MATAYO 5

Yudaya na kulya mataya Ya Yordanyi.

Mongoye fo fumvuhu

(Mat 5:1–7:29)

1Kyasia nao ili alewona wandu walya wakeri-pfo mamwingi, kado kundu ko fumvu-hu. Amiidima idamia, walya wa kiloshio kyake wakacha ihoṟoka handu ai. 2Nao kairia ṟu kawalosha kahamba, 3“Nanga iwo wai wakiwa kui mrima, cha kifa nyiwo wumangi wo ruwehu woiwa wowo. 4 Nanga iwo wawodo nyi fowa, cha kifa nyiwo wechika wawihiṟio moo. 5 Nanga iwo wai wahoo, cha kifa nyiwo wechikaa wakudaae oruka luwawiie kyoṟa kyawo. 6 Nanga iwo wawodo nyi njaa na nyoda yelanga wusumhanyi, cha kipfa nyiwo wechika waihutso. 7Nanga iwo wesaṟia, cha kipfa nyiwo weka wasaṟio. 8 Nanga iwo wai waharami kui mrima, cha kipfa nyiwo wechika wawone Ruwa. 9Nanga iwo wechiitsa-pfo ofoṟo, cha kipfa nyiwo weka wasendo nyi wana wa Ruwa. 10 Nanga iwo wechiitso kiterengionyi kipfa kya wusumuhanyi, kyamba nyiwo wumangi wo Ruwa woiwa wowo. 11 Nanga nyo ili mochiwona wemruma na imwamtsia shiterengio na imdeda-deda orio kindo kiwicho kyose kii kya wongo, indi kikawa kifa kyako inyi. 12 Kechihiyonyi mbekeseka, kipfa woṟunda wonu nyi wufoi kulya ruwehu, kifa na wudo waleweterengia waikimbi walya wa-wemsongoye.”

Monyo na sa

(Mar 9:50; Luk 14:34-35)

13 “Nyo nyi mui monyo fo wuyana, indi komkooya monyo fu-mporu, nyi wuda fochitanose monyo? Fuwode-se kindo fochiṟundapfo, shile nyi ikumbo na ichumo-chumo nyi wandu. 14 Nyo nyi mukeri sa ya wuyana, mri fumbike kundu ko fumvu-hu fochiwa iṟikishofo. 15 Ma kuipfo mndu echiatsa taa kaiwika shi-ya kisoṟopfo, indi nyi handu hehekia taa, nayo ikalimikia walya wai ipfo mba wose. 16 Nyi wudo na sa yanu iwewaa oshangunyi lo wandu wose, wawuteho ikulosha mawuto hanu mecha, kundu wang'anyi she naho Nde-anu o ipfo ruwehu.”

Wuwawaso

17“Ma mlawone mochihamba ke kindo njicheye nyi ngaluko, ote; chi ngaluko njicheyepfo indi nyi yawutsia. 18 Kipfa nyi kya lohi ngambia, na kuwede kulya ruwehu kunyamaṟo na sanga, indi ipfo wuwawasonyi kochinyamaṟika-fo ma kichano kimu ma kimcharie kimupfo na shiwede shiinutsio shose. 19Kyasia-ng'u mawawaso-ho, ma iho matutu ya hose ichu mopfuluo-ho ma limu kalosha ado wandu, nyi etano mtutu o wose o ipfo wumangi wo ruwehu. 20Kipfa nyi ngamuwia, wusumuhanyi-wo wonu wukameda wulaida wo walosha wa wuwawaso na wo Wafarisayo-da, mochiwona wumangi wo Ruwa muide napfopfo!”

Nyashi

(Luk 12:57-59)

21 “Nyi muichi walya wa kacha nyi walewio, ma kulawahe, na orio mowaaha nyi mti, nyi mndu mohenda dao ko wachili wedumbuo kya wandu wanyamaṟie! 22Indi inyi nyi ngambia, orio mndu ose moṟikia manomae nyashi mrimenyi nyi mndu mohenda dao ko wachili wedumbuo kya wandu wanyamaṟie! 23Kyasia-ng'u ichu echiwia manomae, iyo nyi kichoi, mti, nyi mndu mohenda dao kulya ko wachili wanene wedumbuo kya wandu wanyamaṟie king'anyi. Na ichu echiwia manomae, nyi ui msese, mti; nyi mndu modao modonyi fo Gehena Kyasia-ng'u koshika yende kindo kyapfo kya odambiko na alya rasionyi ko Ruwa, kuiho kokumbuo manomayo awode mondu na iyo, 24da-ho odambiko lulya lopfo oendie Ruwa, nokemmbooka ihenda-sanza na manomayo; numa njong'u udambike kindo kyafo! 25Wa mndu moidikiana na mkituwa opfo owinyi ili mui kyaṟo-ki kya wanda-ii kundu nalache kudambikia mchili, na mchili nakudambikie watuuri nokumbo kipfungonyi. 26Nkya lohi ngakuwia, ochikiwuka-se-hopfo, na itane otaa na njoko iya yemarisia.”

Wuṟuhui

27 “Mmbeichi nyi kikihambe, ‘Ma kulaṟuhuye ma iṟuhuyo.’ 28Indi inyi nyi ngambia, ‘Orio mundu oose echiambuya mndu mka womlanga, nyi ama iruhuya nao mrimenyi.’ 29 Indi iyo kowona ma riso lyafo lya kulyo lyechikuendie wusutsu, lituhuopfo, nolikumbe kuleshe, nanga ili odetsa kiwungo kyafo kimu, mbihu fopfo fukaashuka fulamkumbe Gehena. 30 Ma kokooya nyi kuwoko ko kulyo kuikuendie wusutsu, kudumbuo nokukumbe kuleshe; nanga iyo kodetsa kiwungo kyapfo kimu, mbihu fopfo fukaashuka fulamkumbe modonyi.”

Ilekana na mii ang'u mka

(Mat 19:9; Mar 10:11-12; Luk 16:18)

31 “Na kingi-se nyi kiwei kihambe wai, ‘Mndu molekana na mka oke, namnenge paruo yemsama.’ 32 Kyaindi inyi nyi ngambia ke, ‘Orio mndu molekana na mka oke kulawode kitewe kya isokombo, nyi amtana mokisokombo; na mndu kaalika ichu amde nyi aruhuya.’”

Ilya nyamu

33 “Mbeichuo walya wa kacha nyi walewio, kulawone kochilya nyamu tsa wongo, indi kuwode kindo uteṟie Ruwa kui nyamu, wuta kudo tichi. 34 Kyaindi inyi nyi ngambia, ‘Ma mulalye nyamu ma nta muhambe, so ruwehu, kipfa nyipfo loṟika lo Ruwa lodamia.’ 35 Ma so oruka, kipfa nyi kiteeyo kehekia madende hake. Ma so Yerusalemu, kipfa nyi mṟi fo mangi ing'anyi. 36Ma kulalye nyamu nohambe, so mdo foko, kipfa kulechiidima ihaluo ma ochui lumu luile ang'u luiwuo. 37Indi kidedo kyanu kiwe nyi, ‘Ee, Ee,’ anu, ‘Ote, Ote!’ Kidie ikyo, nyi ko mbicho kicheye.”

Itaa kiraache

(Luk 6:29-30)

38 “Muichi nyi ki-kihambe, ‘Riso litao na riso na heho litao na heho.’ 39Kyaindi inyi nyi ngambia, ma mularekiane na mndu ai mbicho! Kyaindi ichu echikukapa nguchu-yo ya kulyo, kewemhaluye iyo ya kumoso. 40Na ichu akundi icha anduo na iyo kundu naduo nguwo yapfo, mdeye na iyo ya kawi. 41Na ichu echikuitikia mchumie fo kenga kya saa, kuhendie nao saa yose! 42Ichu mokuterewa, mnenge, na ichu mocha kuakuo, ma kulamkumbe mhongo!”

Ikunda wakituwa

(Luk 6:27-28,32-36)

43“Mbeichuo nyi kikihambe, ‘Kunda odoo, na mkituwa opfo msuo!’ 44Indi inyi nyi ngambia, Kekundenyi wakituwa wanu, na iwo wemterengia, kewaterewienyi! 45Nanyo kundu mukuwie wana wa Nde-anu o ipfo ruwehu, kipfa o nyi ekedosa mnengeṟi foke fukawaaya ichu mbicho na ichu mcha, na mvuo yake kaweolotsya ko ichu o wusumhanyi na ko ichu alai o wusumhanyi. 46Kipfa kokooya mokunda walya wamkundi, na nyo nyi kiki mochiwona-ho kya woṟunda wonu? A wasanyi wa okamba cha wudo wekewuta? 47Na wandu mochiiṟikiṟana nawo, kokooya nyi wanawamaanu tupu, kindo mowuta kya ngoseṟa nyi kiki? Ma wandu wa mbaṟi njihenu na wudo wekewuta! 48 Kyasia, wenyi wandu waholokie wucha, chando na Nde-anuo ipfo ruwehu aholokie wucha!”

Currently Selected:

MATAYO 5: KIM2

Highlight

Copy