MAWOOKIONYI 48

Yakobo awikia Efraimu na Manase ona

1Kikawa, mbonyitso tsameida, Yosefu kawio, “Ambuya ndeo namrohie;” kaira wana wake wawi, Manase na Efraimu, handu hamu nao. 2Nao Yakobo kawio ke, “Ambuya, mana opfo Yosefu nakeri icha na kopfo.” Israeli kakutumhaṟa, kadamia alya kitaṟenyi. 3 Yakobo kawia Yosefu, “Ruwa Menyipfinya nalenjichea kulya Luzu, orukenyi lo Kanaani, kanjiwikia mboṟa, 4kanjiwia, ‘Inyi iya, njechikuengeṟia wufee wopfo, na ikupfumbutsa, na Inyi njechikutana nowe itorito lya mkambo ling'anyi, numa njiinenge washari wapfo oruka lu numa yapfo luwe lowo lo mlungana.’ 5Kyasiang'u wulalu wana wapfo wawi kulewafee kulya orukenyi lo Misri kiheri njilawemeche kopfo kulya Misri nyi wana wako, nyiwo Efraimu na Manase wechiwa wako, cha Reubeni na Simeoni. 6Na wana wapfo ochifee numa ya iwa wechiwa nyi wapfo; kui rina lya wana wa mae wechisendo ipfo kyoṟenyi kyawo. 7 Na Inyi lilya njilecha njiwuka Padani, Raheli kanjipfiia orukenyi lo Kanaanyi, njienyi, chi mchumie mleshe kulameshika Efrathipfo. Ngamṟika njienyi ya Efrathi, (nyiyo Bethlehemu.)”

8Israeli kawona wana wa Yosefu, kahamba, “Nyi waki iwa?” 9Yosefu kawia ndee, “Iwa nyi wana wako, Ruwa alenjiinenga iya.” Kahamba, “Hoi, kewaende na koko na inyi njiwawikie mboṟa.” 10Kiherikyo na meso ha Israeli hawemalemeri kipfa kya wuku, manya alaidime iwawona. Kawaende na koke, nao kawahekia momu na iwachunguṟia. 11Israeli kawia Yosefu, “Mbeichi ke njechiwonase kyamu kyapfopfo, na Ruwa amenjiloṟa na ufee wapfo da.” 12Yosefu kawawuta alya ndenyi tsake, nao kaarama na kyamu kashika wanda. 13Yosefu kawika wose wawawi, Efraimu owokonyi loke lo kulyo, iambuyana na owoko lo kumoso lo Israeli; na Manase owokonyi loke lo kumoso iambuyana na owoko lo kulyo lo Israeli; kawatikiria hafui nao. 14Israeli kahoṟuo owoko loke lo kulyo wokikisana na lo kumoso kaluhekia huya mdo ko Efraimu, ulya manawo, na owoko loke lo kumoso kaluhekia huya mdo ko Manase, naweichi chandu aihekia mawoko; kyamba Manase nyio alesonguo ifeo. 15Kawikia Yosefu mboṟa, kahamba, “Ruwa ichu wande wako Abrahamu na Isaki walechumia oshangunyi loke, o Ruwa chu alenjiteteṟa ohendo lo moo foko fose mṟasa inu, 16na malaika alenjiashuo mawichonyi hose nakewikia wanake wa mboṟa! Rina lyako lyisendo huyawo, na marina ha wande wako, Abrahamu na Isaki; nawo wawe mfoeṟa fo wandu kiidi kya oruka.”

17Yosefu kekiwona ke ndee nahekia owoko loke lo kulyo huya mdo fo Efraimu, ikyo kikamsukia mesonyi hake. Kairia owoko lo ndee naluwute huya mdo ko Efraimu, kundu naluhekie huya mdo ko Manase. 18Yosefu kawia ndee, “Chi wudopfo wande oko, kyamba ichu nyi mana mmbe, hekia owoko lopfo lo kulyo mdohu foke.” 19Ndee kaleha, kahamba, “Njiichi, mana oko, nao daa nechiwa mkambo nao daa nechiwa mnene; kyaindi manawo neching'ana kota o, na wufee woke wochiwa mkambo ifoi.” 20 Kyasia Israeli kawawikia mboṟa mfiri fulya kechihamba, “Kiidi kyanu Waisraeli wechiwikia mboṟa, wechihamba, “Ruwa nakuwutie cha Efraimu na cha Manase.” Naho Israeli kawika Efraimu kusonguo ko Manase.

21Numa Israeli kawia Yosefu, “Ambuya, inyi njikeri ipfa, kyaindi Ruwa nechikaa hamu nanyo, nao nechimuwihiṟa tane orukenyi lo wande wanu. 22Ngoseṟa ya isho, inyi ngakuinenga iyo kienga kimu mafumvuhu ngoseṟa kota wana wa mayo, sa njileiwuta mawokonyi ha Waamori, kui oshu loko na uda woko.”

Currently Selected:

MAWOOKIONYI 48: KIM2

Highlight

Copy