MATAYO 6
6
Itarama wakiwa
1 “Kekuṟisenyi mulawone mochiwuta sha wusumuhanyi wonu oshangung'u lo wandu muwonyo nyiwo; mulakuṟise mudo, ma mochiwona-se kya woṟunda wonu ipfo ko Nde-anu o ruwehupfo! 2Na iyo koshika ilekia shindo shapfo shesaṟia, ma kulakape ombe lukusongoye chando makulembetsere halya hekewuta wai ifo sinagogenyi ipfo kikumbuhananyonyi kya njia tsa mṟinyi nawo nyi kundu waṟumisho nyi wandu! Nyi kya lohi ngambia, ‘Wo walemmaa iduo kya woṟunda wowo!’ 3Kyaindi iyo koshika ilekia kindo kyesaṟia, ma kuwoko kopfo ko kumoso kulamanye ikyo ko kulyo kindo kukeri iwuta. 4Kundu isho shapfo shesaṟia shiwe sha kiṟika; na Ndeo ichu echiwona kiṟikenyi nakutae amonyi.”
Kiterewo
(Luk 11:2-4)
5 “Ma iterewa na wudo; ma mlawe cha makulembetseṟe halya! Wo nyi wakundi iterewa wahoṟoki ipfo sinagogenyi na alya kikumbuhananyo kya njia tsa mṟi kundu wakuloṟe na wandu. Nki lohi iki njiimbia wo walemmaa iduo kya woṟunda wowo! 6Indi iyo koshika iterewa, ida na ipfo kiṟihenyi kyapfo kya kiidi uweshinga na mongo, notereweng'u Ndeo ui ipfo moowionyi; na Ndeo-chu echiwona na moowionyi na ekaa nakutae. 7Ili mwiterewa, ma mulakape-kape ata kwi mbaṟi ya wahenu; kipfa nyi wakusaṟie kulako kindo wechiadanyio nyi maanuka yawo ya ata! 8Ma mlafanane nawo! Kifa Ndeanu o ipfo ruwehu na aichi shilya muwuṟie ma ili mulamemterewa. 9Indi terewenyi mule, ‘Nde-yadu ukeri ipfo ruwehu, Rina lyafo litano yele. 10Wumangi wopfo wuche. Isho ukundi chando shekewutika kulya ruwehu, na kunu orukenyi shiwewa shido. 11Kando kadu kalufoi uluinenge inu. 12Uludeye sile tsṞafo luwode, chaso luwedeya wasile wadu. 13Ma ulaluduo kitewionyi indi ulukiṟe shindo shiwicho! 14 Kipfa komkoya nyo mokehooria wandu, na Nde-anu o ipfo ruwehu na echeemhoṟia nyo. 15Indi nyo mkada mlahoṟia wandu shilya walemdekio, ma Nde-anu o ipfo ruwehu echimhooṟia-nyofo.’”
Ikuotoya
16“Nanyo mkashika ikuotoya, ma mulakufananyishe na makulembetseṟe-ho hekesuruwanyisha masineeri kipfa nyi wekeshimbiṟa shamu kundu wakuloṟe na wandu. Nyi kya lohi ngambia, wo walemmaa iduo kya woṟunda wowo. 17Indi koshika ikuotoya, shia mdo-fo mafuda, na oshangu lopfo nowesanja! 18Indi, ma kulakuloṟe na wandu ili ukuotoye shile na ko Ndeo o kiṟikenyi na Ndeo-chu echiwona sha kiṟika na ekaa nakutae.”
Kisa ruwehu
(Luk 12:33-34)
19 “Ma mulakusuṟumie shisa shanu kunu wuyana kundu mui handu kiwiro na ngama shechinyamaṟa kuwewode na manyinyi heiwa. 20Kyaindi surumenyi shisa shanu kulya ruwehu kundu kulawode shiwiro ma ngama, ma manyinyi halechiidima iiwa. 21Kundu handu uṟikie kisa kyapfo, na mrima fuwekaa-ho.”
Sa ya mbihu
(Luk 11:34-36)
22“Kiinengie mbihu sa nyi riso; na riso komkoya nyi licha, na mbihu fose nyi fochiwa sa. 23Kyaindi komkooya riso liiwicho, mbihu da na fochiwada meema fose. Kyasia na sai ii na iyo kommbona yamhaluka meema, apa ṟimbaha lya imema lilemie.”
Ruwa na Masaa
(Luk 16:13)
24“Kwipfo mndu echiidima ifuṟukanya wanene wawipfo; kipfa kumu nyi echisuo ulya umu, nakunde ulya o kawi; ang'u nahalukie ichu, nainyale ulya ungi. Ma mochiidima isanza mupfuṟukanye Ruwa hamu na Mamonapfo.”
Makusaṟo
(Luk 12:22-31)
25“Kyasia, kyamba nyi wudo na inyi nyi ngambia, ‘Ma mulawado nyi makusaṟo kya moo yanu kya kindo mochilya, anu kya mbihu yanu kindo mochiṟaa Aka moo chi fung'anyi fukaida kando; na mbihu cha fuweidie nguwo? 26Keṟisenyi ma shilehe sha ruwehu shilekekumba mbeu ma isanya shikumbinyi indi nyi Nde-anu ipfo ruwehu ekeshiinenga shelya; aka nyo chi mushing'anyie. 27Ale? Kunu konu nyiu aipfo echidima yengeṟa wuku woke wuengeṟeke handu ha oweṟe lo mkonu fumu ma ikusaṟa ikyo?’ 28A nguwo tseraa nyi kiili muwodo mudo nyi makusaṟo kyatso? Kyeṟisenyi ipfo shiwaṟonyi sha mbaṟi tsose sha manjawuhenyi; shekewina na iyoka nguwofo. 29 Indi nyi ngambia ke, ma Solomon na wusuṟi woke wose awemṟike chasho ma kimu-hopfo! 30Kyasia, komkooya mara ha njawuhenyi hakeri-ho inu na ngama hakahenda ikoṟio mawiwenyi, komkooya Ruwa nyi ahachopie ado, aka nyo mui mudo na kiidikio kitutu, kyanu chi kikiengere? 31Ori muwado nyi makusaṟo muhambe, a kindo lochikulia ang'u kindo lochikunyooya nyi kiki; ma kya mbihu yanu kindo mochikuṟaaya. 32Kifa isho shose nyi wandu wa mbaṟi njihenu wekeshilalakia; indi Nde-anu o ipfo ruwehu na aichi ke nyi kimuwaṟi ishiwona. 33Kyaindi songuonyi ilalakia wumangi wo Ruwa na wusumuhanyi wowo, na shingi nyi mochiinengo cha shannga. 34Kyasia, ma mulawado nyi makusaṟo ha kya ngama, kipfa ngama nyi yesaṟa kyayo injenyi Orio mkonu nyi fui na kyafo nahong'u.”
Ihutsia wengi owingo
(Luk 6:37-38,41-42)
Currently Selected:
MATAYO 6: KIM2
Highlight
Share
Copy
Want to have your highlights saved across all your devices? Sign up or sign in
Kimochi Bible © Bible Society of Tanzania, 2016.
