MATAYO 3

Muongoye fo Yohane Mpatisi

(Mar 1:1-8; Luk 3:1-18; Yoh 1:19-28)

1Kyasia, mafiri na halya kukakure Yohane Mpatisi, kawa moongoya wandu mbonyi kulya nuka ya Yudaya. 2 Kehamba, “Dumbuyenyi, kyamba wumangi wo Ruwa womeafukia kufui!” 3 Nao nyi ichu a-mhambe nyi mwikimbi Yesaya, kehamba, “Ṟu lya moedia kundu ko nuka: ‘Kesungusienyi njia ya Mndumii, muwetembecheṟa na njomongo tsake!’” 4 Kyasia, na Yohane-chu nyi awekeṟaa nguwo tsa mafufuta ha ngamia, kawewa mokupfunga na okowa lo njonyi ipfo kitsinyi kyake; na shelya shake nyi nzihe na wuki wo mbakonyi. 5Nalyo wandu wa Yerusalemu wose na wa oruka lo Yudaya na Yordanyi lose wakamchea. 6Wakahenda ipatisio alya mṟingenyi fo Yordanyi wechitochia-ho njonyamaṟo tsawo. 7 Nao lyandi alewona Wafarisayo wafoi na Wasadukayo wechicha na wupatisonyi kawawia, “Nyo mui malea ha njoka, nyi mndu o ku alemlosha idicha nyashi iya iriiye icha? 8Kekusumuhantsyenyi-ng'u mbuka njicha tsedumbuya! 9 Ma mulakusire wongo mrimenyi mochihamba, ‘A-chi luwode ndeadu nyio Abrahamu?’ Indi nyi ngambia, ‘Ma maho-ha Ruwa na echiidima yalutsia-ho Abrahamu luwa.’ 10 A-lilya soka li-iwike tsindenyi ya ikidi, orio ikidi lyada lilakumbia ndunda, na lyi manyo lyikumbo modonyi. 11Kyako inyi nyi njekepatisa na mṟinga kya idumbuya, indi ichu echicha numa yako, nao nyi anjing'anyie, njilasumhanyi ma iduo shadu shake, icho nyi echimpatisa na Mumuyo Mwele na modo. 12Nyi awerie na kindo kyake kyeela na owoko loke, na-weahia na alya kiwuhehu kyake namae, mbeke-tso nasanyie alya kikumbinyi, indi muulu-fo nafu kore na modo fulechiruma.”

Yesu apatiso

(Mar 1:9-11; Luk 3:21-22)

13Nalyo Yesu kacha na alya nuka handu Yohane awei kulya wambaṟa ya Yordanyi, awuka kulya Galilaya akundi ipatiso nyio. 14Yohane kamlehialehia kahamba, “Nyio inyi njiwechiwona njechipatiso nyi iyo, indi iyo kowuya icha na koko?” 15Yesu kahaluo kambia, “Ikyo kudee wulalu, nyi wudo kiluwaṟi, kundu luawutsie mbon tsa wusumhanyi tsose.” Nalyo kakumdeea. 16Kyasia Yesu amedima ipatiso, kado alya mṟingenyi. Naho kudi kulya ruwehu kukaṟuhuka; kawona Mumuyo o Ruwa kesoka akeri cha mbeta, ikakaa huyake. 17 Oweṟe ṟu likalaha liwuka ruwehu likahamba, “A-ichu mana oko a-mkunde ichu njii mchihie kyake.”

Currently Selected:

MATAYO 3: KIM2

Highlight

Copy