MAWOOKIONYI 44

Kirahu kyakoyo ko Benyameni

1Kawawasa ulya mohoṟokia mba yake kechihamba, “Ichuṟa makunyia ha wandu wa kelya chandu weidima iduo, nowike na fesa tsa orio mndu ipfo momunyi ya ikunyia lyake. 2Na kikombe kyako, kikombe kilya kya fesa, nokiwike momunyi fo ikunyia lya ulya mtutu handu hamu na fesa ya Ngano yake.” Nao kawuta chandu Yosefu alemmbia. 3Ngamenyi koikitambaṟuka, wandu wo wakainengo momu wo na nzoi tsawo. 4Na wekikure kulya mṟinyi, ma walameshika haleshe mnu, Yosefu kawia ulya mohoṟokia mba yake, “Kure, nooshe wanduwa, na iyo komewakoya, wawie, ‘Nki ili motaa mawicho ko mecha?’ Nki ili moiwa kikombe kya mndumii oko. 5Ngesa! Kikombe-ki chi kilya mndumii oko ekenyoya? Nao nkyo ekelasha nakyo. Mulewuta owicho ili mletana mudo.”

6Kawaosha numa, kawakoya, na iwawia madedo ho. 7Wakambia, “Nki ili mndumii oko aihamba madedo cha iho? Manyale! Masinga hapfo walawute wado. 8Ambuya fesatso luletsiwona momunyi ya makunyia hadu, lulekuendiese luwuka orukenyi lo Kanaani. So luidimese luda iiwa fesa ang'u sahapu kanyi ko mndumii opfo? 9Icho echikoya ai nakyo kiidi kya masinga hapfo na napfe, naso daa lochiwa masinga ha mndumii oko.”

10Kahamba, “Nahong'u kiwe kido chandu mohamba, Mndu echikoyo ai nakyo nechiwa isinga lyako; nanyo mochikaa mlawode mti.” 11Wakapfuṟukana owinyi, wakasotsia wanda orio mndu na ikunyia lyake, na ipfunguo orio mndu na ikunyia lyake. 12Nao kawalia kawokia ko ulya ang'anyi na imarisia na ko ulya mtutu. Kikombe kikawono ikunyienyi lya Benyameni. 13Wakaranduo nguo tsawo, wakahekia orio mndu mhanda foke huya nzoi yake, wakawuya na mṟinyi.

14Yuda na wana wa mae wakacha na kanyi ko Yosefu, nao amonyi naweipfo, nawo wakamwolokia wanda na kyamu. 15Yosefu kawawia, “Nkindo kiki iki mlekiwuta? Mlemanya ke mndu cha inyi njechiidima ilasha?” 16Yuda kahamba, Luwie kiki mndumii oko? Ludede luda? Lukauwalie luda wusumhanyi? Ruwa amewona wuwicho wo masinga hapfo. Ambuya, so lui masinga ha mndumii oko, so na icho sa kikombe kilekoyo owokonyi loke. 17Kyaindi kahamba, “O manyale, njilawute njidi msa kikombe kilekoyo owokonyi loke, nyio echiwa isinga lyako. Nanyo kuhendienying'u ko ofoṟo ko ndeanu.”

Yuda adeda kya Benyameni

18Nalyo Yuda kamsembelia, kahamba, “Hoi mndumii oko, isinga lyapfo lyikekudedia idedo limu madunyi ha mndumii oko, manya nyashi yapfo ilanjiakie isinga lyapfo, kyamba iyo nyi kimu na Farao. 19Iyo mndumii oko kuleluwesa so masinga hapfo, kochihamba, ‘Ngesa muwode ndeanu, ang'u wana wa mayanu?’ 20Lukaakuwia iyo, mndumii oko, Luwode ndeadu, nao nyi mmeku, na mana o wukunyi namtutu, na mana mae nalepfa; natsuhee ho o amonyi o wusunyi wo mae, na ndee namkundi. 21Koluwia so masinga hapfo, ‘Meendenyi na koko, kundu meso hako hamwambuye.’ 22Lukaakuwia, mndumii oko, ‘Manakecho eidima ida ndeepfo, kipfa kada ndee, ndee nechipfa.’ 23Koluwia masinga hapfo, ‘Alamesoke mano mayanu-cho mtutu hamu nanyo, mochiwonase kyamu kyakopfo.’ 24Naho lilya lulehenda ko isinga lyapfo wande oko, lukambia madedo hapfo, mndumii oko. 25Nahong'u ndeadu kadeda, ‘Wuyenyi napfo mkeluhuṟia kelya sa kitutu.’ 26Lulehamba, ‘Loidima ihendapfo; mano mayadu mtutu ai hamu naso, lochisoka; kyamba lochiidima iwona kyamu kya mnduchopfo, mano mayadu mtutu alamekae naso.’ 27Isinga lyapfo, ndeako, kaluwia, ‘Muichi ke mka oko nalenjiwonyia wana wawi; umu nalewuka koko.’ 28Na inyi ngahamba, ‘Nkya lohi naleranduyoranduyo manya njilembonase wokia ilyopfo. 29Na mukanjisokase na ichu, na ngataṟa tsikamhoya, mochisotsia mhasa yako na fowa kipfunyi.’

30“Kyasia, ngahenda ko isinga lyapfo wande oko, na manakechu alarianyi hamu naso, na chandu mrima foke fuwadanyi na mrima fo manakechu 31kechiwa ili echiwona ke manakechu ai nasopfo, nechipfa; na masinga hapfo wechisotsia mhasa ya isinga lyapfo, ndeadu, na fowa kipfunyi. 32Kyamba isinga lyapfo, lilekuwika mkaṟa o manakechu ko wande, njechihamba, ‘Njilamembihiṟe na kopfo, njechiwada mti ko wande oko mkonu yose.’ 33Kyasia, wulalu ngakuterewa ukudeye inyi isinga lyapfo njikae handu ha manakechu njiwe isinga lya mndumii oko; na manakechu umlekie nahende hamu na wana wa mae. 34Kyamba njechiidima njida ihendia wande, na manakechu alarianyi na inyi? Ngaowuo Njilache iwona mawicho hechihoya wande oko.”

Currently Selected:

MAWOOKIONYI 44: KIM2

Highlight

Copy