ZEKARIA 8
8
Yerusalemu yechiwase mṟi fo ofoṟo
1Idedo lya Mndumii Menyi Matorito likanjichea, lyekamba, 2“Mndumii menyi Matorito nahamba adi, Inyi njiwode wunenyi kipfa kya Sioni, wunenyi wung'anyi kipfa kyake na nyashi ing'anyi. 3Mndumii nahamba, njilewuya Sioni na wulalu njechikaa makidi hawi ha Yerusalemu; na Yerusalemu yechilaho mṟi fo lohi, fumvu lya Mndumii menyi Matorito, fumvu yele. 4Mndumii menyi Matorito nahamba, Wameeku na wakeku wechikaa ipfo njienyi tsa Yerusalemu orio umu owo awode ndichi kipfa nyi ai mku mnu. 5Njia tsose tsechiichuo wana wa waka na wana wa womi wechitema ipfo njienyi.” 6Mndumii menyi Matorito nahamba, “Ma chando idedo lyi lyilyiumu na ilyimanya ko wandu wa watsuhee ngesa lyiweuma na koko daa? 7Mndumii nahamba adi, ambuya njechikiṟa wandu wako njiwokia ora lo ngamenyi mṟasa ora lo kiukanyi, 8na inyi nyi njechiwaende, njiwadamiṟe Yerusalemu; wo wechiwa wandu wako na inyi njechiwa Ruwa owo kiidi kya wulohi na wusumhanyi.”
9Mndumii menyi Matorito nahamba adi, “Mawoko hanu hakarie, nyo mukeri iadanyia madedo ha waikimbi maheri-ha, walya waweipfo kiheri walesuma otende lo mba ii ya Mndumii menyi Matorito, hekalu lyi kundu lyiwiko. 10Kipfa kuwewode osaṟe ko mndu, ma shuuma-pfo, ma kuwewode ofoṟo ko ulya aipfo ma mochapfo kipfa kya mkituwa; na inyi ngasehia orio mndu naloyane na wamṟasa oke. 11Kyaindi wulalu njechikaa se ko iwa watsuhee sepfo chandu mbei ilyi mbooko, nyi Mndumii menyi Matorito ahamba. 12Kipfa kochiwada mbeu ya ofoṟo; msabibu fochiwika ndunda, na wanda iweṟaa, ruwehu kuoloke ṟauṟa; na inyi njechiinenga wandu wa watsuhee shose shiwe kyooṟa kyawo. 13Numa kechiwa, chando muwekeri oseso kiidi kya wandu wa mkambo, Iyo mba ya Yuda na mba ya Israeli, nyi wudo njechikiṟa, nanyo mochiwa mboṟa; mulaowuo, tumhaṟenyi mawoko hanu.” 14Kipfa Mndumii menyi Matorito nahamba, “Chando mbeṟeheṟiye imuwutya mawicho, kiheri wandeanu walenjidosa nyashi ma njilesumukiapfo, Mndumii ahamba, 15nyi wudo njiṟeheṟiye maheri ha njiwutie Yerusalemu mecha na mba ya Yuda naawo, mulaowuo. 16 Ishi nsho mochiwuta; orio mndu na odoye wawiane lohi; anduonyi lohi mwaanduye fo ofoṟo ipfo kanyi konu; 17Kulawono mndu o konu kechikusaṟa mawicho mrimenyi foke kipfa kya manomae; ma mulalye nyamu tsa wongo; kipfa isho shose njishisuo inyi Mndumii.”
18Idedo lya Mndumii menyi Matorito lyikanjichease lyehamba, 19“Ikuotoya lya meeri fo kaana na ikuotoya lya meeri fo katanu, na ikuotoya lya meeri fo mfungade, na ikuotoya lya meeri fo ikumi lyewa sia na ikesa, nyi mkonu mnene yefuda ko mba ya Yuda; wulalu kundenyi lohi na ofoṟo.” 20Mndumii menyi matorito nahamba, “Kushike kiheri wandu wa mkambo na wa mṟi ifoi wache na kunu, 21wenyi mṟi wawecha ikusanza wahambe, luhende owinyi loidicha luterewe isaṟya lya Mndumii; na inyi njechihenda. 22Wandu wa njoshari tsifoi tsa wandu waapfinya wechicha Yerusalemu washihe Mndumii menyi Matorito, na iterewa isaṟiya lya Mndumii.” 23Mndumii menyi Matorito nahamba adi, “Mkonu yo wandu ikumi, wa shishomo shose sha wandu, wechiwada omambo lo nguwo ya Myuda, wechiwada wehamba, Lochihenda hamu nanyo, kipfa loicho ke Ruwa nai nanyo.”
Currently Selected:
ZEKARIA 8: KIM2
Highlight
Share
Copy
Want to have your highlights saved across all your devices? Sign up or sign in
Kimochi Bible © Bible Society of Tanzania, 2016.
