MAWOOKIONYI 37

Yosefu na wana wa mae

1Yakobo kakaa kulya orukenyi kundu ndee alehenda kulya orukenyi lo Kanaani. 2Ishi nyisho shishari sha Yakobo. Yosefu awewode maaka ikumi na mfungade (17), nawekelisa machondi hamu na wana wa mae, nao nawei manake handu hamu na wana wa Bilha, na wana wa Silipa, waka wa ndee. Yosefu kaendie ndeawo mbonyi tsawo njiwicho. 3Kyasia Israeli kakunda Yosefu kota wana wake wose, kyamba nyi mana o wukunyi woke, (Lyamkeku), kamsungusia kanzi sa njileshe. 4Wana wa mae wakawona ke ndeawo namkundi kota wana wa mae wose, wakamsuo, manya walakunde ideda nao kui ofoṟo.

Ndodo tsa Yosefu

5Kio kimu Yosefu kalodia ndodo, kawia wana wa mae mbonyitso nawo wakaengeṟa imsuo; 6kawawia, “Hoinyi, adanyienyi ndodo ii ngalodia. 7Ambuya, so luwekeri ipfunga shimale kulya demenyi, ate! Kimale kyako kikakure kikahoṟoka, ambuya shimale shanu shikatengeta shikaaramia kimale kilya kyako.” 8Wana wa mae wakambia, “Ngesa! Na lohi iyo nochiluchialiso? Na iyo nochiluikolonyia so?” Wakaengeṟa imsuo kipfa kya ndodo iya yake, na ya madedo hake

9Kalodiase ndodo ingi, kawia wana wa mae, kahamba, “Ambuyenyi ngamelodiase ndodo ingi; ambuya mnengeṟi na meri na nyenyeri ikumi na imu shikanjiaramia.” 10Kawia ndee na wana wa mae; ndee kampomia kambia, “Ndodo njiki iyo olodia? Ngesa! Inyi na mayo na wana wa mayo lochicha ikuaramia tane wanda?” 11 Wana wa mae wakamrihinyikia indi ndee kalindia idedolyo.

Yosefu akumbo

12Wana wa mae wakahenda ilisa machondi ha ndeawo ipfo Shekemu. 13Israeli kawia Yosefu, “Ngesa wana wa mayo chi wailisa machondi kulya Shekemu? Ncho, njikudume kowo.” Kammbia, “Aichu nji iya.” 14Kammbia, “Kehendang'u, nokeambuya kokoya wana wa mayo na wai necha, na ipolyo lyi necha, nonjiendie mbonyi.” Kyasia kamduma kuwuka pichinyi lya Hebronii kashika Shekemu.

15Mndu umu kamkoya, nao naweitengeta-tengeta kulya nuka; mndu ulya kammbesa, kechihamba, “Nki ki uiwalia?” 16Kahamba, “Njiwalia wana wa wama wako; hoi kenjiwia handu wailisa.” 17Mndu ulya kahamba, “Wawuka iya, kyamba ngaicho wehamba, ‘Luhende Dothani.’” Kyasia Yosefu kaosha wana wa mae kawakoya Dothani 18Wakammbona ko aleshe, na alamewakoya, wakaruwa kyama kyake kundu wambahe. 19Wakawiana mndu na odoe, “Aichu malyalodia amcha.” 20Nahong'u kenndenyi, lumbahe na imkumba ṟungunyi lya mṟinga lyimuho, naso luhambe, indo lya nja liwawo lyamlya; numa lukewona ndodo tsake tsechiwaki.

21Kyaindi Reuben kekiicho kamwashuo mawokonyi hawo, kahamba, “Lulambahe.” 22Reuben kawawia, “Mlapusuo samu; mkumbenyi ṟungunyi lya mṟinga ili lii kunu nuka, manya mulampaye;” kundu namwashuo mawokonyi hawo, nambihiṟe na ko ndee. 23Nahong'u Yosefu kekishikia wana wa mae, wakambuta Yosefu kanzu iya yake, kanzu iya njileshe aweṟee. 24Wakamiira wakamkumba ṟungunyi lya mṟinga; na ṟungulyo lyiwewode mṟingapfo.

25Nawo wakadamia wanda welya kelya; wakairia meso hawo, wakawona, ichekeṟo lya Waishmaeli wechicha wawuka Gileadi na ngamia tsawo, warie ubani, na zeri na manemane, wechichumia wechishiduo mṟasa Misri. 26Yuda kawia wana wa mae, “Nkiira kiki iwaha mano wama odu, na isuṟuma samu yake. 27Nndenying'u lumkumbe ko Waishmaeli, mawoko hadu halambike kifaṟe, kyamba o nyi mano wama odu, nyi samu yadu.” Wana wa mae wakaidikia. 28 Wekapa mbucha wa Wamidiani wekishikaho; kyasia wakadosapfo Yosefu kuwuka kulya ṟungunyi, wakakumba Yosefu ko Waishmaeli ko shipeṟengu makumi hawi sha pesa; nawo wakaduo Yosefu tane Misri.

29Reuben kawuya na alya ṟungunyi lya mṟinga, ate! Yosefu ai kulya ṟungunyipfo, karanduo nguo tsake. 30Kawuya na ko wana wa mae, kahamba, “Mana aipfopfo, a inyi njihende ku?” 31Wakaira kanzu iya ya Yosefu, wakashinja ndahina, na ishia kanzu iya samu. 32Wakahenda na kanzu iya nleshe, ya mawoko maleshe wakaendie ndeawo, wakahamba, “Lowona ii; kyasia keitiichie kokoya kanzu ii nyi iya ya mana opfo, ang'u ote.” 33Kaimanya, kahamba, “Nyiyo kanzu ya mana oko, indo lya ngeṟenyi lilemlya; likamranduo randuo.” 34Yakobo karanduo maṟao hake, kaṟaa ikunyia kitsinyi, na ifihiṟia mana mfiri ifoi: 35Wana wake wose, na wana wake wa kika wose wakakure wambihiṟie moo; kya indi kaleha iwihiṟio moo, kahamba, “Ote! Njechiosha mana ulya oko, njechisokio nyi fowa, tane ko wapfu.” Ndee kamkapia kilio. 36Nawo Wamidiani walya wakamkumba kulya Misri, ko Potifari mchili o Farao mnene o waskari.

Currently Selected:

MAWOOKIONYI 37: KIM2

Highlight

Copy