Vapositili 15

1Pwu avange vakahuma mu-Jelusalemu vakikilila ukubiha mu-Antyokija, vakatsimańisa itsinge avakongi vakata: Ngave namukegetwa nduvwu alagye ulwiho UMose, pwu namupokivwagwa. 2Pwu tsu tsikapela ukulundukana avampelela umu, lukavoneka nulukani lwu lwongosu ulwa kukaṅinana nu-Pauli nu-Balinaba. Pwu vakavatavula nu-Pauli nu-Balinaba navange avajavo vakata ntogage mbihage mu-Jelusalemu nkavutse navapositili nakuvavaha avenempelela ulukani ulu. 3Pwu umpelela gukavadomelela. Vakagenda ija mu-Penike namu-Samalija vakavapangila avakilisiti avajiavo itsa lukilivuko lwa vapanzi vakata vatye vatye ukukilivuka. Pwu tsu tsikavapelela ukuhekela sitso voni avakilisiti. 4Vwu vatsisike mu-Jelulsalemu, pwu gukavupilila vunnonu umpelela navapositili navavaha avenempelela voni. 5Pwu vakima avange ava kapelela ka vapalisai avipelile ukuva vakilisiti navene. Vwu vakata: Upita vakegetwagwe, tsoni isimilitso tsa Mose upita tuvavule vatsikongage.

6Pwu navapositili navavaha avenempelela vakalundamana ululundamano vakata tutsidumule inongwa itsi. 7Umwene UPetele vwu avwene vakaniṅineno valindileno, pwu akima akavavula akata: Ńi valugosi ńi vajitu, nuńe ńivoni ndumańile ukuta katale Unguluve umwu tuvelye twivoni, pwu ihalye ukuta avapanzi guvagegelage undomo gwango nilimeńu lya nongwa innonu ili nulwidiko. 8Pwu Unguluve umańanumbula akavidikila navene akavapa UMepo Umbalatse nduvwu atupye nuvwe. 9Umwene vwu avavalitse lwu lwidiko inumbula tsa vene, pwu umwene natsikuli itsakuta nuvwe tuliponu navene valya vali ponu, bako umwene tuliṅine vuvule kumwene. 10Lino pwu mukungela kiki Unguluve upwu mwita tuvavike ikivegalilo iki pamavega avakongi vwu kyavalemile avatengutsi vitu vwu nuvwe kitulemile vuvule? 11Bako mańa nuvwe tuli ndavalya, nuvwe tuhuvila ukuponela munduhungu lwa nkuludeva UJesu.

12Pwu voni umwu vavelye vakava mye vuvule, vakatega imbulukutu vwu nu-Balinaba nu-Pauli vikuvavula nisipelwa nisidego isivaha isyu Unguluve avapelelaga avapanzi mmavoko ga vene. 13Vwu vamalile ukutsova, pwu akatsanda UJakobu akata: Ńi valugosi, ńi vajitu ukwi ndivavule une: 14USimoni atuvulile itsatengwe upwu Unguluve avalolage navapanzi upwu atetsaga nditolelage avange ukuva vanu va litavwa lyango. 15Nagene amameńu ga vańamalago gagendile baho upwu vita: 16Ulwambele nditsivujaga nditsikwitsaga pwu nditsikujitsengaga ińumba jya Ndaviti ijipangwike, namakakala ga jyene nditsivujaga ukugatsenga ndikujitsusaga. 17Voni avanu avasigye ukuta vandondage unkuludeva, nditsova voni avapanzi, mańa navene vatsovwagwe ukuva vanu vango. 18Vwu iva unkuludeva upwu ipela tsoni tsitsitsi, uvi tsoni atsimańye ṅani sikutsoni kakatale. 19Pwu uńe upwu ndikisagila pwu ndita: Tulongeletsaga ukuvapelela uvutsito uvunge avajitu avihuma mbapanzi avikilivukila kwa Nguluve. 20Bako tuvavigilage kalata tutetsage: Mbandikage ndilamyaga namanguluve nuvuligu nińama ijyu vadodile pansingo nugwalonda. 21Mańa UMose atengwe kakatale pwuvale avikuntsova mbutsenge vwoni upwu sikutsoni pasabati kalata va mwene itsovwa nńumba tsa kwisajilamwo.

22Pwu voni avapositili navavaha avenempelela numpelela gwoni vakata: Ukwi tusuṅage avanu avihuma mwavwe umu avibiha nu-Pauli nu-Balinaba mu-Antyokija. Pwu vakavahala vakata nu-Juta uvivatetsaga vi Balisaba ilitavwa ilinge vakata nu-Sila. Ulwakuva vwu vali vavaha mumpelela umu. 23Pwu vakavapa kalata mmavoko. Vakaviga vakata: Uvwe twi vapositili natwi vavaha twi venempelela natwi vakilisiti twi vajińo tukuvapembetsa ńi vakilisiti ńi vajitu ńi muhumile mbapanzi ṅani va mu-Antyokija ṅani va mu-Silija ṅani va mu-Kilikija. 24Mańa tupulike ukuta avange avajitu avahumile kwavwe kunu vitsile kwańe ukwa, vavakeńemwise uńe namameńu ga vene, vavapelye nukwisagila munumbula tsińo. Lola ndatetsaga twavasuṅile uvwe. 25Pwu uvwe twidiṅine twivoni apa tutye upita tuvahalage avange avajitu tuvasuṅage vagendage nu-Balinaba nu-Pauli uvwu tumańine sitso navo, 26uvwu navwene uvwumi vwa vene vavutagye pitavwa lya nkuludeva vitu UJesu Kilisiti. 27Pwu tuvasuṅye uńe vwu vavili nu-Juta nu-Sila. Vwu vikuvavulaga nundomo itsu twiviga napakalata apa itsu twita. 28UMepo Umbalatse nuvwe twidiṅine tutye natukuvongelehetsa nuvunge uvutsito. Tutye tukuvalagilaga tsene itsu upita twivoni tuvombage tutetsage: 29Ntsilekage inekelo tsa manguluve, nguleke nugwalonda, njilekage ińama ijyu vadodile pansingo, mbuleke nuvuligu. Syu ngave nsilekile sisisi vwu nnotsitse. Nkagonage.

30Pwu vakavatavula avanu ava. Avene vakagenda vakatsisika mu-Antyokija. Pwu vakavalundamanya voni vakavapa kalata uju. 31Avene vwu valolile pwu vakahekela ulwakuva vavonaga kalata uju avahuvitse. 32Pwu nu-Juta nu-Sila vakatsova mongosu amameńu naga kuvahuvitsa naga kuvadulusa avakilisiti avajyavo, ulwakuva navene vale vańamalago. 33Vwu vagonile pwu avakilisiti avajyavo vakavatavula vakata: Mbihage nulunotsehetso. Pwu avene vakatsisika kuvene avavasuṅile. 34Umwene Usila lola vi akavuja. 35Avene nu-Pauli nu-Balinaba vwu vakagona mu-Antyokija. Vakata nukuvamańisa avanu vakata nukuvavula inongwa innonu tsa nkuludeva, tsu vakavomba navajyavo avange avongosu.

36Vwu vagonile amatsuva pwu UPauli akatsova nu-Balinaba akata: Tsukwa tuvuje tuvalole avajitu vwu vagonile mwoni mbutsenge umwu twavavulile inongwa tsa nkuludeva. 37Umwene UBalinaba akata twibiha nave UJohani uvi vatetsaga vi Malika ilitavwa ilinge. 38Umwene UPauli akabela akata: Umumi uvi akimbye mu-Pampilija, uvi abelile ukubiha nuvwe kumbombo tsitu, vi nanogili ukubiha nuvwe. 39Pwu vakalundukana vakadadalukana. UBalinaba akantola UMalika, vakipaka mungalava vakabiha mu-Kipeli. 40Umwene UPauli akammala USila akabiha nave vwu avakilisiti avanine vandagilye nduhungu lwa Nguluve. 41Pwu akamala kyoni nikya mu-Silija nikya mu-Kilikija akagidulusa imipelela.

Currently Selected:

Vapositili 15: Kinga

Highlight

Copy