MATAYO 10
10
1Naho kalaha wa kiloshiyonyi walya ikumi na wawi kawainengya pfinya yeng'anya mrufu mbicho kundu wechiifuna na ikiṟa ndaṟe tsose na wunyonge wose. 2Na wasu walya marina hawo nyiho iha, o kuwoka nyi Simon ewio nyi Petro na Andrea manomae, na Yakobo ai mana o Sebedayo, na Yohane ai manomae. 3Filipo na Bartolomayo, Toma na Matayo ichu awei msanyi o okamba, Yakobo ai mana o Alifayo na Lebayo, 4Simon o kulya ya Kana na Yuda Iskariote nyio ichu alemṟingya.
Yesu aduma wasu ikumi na wawi
(Mar 6:7-13; Luk 9:1-6)
5Iwa ikumi na wawi nyiwo Yesu alewaduma kawawawasa kahamba, “Manya mlahende ko wandu wa mbaṟi njihenu, ma mṟinyi ko Wasamaria mlaide napfo. 6Indi mwengeṟe ihendya machondi hadekye ha mba ya Israeli. 7Kya indi ili muihenda keongwonyi muhambe, ‘Dumbuyenyi kyamba wumangi wo ruwehu womeafukya kufui!’ 8Kiṟenyi iwo waluo, ṟutsenyi iwo wapfu, heṟemtsenyi iwo wawodo nyi iwawe, funenyi mṟufu mbicho. Nyi mleambya kya wulya, keveinengyenyi kya wulya. 9Ma mlakuwonye sahabu na shilingi ma pesa sheṟika ipfo kikuchunyi kya ngowa mukupfungye natso. 10 Ma kichoṟe kya kyaṟo ma kanzu tsiwi ma shadu ma kidi kechumia. Kipfa moṟunda nyi asumuhanye na shelya shake. 11Kya indi mṟinyi ko wandu wafoi kundu momeida napfo mṟinyi ko wandu watutu ketumenyipfo mndu akeri-ho asumuhanyi Napfondo mochikukaya mtane mokure muhende kungi. 12Indi mukaanga mba ya mndu keiṟikiṟenyi! 13Na mba-yo kokoya nyi isumuhanyi na ofoṟo lonu luisoke huye yayo. Kya indi ikada ilasumuhana na ofoṟo lo luwembuuya nyo. 14 Na mndu alamondwo na kanyi koke alaadanye ma madedo hanu, nanyo mkashika wuka kulya mba ang'u mṟinyi kekutekutenyi madende kiluli-kyo kiwuke-pfo. 15 Na kya lohi ngambia, kilya kya oruka lo Sodoma na Gomora nyi kyechyiangwo ili mfiri fo mondu kota kya mṟifo.”
Matuuro na mawukiwa
(Mar 13:9-13; Luk 21:12-17)
16 “Ambuyenyi inyi njiimduma cha machondi hai kiidi kya makite ha ngeṟenyi Kyasia-ng'u kekaenyiho mui na wuṟango cha njoka mlai na mtambo mui cha mbeta. 17 Kya indi kuṟisenyi na wandu Kipfa nyi wechihenda mduo kulya mba wededya shama shawo na kulya sinagogenyi tsawo wawemkapa na ngowa-tso tsii njitochye msha. 18Na oshangunyi lo wachili na wamangi muwedao kipfa kyako, kiwe nyi kya kiṟingishyo kyawo na wa mbaṟi njihenu. 19Indi mkamkoya wehenda mdambika wado, nanyo ma mlawado nyi makusaṟo chando mochideda-ho ke nyi wuda anu ke nyiki, cha kifa saa iya nyi mochinengyo ishi shehamba-ho. 20Nyi ili wededa-ho chi nyofo, nyi Mumuyo o Ndeyanu ededa ai nanyo. 21 Kya indi kukae manomae o wandu nadambike manomae kya opfu na ndee o mndu nawedambika mana, na wana wa wandu waamkye iwo wawafeye na ihenda iwashihiya ofu! 22 Nanyo muwe nyi mochisukya wandu wose kipfa kya rina lyako. Kya indi ichu mokarishya-ho kaweda kushike ili masiyonyi echikiṟo. 23Kya indi mkamkoya wemterengya kunu mṟinyi ifu kedichyenyi fulya fungi. Kifa nyi kya lohi ngambia ma mochimaa mamṟi ha Israeli Manomndu alachapfo. 24 Molosho neida moloshapfo, ma isinga lyekaa huye ya Mndumii olyopfo. 25 Nyi kyashika molosho ili awa cha mlosha oke, na isinga ili lyawa cha mndumii olyo. Wamtana wamlaha menyi nyi Belsebuli, a wana wa kanyi koke kyawo chi kya wuera?”
Wawaṟi iowoyo
(Luk 12:4-7)
26 “Kyasiang'u manya mulawone mochiwaowuo. Kipfa kwipfo kindo kii kipfinyike kide kilapfunuka numapfo, ma kindo kii kiṟike kide kilapfunuka numapfo, ma kindo kii kirike kide kilamanyikapfo. 27Iki ngambia meemenyi kekihambenyi senyi na kindo moicho mowewedyo madunyi kekyongwonyi na pata. 28Nanyo ma mlaowuo walya wewaha mbihu kya indi mrima-fo walaidime ifuwaha. Keengeṟenyi yowuo ichu moidima idetsa na mrima na mbihu handu hamu ii iwi idekye kulya Gehena. 29A njoṟiwu tsiwi chi tsekekumbo senti imu? Natso ma imu-ho yemanya iho wanda kulawode Ndeyanu akundipfo. 30Ma njui tsa kunu mdonyi konu na tsiwenjiitale tsose. 31Kyasia-ng'u ma mlaowuo, na nyo chi mung'anyi kota njoṟiwu ma tsikafo chi muweng'anyi nyo?”
Iṟingishia na Ikana
(Luk 12:8-9)
32“Nahonu orio mndu ose ichu echinjihamba oshangunyi lo wandu, na inyi mbemhamba oshangunyi lo Wande o ipfo ruvehu. 33 Kya indi orio mndu ose ichu echinjikana oshangunyi lo wandu, na inyi mbemkana oshangungi lo Wande o ipfo ruwehu.”
Mlusano
(Luk 12:51-53; 14:26-27)
34“Ma mlawone mochihamba kindo njicheye iwika kunu masangenyi nyi ofoṟo. Chi ofoṟo njicheye yende napfopfo, nyi oshu. 35 Nyi njicheye njiletsane mndu na ndee, na mana o waka na mae, na mali o mana na mamii oke. 36Na wakituwa wa mndu kiwe nyiwo wana wa kanyi koke. 37Ulya akundi ndee ang'u mae kawakunda kota inyi, nanjiwaṟi-pfo. Na ulya akundi mana o womi anu o waka kawakunda kota inyi nanjiwaṟipfo. 38 Na mndu ada alakudika msalaba foke na icha oshana na inyi kunu numaako nanjiwaṟipfo. 39 Na mndu mowona moo foke nyi echiwuya ifudetsa; na mndu modetsa moo foke kikawa nyi kipfa kyako inyi nyi echiwuya ifuwona.”
Wueri
(Mar 9:41)
40 “Mndu echimuambya ipfo kanyi koke nyi inyi anjiambya. Na monjijambya inyi nyi aambya ichu anjidumye. 41Mndu echiambya mwikimbi kikawa nyi kya rina lya mwikimbi, nyi echiwona kya woṟunda wo waikimbi. Na ichu echiambya mndu o wusumuhanyi, kikawa nyi kya rina lya mndu o wusumuhanyi nyi ewona kya woṟunda wo mndu o wusumuhanyi. 42Na ichu echirutsa iwa watutu ya wose ma umu-ho kamrutsa na mṟinga mcheleri na kirahu kimu, kikawa nyi kya rina lya mndu o kiloshyonyi na kya lohi ngambia mndu-cho kyake kya woṟunda ma kyekaa kidekesepfo.”
Ndumi iwukie ko Yohane Mpatisi
(Luk 7:18-35)
Currently Selected:
MATAYO 10: KIM2
Highlight
Share
Copy
Want to have your highlights saved across all your devices? Sign up or sign in
Kimochi Bible © Bible Society of Tanzania, 2016.
