MATAYO 15
15
Mbonyi tsa waku
(Mar 7:1-13)
1Naho kulya ko Mndumii Yesu kukacha napfo Wafarisayo na walosha wa wuwawaso wawuka kulya Yerusalemu wakahamba, 2“Nyi kili wa kiloshyonyi kyafo wekeumbuya mbonyi luwadeye nyi waku? Kili welekesamba mawoko ili washika ilya mkate.” 3Nao kawahaluo, “A kyanu nyo nyi kiili mokeumbuya iwawaso lya Ruwa kipfa kya mbonyi tsanu mu wadee tsa kacha?” 4 Cha kipfa Ruwa nyi awawasye kahamba, “India ndeo na mayo na moruma ndee anu mae nyi opfu napfe.” 5Nanyo mukahamba kya ichu echiwia ndee ang'u mae, “Nyi kindo kehenda dasa ikyo muwechiwona koko.” 6Kyake nyi mokehamba ke nalawone keindya-se nakyo ma ndee ma mae. Kikawa nyi mupfuluye iwawaso lya Ruwa kipfa kya mbonyi tsanu muwade tsa kacha. 7Mui makulembetseṟe, na kicha kilya Yesaya alededa kyanu kehamba kisuku kahamba, 8 “Wandu wa oruka-lu nyi wekenjindya na madumbu hawo kya indi ngoo tsawo tsikahenda kuleshe na inyi. 9Nyi wekenjio-lokyaolokya kya maai waipfunda njopfundo tsii mawawaso ha wandu.” 10Nalyo kalaha wandu walya waiho mamwingi na ipfo koke kawawia, “Keadanyenyi imanya mumanye! 11Kiteṟefutsie mndu wuwicho chi iki kehenda dumbunyipfo, nyi iki kyawuka dumbunyi nkyo kindo keterefutsa mndu wuwicho!” 12Naho walya wa kiloshionyi wakacha na hando ai wakambia, “Na oichi ke Wafarisayo nyi wasukyo nyi idedo lyo waicho wado.” 13Nao kahaluo kahamba, “Orio kindo ki kidonge kulawode nyi Wande o ruwehu akidongye na kekuṟuo. 14 Lekanenyi nawo! Nyi wasongoru wai wapfu meso waisongoya wapfu meso. Kya indi mpfu-meso kasongoya mpfu meso njia nyi wechioloka ṟungunyi wa wawi.” 15Kyasia Petro kahaluo kambia, “Kelutambahuye-wo mbonyi-tso tsa mfanano!” 16Nao kahamba, “Ate na nyo momanya kindo? 17Nyi mlaichi orio kindo kyose kyaida na dumbunyi nyi kehenda ndeunyi kikahenda wiko ṟungunyi kundu kovika mando? 18 Kya indi ishi sheuka dumbunyi nyi shekecha shiuka mrimenyi nasho nyisho shewikya mndu wuwicho. 19Cha kipfa ipfo kiidi kya mrima nyi kokedo-pfo mahio mawicho na wuwahi na mbonyi tsa iṟuhuya na tsa wulala na wuiwi na madedo ha wongo hewonya mndu owingo na shirumo. 20Nyi sho-ng'u shindo shewikya mndu wuwicho. Kya indi kolya kulasambie mawoko chikyo kyawikya mndu wuwichopfo.”
Wuidiki wo mndu mka umu
(Mar 7:24-30)
21Naho Yesu kakure kulya kundu akeri kahenda kuleshe kulya shihongonyi sha Tiro na Sidon. 22Naho adi a ulya mka o Wakananyia kacha napfo auka kulya mṟasenyi iya kakoṟoṟoma ilaha kahamba, “Kensaṟya-wo wukiwa woko hoi Mndumii ui Mana o Dawidi! Mana oko o waka aituro mnu nyi mṟufu mbicho fumbode.” 23Nao ma nalahaluo ma kindo ma kimu. Naho wa kiloshionyi wakacha na hando ai wakamterewa wakahamba, “Kemsame-wo nyi aifihiṟa kunu numa-du.” 24Nao kahaluo kahamba, “Njii mdume kundupfo chila na ko machondi hadekye ha mba ya Israeli.” 25Nao kacha naho kamwolokia ndenyi kahamba, “Hoi na hoi Mndumii njitarama-wo!” 26Nao kahaluo kahamba, “Chi kindo kisumuhanyi kosoka shiwana kando kokumbya makitepfo.” 27Nao kahamba, “Ee-wo Mndumii. Kya indi ma makite na hekekuliya shipeṟengu sheoloka kitaṟenyi kya wenyi-sho.” 28Nalyo Yesu kahaluo kahamba, “Ee mka kiidikyo kyapfo nawo king'anyi. Na chando uwekundi nakyo kiwekushikya kido.” Naho mana ulya oke o waka kachia kiwokia saa na iya.
Yesu achiṟa wandu wafoi
29Kyasia na Yesu kawuka kulyando akeri kahenda kungi kashika kulya mawambao ha ipalyipalyi lya Galilaya. Naho kado na kulya fumwunyi kadamia-ho. 30Na wandu wakacha na hando ai mamwingi sa fung'anyi warie wandu wai shiricheche na wai ngokoṟo na wapfu meso na wai pipi na wengi wafoi. Wakawaleṟya oo madedenyi hake. Nao kawakiṟa. 31Itane wandu walya wakeri-ho mamwingi waṟihio ili wawona walya wai pipi wewuya ideda na walya watiliwanyi maungo wakachia na walya wai shiricheche wakawuya ichumia na wapfu meso wakawuya yambuo. Nawo wakaidapfuma Ruwa o Israeli.
Yesu aihutsa wandu shiku shiina
(Mar 8:1-10)
32Kyasia Yesu kalaha wa kiloshionyi kyake na ipfo koke kahamba, “Ngasaṟa wukiwa wo mamwingi fo wandu-wa kyamba wamtsinda kunu koko mfiri iṟaṟu ma walawona kindo kelya. Na isama njikundi wasama walasusuopfo. Nyi wewona wearisikya njienyi.” 33Na walya wa kiloshionyi wakambia, “A nku lochiwuta kando kafoi kadi kunu nuka wandu-wa wafoi wadi watane waihuda wose?” 34Na Yesu kawawia, “Nyi mkate inga muwode?” Nawo wakahamba, “Nyi mfungade na shikunga shitutu.” 35Nalyo kawawasa mamwingi fulya fo wandu wadamie wanda. 36Kaira mkate iya mfungade na shikunga shilya. Kaana Ruwa. Kafunja-funja kainengya walya wa kiloshionyi. Na wa kiloshionyi wakainengya mamwingi fulya fo wandu. 37Wakalya wakadung'ana wose wakaihuda. Na mtsuhaṟo fulya-fo shipeṟengu shilya wakadoduo. Shikunja mfungade shikaichuo. 38Kya indi walya welya-ho nyi wasoṟo washikye shiku shiina, kouta wana na waka. 39Naho kasama mamwingi fulya fo wandu. Kadoya kulya ngalawenyi. Kashika kulya mambatsana na kulya Magadanyi.
Wandu wakundi iwona kichano
(Mar 8:11-13; Luk 12:54-56)
Currently Selected:
MATAYO 15: KIM2
Highlight
Share
Copy
Want to have your highlights saved across all your devices? Sign up or sign in
Kimochi Bible © Bible Society of Tanzania, 2016.
