi, uvi aholilwe nu-Kipeli, 37vi avetsaga nikilunga kya mwene, kyu akagutsa indalama akatsivika kumalunde kuvapostili.

Currently Selected:

Vapositili 4: Kinga

Highlight

Copy