MATAYO 9
9
1Naho kadoya alya ngalawenyi kaambada kacha na mṟinyi koke. 2Nao keambuya wakacha meendye mndu a muumu shiwungo a mlaṟe kitaṟenyi Na Yesu ambona kiidikyo kyawo kawia mndu ulya a muumu shiwungo, “Kewuyo nyi moo mana oko, madeko hapfo nyi hamewuto-ho.” 3Naho kudi walosha wa wuwawaso walya maata wakadeda na mrima yawo wehamba, “Ichu nyi aruma Ruwa!” 4Naho ili Yesu kewona mahio hawo kawawia, “Nyi kyaki muihia kiwicho mrimenyi konu? 5Kipfa iki kii kyangu ihamba nyi kihya, ngesa nyi ihamba, ‘Madeko hapfo hamewuto-ho,’ anu nyi ihamba, ‘Kure uhende?’ 6Kya indi kundu muidime imanya kee Mana o mndu nyi awode pfinya kunu orukenyi yehooṟia madeko.” Amshika iya kawia ulya muumu shiwungo, “Kekure-ng'u uire kitaṟa kyapfo nohende kanyi kopfo!” 7Nao kahoṟoka chimu, kahenda kulya mba koke. 8Kyasia wandu walya wakeri-ho mamwingi wamewona wado wakaowuo wakang'anyisha Ruwa ainengye wandu pfinya ing'anyi ido. 9Kyasia Yesu amewuka alya kaida mbele kawona mndu adamye alya kisanyonyi kya okamba, ewio nyi Matayo. Nao kambia, “Kenjo nooshane na inyi!” Nao kakure kahenda oshana nao. 10 Kikashika ili adamie kelya shelya ipfo mba, adi a iwa wasanyi wa okamba sa wafoi na wandu wanyamaṟi wakacha napfo wakadamya na Yesu na wa-kiloshyonyi kyake alya kilionyi kya shelya. 11Naho Wafarisayo wamewona wado wakacha iwia wa kiloshyonyi kyake, “A nyi kili mlosha onu alya shelya na wesana okamba na wetehya?” 12Kyasia ameicho wededa wado, nao kahamba, “Iwo wai wecha chiwo wawode weshiha mhangapfo, chila na iwo waluo. 13 Kekumbuonyi mutawuke imanya nyi kiki iki kii kihambe, Kindo njikundi nyi isaṟia ma chi idasapfo. Kipfa wandu njicheye ilaha ma chi iwo wa wusumuhanyipfo, chila na wandu wanyamaṟye.”
Kya Ikuotoya
(Mar 2:18-22; Luk 5:33-39)
14Nalyo wa kiloshyonyi kya Yohane wakacha na handu ai wakahamba, “Nkili so lochekekwotoya na Wafarisayo, kya indi wa kiloshyonyi kyafo wakada walakwotoya?” 15Na Yesu kawawia, “A wandu wa walinyi waidime iwado nyi fowa ili menyi-wali akeri nawo? Na kukae kushike mafiri iliindi menyi wali echiondwo kowo, nyilyo wechikwotoya. 16Ma kuwode mndu echipfumya kidami kya nguwo njihya nakisanze na nguwo ya kachapfo, kipfa kilya kihya kyewuta-ho ikyo kiku na handu harandukye hakaengeṟa ing'ana. 17Ma kwipfo mndu echiwika mvinyo fo kipfuo selelenyi njikupfo, kipfa kokoya awika-pfo selela-tso nyi tsechidwika na mvinyo fukapusukya wanda na selelatso tsikanyamaṟika. Indi mvinyo mhya nyi wefuletsya selelenyi njihya nasho shikakia shi shiwi.”
Maana o waka o mchili na mndu mka umu wachiṟo
(Mar 5:21-43; Luk 8:40-56)
18Ili kewawia ado adi aichu mndu o wuitoṟi kacha naho kamolokya ndenyi kahamba, “Mana oko o waka wulalu anenuka. Indi ukucheye-wo nomhekye owoko lopfo naho nyi echiwada moo!” 19Na Yesu kakure-ho wakaduana nao na wa kiloshyonyi kyake. 20Naho adi a ichu mka aluo iwuka samu kusiie-ho maaka ikumi na iwi, kimatsika amewoko. Kacha kya numa kapaya mambo ya nguwo yake. 21Nyi ili alehia mrimenyi foke kahamba, “Ma ngapaya nguwo yake tupu na njechichia!” 22Kyasia Yesu kaindukya numa kambia, “Kewuyo nyi moo manoko, kidikyo kyapfo kyamekukiṟa.” Naho mka ulya kachia kiwokia saa na iya. 23Naho Yesu amshika kulya mba ko mchili ulya amewona-pfo na walya wekapa mtoṟiṟo na mamingi fo wandu fofahya, kahamba, “Kekurenyi-ho, mana chu o waka ma chi apfiepfo, nyi alee mado.” 24Nawo wakamseka. 25Kyasia wandu walya wamidima ifuno, kaida na mba kambada owoko. Naho mana ulya o waka kahoṟoka. 26Na mbonyi tsilya tsikahenda dung'ana kulya orukenyi kose.
Wapfu meso wawi wachiṟo
27Kyasia Yesu ambuka alya naho wandu wawi wakacha numa yake, wai wapfu meso, wakairya ṟu wakahamba, “Kelusaṟye-wo wukiwa wodu iyo Mana o Dawidi!” 28Kyasia amiida na mba walya wapfu meso wakacha na handu ai. Na Yesu kawawia, “Na muweidikye ke na njechiidima iwuta iki?” Wakambia, “Ee-wo Mndumii!” 29Nalyo kapaya meso hawo kahamba, “Kiidikyo kyanu chando mwidikye na wudo mochiwona!” 30Meso hawo hakatambaṟuka. Na Yesu kawakekedya kahamba, “Ambuyenyi ma kulakae ma mndu echimanya ma umu!” 31Kyasia nawo wakawuka-pfo wakahenda mduo ṟamba kulya orukenyi kose.
Yesu achira mndu awei pipi
32Kyasia walya wechihenda kudi wakamendye mndu ai pipi awodo nyi mṟufu mbicho. 33Naho mṟufu fulya mbicho fomefuno, ulya ai pipi kawuya ideda. Na wandu walya wakeri-ho mwamwingi wakaṟihio wakahamba, “Kunu kidi kya Israeli kulemewoneke kindo kidopfo.” 34 Kya indi Wafarisayo wakahamba, “Nyi mnene o mṟufu mbicho nyio awa mofuna nao mṟufu mbicho.”
Yesu asaṟia wandu
35 Na Yesu kawa motengetatengeta kelosha kulya sinagogenyi tsawo kyechionguo mbonyi tsa sia tsa wumangi wo Ruwa kekiṟa na orio ndaṟe yose na wunyonge wose. 36 Kya indi ili kewona wandu walya mamwingi nao kawalilia makulili nyi ili wai warohye wai wahutse wanda cha machondi halawode mlisi. 37 Nalyo kawia wa kiloshyonyi kyake, “Shesambuo nyi shifoi indi weṟunda wakanyia-ho, 38Keterewenying'u Mndumii o kisanyionyi nadume waṟundi wafoi alya kisanyionyi kyake.”
Wasu ikumi na wawi
(Mar 3:13-19; Luk 6:12-16)
Currently Selected:
MATAYO 9: KIM2
Highlight
Share
Copy
Want to have your highlights saved across all your devices? Sign up or sign in
Kimochi Bible © Bible Society of Tanzania, 2016.
