MAWOOKIONYI 39
39
Mka o Potifa na Yosefu
1Naho Yosefu kaendo mṟasa Misri; na Potifari mchili o Farao mnene o waskari, mndu o Misri, kamhuṟa kuwuka Waismaeli wo walemende napfo. 2 Mndumii-Ruwa kakaa hamu na Yosefu, nao kaengeṟeka; nao nawei mmbenyi ya mndumii oke, Mmisri ulya. 3Mndumii oke kawona ke Mndumii-Ruwa nakeri hamu nao; na ke Mndumii-Ruwa naonyishie shindo shose mawokonyi hake. 4Yosefu kakundika mesonyi hake, kamṟundia. Nao kammbika nawe mohoṟokia mba yake, na isho shose shiipfo kashiwika owokonyi loke. 5Kikawa wokia alemmbika mohoṟokia mba yake, na shose shiipfo, Mndumii-Ruwa kawikia mba iya ya Mmisri ona, kipfa kya Yosefu. Mboṟa ya Mndumii ikakaa ko orio kyose aweshiwode kulya mba na mademenyi. 6Kadea shose awei nasho owokonyi lo Yosefu; manya alamanye mbonyi tsa ikyo kyose kyake, shile na kelyakyo elya tupu.
Na Yosefu nawei mndu mcha, na awode kyamu kicha. 7Numa ya isho, mka o mndumii oke kalanga Yosefu, kambia, “Laa na inyi.” 8Kyaindi kaleha, kambia, “Ambuya, mndumii oko nanjinegie wunene wo shindo shose shikeri kunu mba koke, ma ekekusaṟa kya kindo kyose-pfo. 9Kuipfo mnene kunu mba kota inyipfo, manya anjiimie kindo kyo kyose shila iyopfo, kyamba iyo nyi mka oke. Njiwute wuwichowu wung'anyi wudi njidekio Ruwa?” 10Kawa moengeṟa ideda na Yosefu orio mkonu, manya Yosefu nalakunde ilaa nao ma ideda nao. 11Kikashikia, mkonu fumu, kaida na mba naṟundiepfo iṟunda lyake, manya kulya mba kuweipfo mndu kiidi kya walya wa ipfo kanyipfo; 12mkacho kambada nguo tsake, kechimmbia, “Laa na inyi.” Yosefu kamdea nguo iya yake mawokonyi hake kadicha, kaida na nja.
13Kikashika kekiwona ke namdeya nguo iya yake mawokonyi hake, nao nadicha na nja, 14mka o Patifari kalaha wandu wa kanyi koke, kadeda nawo, kehamba, “Ambuyenyi, Mwebri chu luleendio naluwutia sha mkika. Naida na kunu koko kundu nalae na inyi, ngafihiṟa na ṟu lying'anyi. 15Nahong'u, kekiicho ke ngairia ṟu lyako na ifihiṟa, kadaho nguo i yake ipfo koko kadicha kaida na nja.” 16Kyasia kaleṟia nguo iya kulya koke mṟasa mii oke nachena kanyi. 17Nao kambia madedo na halya, kechihamba, “Isinga lilya lya Kiebri ulemwende na kunu kodu, naida na kunu koko icha injiwutia shindo shilawaṟi. 18Nahong'u njekiiria ṟu lyako, ngafihiṟa, kanjidea nguo i yake kadicha na nja.”
19Nahong'u mii oke kekiicho madedo ha mka oke alemmbia kechihamba, “Isinga lyapfo lyanjiwutia mbonyi cha itso,” nyashi yake ikado. 20Mndumii oke kaira Yosefu kammbika kipfungonyi, handu wapfungo wa mangi wekepfungio.
21 Kyaindi Mndumii-Ruwa kakaa hamu na Yosefu, kamtarama, kamnenga iidikio kyamunyi kya mnene owapfungo. 22Mnene o wapfungo kawika wapfungo wose owokonyi lo Yosefu, na mnene o shindo shose shiwewutika kulya kipfungonyi. 23Manya mnene o wapfungo aleambuya kii owokonyi lo Yosefupfo; kyamba Mndumii-Ruwa nawei hamu nao na ionyisha shose Yosefu alewuta.
Currently Selected:
MAWOOKIONYI 39: KIM2
Highlight
Share
Copy
Want to have your highlights saved across all your devices? Sign up or sign in
Kimochi Bible © Bible Society of Tanzania, 2016.
Free Reading Plans and Devotionals related to MAWOOKIONYI 39
The Power of His Presence
Palace Chronicles: Journeying With Joseph From Pit to Palace
3 Steps to Being a KINGDOM BUILDER in Your Life Today - Part 1
