MATAYO 4

Yesu ahesho nyi satana

(Mar 1:12-13; Luk 4:1-13)

1 Nalyo Yesu kadao kundu ko nuka nyi Mumuyo, kundu nahende heshio-fo nyi Satana. 2Kyasia ammaa ikuotoya mfiri makumi haana na shio makumi haana, kafurumia iwado nyi njaa. 3Mheshi kacha naho kambia, “Kokoya na iyo Mana o Ruwa, kewia-ngu maho-ha hawe kando.” 4 Yesu kahaluo kambia, “Nyi ki-kiṟehie kehamba: Kindo mndu echitawulia nakyo moo chi kando tupupfo, shile nyi orio kidedo kyewuka dumbunyi lya Ruwa kyose.” 5Na Satana kawuya kamduo kulya mṟinyi mwele, kacha mhoṟotsa alya owerihu lo hekalu, oo chunju. 6 Kambia, “Kokoya na ukeri Mana o Ruwa, kekuolotsenu iya, kipfa nyi ki-kiṟehie kehamba: Nyi echiwawasa wasu wake kimaduma kyapfo wache kuambia na mahi, kundu ulawone koikapa ma kudende ihohu.” 7 Yesu kambia, “Na kiwei kiṟehie-se kehamba: Ma ulawone ohesha Ruwa Mndumii opfo!” 8Kyasia Satana kawuya kamduo kundu ko fumvu lileshe, kamloṟa masanga ha wuyana hose na wusuṟi woho. 9Kambia, “Aiho, nyi njechikuinenga hose, komekekunjiolokya ndenyi na interewa.” 10 Nalyo Yesu kambia, “Wuka iya koko Satan, kifa nyi ki-kiṟehie kehamba: Mndumii ofo Ruwa, nyio amonyi ochimwolokia ndenyi na imterewa.” 11Naalyo mheshi kamda-ho, kudi wasu wa Ruwa wakacha ipfuṟukanya Yesu.

Yesu awooka iṟunda Galilaya

(Mar 1:14-15; Luk 4:14-15)

12 Kyasia ammaa iwio ke Yohane alemmaa ikumbo kipfungonyi, nao kahenda kuleshe kulya Galilaya. 13 Kawuka kulya Nasareti, kahenda kulya Kapernaumu, nyi kundu ko mawambao ha ipalyipalyi, kulya shihongonyi sha Sebulon na Naftali. 14Nyi kundu kuhoye kilya ki-kidede kui dumbu lya mwikimbi Yesaya. 15 Kyehamba, “Oruka lo Sebulon na lo Naftali kwidie njia ya ipalyipalyi, na kulya mataya ya Yordanyi na Galilaya kui kundo ko mbaṟi njihenu. 16Wandu wadamie memenyi wawona ngeela ing'anyi, na walya wadamie orukenyi lo maṟishe ha opfu, wawonekio nyi ngeela.” 17 Wokya mandi halya, Yesu kawooka yonguo kahamba: “Kedumbuyenyi, kyamba wumangi wo Ruwa nyi hafui wui.”

Yesu alaha wakiloshyonyi wadehi waana

(Mar 1:16-20; Luk 5:1-11)

18Kyasia kekichumia-chumia kulya mawambao ha ipalyipalyi, kawona wana wa mka wawi, nyi Simon ewio Petro, na manomae nyi-we Andrea; nawo nyi wawekeri yolotsa mdeho fodeha makunga alya ipalyipalyinyi, kipfa nyi wawei wadehi. 19Nao kawawia, “Kenjonyi muoshane na inyi njimtane wadehi wa wandu.” 20Kudi wakada-ho mdeho iya, wakamwosha. 21Nao kekihenda-henda, kawewona-se wana wa mka wawi, nyi Yakobo na Yohane, wai wana wa Sebedayo, wai ngalawenyi, na ndea-wo nyi aweipfuma mdeho iya yawo handu iwerandukie, kawalaha. 22Nawo wakada-ho ngalawa iya, na ndeawo-da, wakamwosha.

Yesu aichiṟa na ilosha

(Luk 6:17-19)

23 Nao kawa moida-ida kulya Galilaya kose kelosha kulya sinagogenyi tsawo, na yonguo mbonyi tsa sia tsa wumangi, na ichiṟa orio ndaaṟe tsose na wufari wose wui ipfo wandunyi. 24Na kiṟumi kyake kikahenda dung'ana kulya Siria kose. Wakamwendie wandu waluo wose, walya wai warohie nyi ndaaṟe tsa orio mbaṟi kawachiṟa wose. 25Kyasia wandu wakaduana nao mamwingi fung'anyi wawuka kulya Galilaya na Yudaya na kulya mataya Ya Yordanyi.

Currently Selected:

MATAYO 4: KIM2

Highlight

Copy