Vapositili 16

1Akatsisika namu-Ndelibe namu-Lisitila mwu akambona ujyunge unkongi uvi ale vi Timoti ilitavwa, uvi uvańina ale n-Juta ale nkilisiti, udadaje ale n-Giliki, 2Vi avakilisiti va mu-Lisitila nava mu-Ikoni vakantsova uvunnonu. 3Umwene UPauli akata ndikuntola ndibihaga nave. Pwu akankegeta ulwakuva avwene ava-Juta vongosu mwoni umwu vagendaga. Ulwakuva voni vammańile udadaje ukuta ale n-Giliki. 4Vwu vitsungutila uvutsenge vwoni pwu vakavalagila ilyakuta: Mutsikongage isimilitso itsu vasimilitse avapositili navavaha avenempelela mu-Jelusalemu. 5Pwu imipelela gikaduluka ndwidiko nukulandala gikalandala amatsuva goni.

6Pwu vakagenda namu-Piligija nankilunga kya va-Galati ulwakuva UMepo Umbalatse avakilivwe vwuvita tutsitsove inongwa namu-Asija. 7Vwu vatsisike mu-Misija pwu vakagetsa vakata tulute tubihe namu-Bitinija. Pwu vakavona UMepo va Jesu ikuvakilivula. 8Pwu vakagenda pampaka pakilunga kya mu-Misija, vakika ukubiha mu-Tiloja. 9Pwu UPauli uluvoneko lukambonekela pakilo. Akambona umunu va mu-Maketonija imile baha, itekelesa kumwene ita: Ungalovokaga vwitsage namwavwe mu-Maketonija ututange nuvwe inongwa. 10Vwu aluvwene uluvoneko ulu, pwu tukalonda ukubiha mu-Maketonija, tulumańile ukuta atwilangile Unguluve ukuta tuvavule inongwa innonu.

11Pwu tukipaka mungalava mu-Tiloja tukagoloka vuvule tukatsisika mu-Samotilake, Nda kilavo tukatsisika mu-Nyapoli. 12Tukahuma baho tukatsisika mu-Pilipi. Nduvasu ulu lwa kilunga kya va-Maketonija vwu vuvaha uvutsenge uvu. Lyu ilikolonija (lya va-Loma). Mwu tukagona uvwe. 13Pwu palitsuva lya sabati pwu tukahuma mbutsenge tukabiha palugasi. Ulwakuva tukata pwu tukuvavona pakwisaja. Pwu tukatsitama tukavavula avadala avalundamanaga baha. 14Pwu ujyunge undala, uvi andwadaga Unguluve uve ale vi Litija ilitavwa, uvi ahumile mbutsenge vwa va Tyatili, uvi ali niliduka lya misabwa imiduṅu, vi akapulihitsa namwene. Pwu Unguluve akandindula inumbula akatsisagila itsu atsovaga UPauli. 15Pwu vwu votsivwe voni najujwa nava nńumba jya mwene voni, pwu akatekelesa kwavwe akata: Ngave mumbwene jilweli ukumwidika unkuludeva une, pwu mungwilage nńumba jyango umu nkagonage. Akatwumilitsa sitso.

16Pitsuva ilinge vwu twibiha nkwisaja, pwu tukaganila numinza ujyunge uvi ali nilipepo lya malago, uvi akavakavila ikyuma kyongosu sitso avenenave nuvulagutsi vwa mwene. 17Vi akatukonga nuvwe nu-Pauli akilanga akata: Avanu ava vwu vakivaga va Nguluve unduti, vwu vikuvavula inzila jya kuvupoki. 18Vwu akagaha vuvule-vule amatsuva mongosu. Tsu gukavipa UPauli pwu akankilivukila akatsova nilipepo ili akata: Ndikukulagila mwitavwa lya Jesu Kilisiti ndita humaga mmwene. Pwu likahuma baho.

19Lino avenenave vwu vavwene kahumile ukwu vahuvilaga ukukavilamwo, pwu vakavibata nu-Pauli nu-Sila vakavakwegela paluvanza uluvaha upwu valepwo avavaha va vene. 20Vakavagega kuvenevutsenge vakata: Avanu ava vikilivulanya uvutsenge vwitu uvu ulwakuva va-Juta. 21Visimilitsa ińiho itsu twi va-Loma mwiko ukutsyupilila nukutsikonga. 22Pwu avanu ikipuga kyoni vakavahambukila. Pwu avenevutsenge vakavasula imisabwa vakata mbatove nisikoti. 23Vakavatova isikoti syongosu, pwu vakatsikuvadindila nńumba jya vańololo, vakandagila undolelańumba jya vakunge vakata: Uvalolage sitso valakimbilaga. 24Umwene vwu apulike ululagilo ulu, pwu akavavika nńumba jya ngati sitso nńumba jya vańololo, namalunde ga vene akingitsa nkipindo.

25Pakilo pagati pwu nu-Pauli nu-Sila vakisaja vakanginya Unguluve nińimbo. Voni avakunge vakapulika. 26Pwu kukitsila ṅani ukulindima ikilunga ukuvaha. Pwu nalwene ulwalo lwa ńumba jya vańololo lukahusanika, ninzitsi tsoni tsikadinduka ṅani-ṅani nimińololo gya voni gikalagala pasi. 27Pwu umwene undolelańumba jya vakunge akasisimuka. Lino vwu avwene inzitsi tsa ńumba jya vańololo tsidindwike, pwu akaswekula ulwuvo lwa mwene ukuta ihomage ulwakuva atye avakungwa vakimbye. 28Pwu UPauli akilanga ilimeńu ilivaha akata: ulibudaga mańa twivoni mwutuli umu. 29Pwu umwene akadova ililangamuli. Pwu akatsumba ukwingila, akatetema akitaga mmalunde ga Pauli nu-Sila. 30Akavahumya panzi akata: Ńi vatwa ndivombe kiki ikya kumelela ukuta ndipone nune? 31Avene vakata: Umwidikage UJesu Kilisiti unkuludeva pwu ndapona ńivoni nuve navanńumba jyako voni. 32Pwu vakambula inongwa tsa nkuludeva, vakavavula voni avali nńumba jya mwene. 33Pwu akavatola pakilo baho, akavaganza isikoti sya vene, pwu vakotsivwa najujwa navanu va mwene voni. 34Pwu akabiha navo nńumba jya mwene mwu akavipulila isinu. Pwu vakahekela sitso najujwa navanu va mwene voni, ulwakuva vavwene amwidike Unguluve.

35Vwu vukye pavusiku pwu avenevutsenge avavaha vakavasuṅa avakivaga va vene vakata: Nkatetsage uvavopole avanu avo. 36Pwu undolelańumba jya vakunge akambula UPauli amameńu aga akata: Avenevutsenge avavaha vansuṅye undomo gwa kuta uvavopole. Muhumage lino mbihage nulunotsehetso. 37Umwene UPauli akabela akata: Navatudwadili twi va-Loma, vatutovile pavuvalasu vwu navatuhigili. Vatudindye nanńumba jya vańololo umu. Lino pwu vilonda ukutuhumya kuvutitu. Bako valeke vitsage apa vatuhumyage avene. 38Pwu avakivaga va vene vakatsikuvavula avenevutsenge avavaha amameńu aga. Pwu avene vakadwada vwu vapulike ukuta va-Loma. 39Pwu vakabiha upwu vale, vakatsiku-vatekelesa vakavahumya vakadova kuvene vakata: Muhumage mbutsenge umu. 40Pwu avene vakahuma nńumba jya vańololo vakabiha mu-Litija. Vakavalola avakilisiti avajavo vakavadulusa pwu vakavuka.

Currently Selected:

Vapositili 16: Kinga

Highlight

Copy