MAWOOKIONYI 40

Yosefu atambahaluo ndodo

1Kekishika, numa ya mbonyitso, morutsa mangi ya Misri mvinyo na mokahaṟa mkate oke, wakanyamaṟia mndumii owo, mangi ya Misri. 2Farao kaichio nyashi kipfa kya waṟundi wo wawi. 3Kyasia kawawika kipfungonyi handu hamu na Yosefu. 4Wakakaa kipfungonyi ko mfiri njiangu, na Mnene o waskari waringi wa mangi katana Yosefu nawahoṟokie, wakakaa kipfungonyi ko mfiri njiangu.

5Kio kimu wakalodia ndodo wa wawi, orio mndu na ndodo yake, na ndodo tsawo tsiwefananyi-pfo. 6Yosefu kawachea ngamenyi, kawawona wai wasokie nyi fowa.

7Kawesa waṟundiwo wa Farao, wawei hamu nao ipfo kipfungonyi, kanyi ko mndumii oke, kahamba, “Nki ili shamu shanu shiwodo nyi fowa inu?” 8Wakambia, “Lulelodia ndodo manya luwode msa aidima ilutambahaluyapfo.” Yosefu kawawia, “Itambahaluo chi iṟunda lya Ruwa? Hoinyi kenjiwienyi ndodo tso tsanu.” 9Mnene o werutsa mvinyo kaongoya Yosefu ndodo yake; kambia, “Ndodo yako njilelodia nyi kuwewode msabibu oshangunyi loko. 10Na kulya msabibunyi kuwewode maṟamba haṟaṟu, nafo fui cha ili fuialuka, fukawaṟa shiwaṟo, shimanja shake shikaende ndunda tsamewiṟa. 11Na kikombe kya Farao kiwei mawokonyi hako, ngaira ndunda tsilya tsa msabibu, ngatsikamia kikombenyi kya Farao, ngainengya Farao kikombe owokonyi loke.” 12Yosefu kambia, “Otambahaluo loyo nyi ilu. Maṟamba haṟaṟu nyi mkonu iṟaṟu. 13Mkonu iṟaṟu ikamsia Farao nechikukumbuo, naikuwihiṟa na kiṟundionyi kyapfo; na iyo nochiinengia Farao kikombe owokonyi loke, chando kiwei ili kuwoka. 14Kyaindi nonjikumbuowo na inyi, ili ochiwona mecha, nonjiwutie wuhoya, ngakuterewa, nonjikumbuowo ipfo ko Farao, na injiwuta kunu kiidi kya mba i ya wupfungo. 15Kipfa kya lohi njileiwo kuwuka orukenyi lo Waebri; manya iya daa njiwutie kindo kyose kiwicho tane wanjiwika kipfungonyipfo.”

16Mnene o walya wekahaṟa mkate kekiwona ke otambahaluolo nyi lo mecha, kawia Yosefu, “Na inyi-da njiwewei kilodionyi kya ndodo yako; na ambuya, kuwode mapongo haṟaṟu ha mkate miili huya mdo foko. 17Na kulya ipogonyi lo huye, luwewode orio mbaṟi ya kelya kya Farao, maṟunda ha wekahaṟa mkate kyaindi; shilehe shikalya shelya shilya sha ipogonyi huya mdo foko.” 18Yosefu kahaluo, kechihamba, “Otambahaluo loyo nyi ilu. Mapongo haṟaṟu nyi mkonu iṟaṟu. 19Mkonu iṟaṟu ikamsia Farao nechikuwuta kifungonyi, na idumbuo mdo fopfo, na ikumasa kidihu, na shilehe shechilya nyama yapfo.”

20Nahong'u mkonu fo kaṟaṟu, mkonu fo ifeo lya Farao, kasungusia mfuho ko masinga hake hose; kapfunguo mnene o werutsa mangi mvinyo, na mnene o wekahaṟa mkate kawawika oshangunyi lo waṟundi wake. 21Kawihiṟia mnene o werutsa mangi mvinyo kiṟundio kyake kerutsa mangi mvinyo, nao kaenengia Farao kikombe owokonyi loke 22Indi kamasa kidihu mnene o wekahaṟa mkate, chando Yosefu alewatambahaluya. 23Kyaindi manya kudo mnene ulya o werutsa mangi mvinyo alekumbuose Yosefupfo.

Currently Selected:

MAWOOKIONYI 40: KIM2

Highlight

Copy