MAWOOKIONYI 35

Yakobo asamiya Betheli

1 Ruwa kawia Yakobo, “Kure, nohende Betheli nokaepfo; nokesungusiapfo rasio lya Ruwa; ichu alekuwonekia kiheri kuledicha mano mayo Esau.”

2Kyasia Yakobo kawia wandu wa mba yake, na wose wawei hamu nao, “Irenyi maruwa mahenu hai kiidi kyanu, mukuheṟemtse, muilache na nguo tsanu. 3Lukaure, ludo luhende Betheli, na inyi njisungusiepfo rasio lya Ruwa; icho alenjiadanyia kiheri kya wukiwa woko, kakaa hamu na inyi orio handu njileida hose.” 4Nawo wakainengia, Yakobo maruwa mahenu hose hawei mawokonyi hawo, na rachi tsiwei madunyi hawo, nao Yakobo katsisuṟuma wanda ya mwaloni fuwei Shekemu. 5Kiheri walewooka kyaṟo, wuowu wo Ruwa wukachea mṟi iya iwewaṟingichie, manya walaoshe wana wa Yakobo.

6Nahong'u Yakobo kashika Luzu, fui orukenyi lo Kanaani, nyipfo Betheli, o na wandu wose wawei hamu nao. 7Kasungusiapfo rasio, kadumbuya handu halya rina, El-Betheli; cha kipfa hondo Ruwa alembonekia kiherikyo aledicha mano mae. 8Debora kapfa, icho alelela Rebeka, kaṟiko sera Betheli wanda ya mwaloni; lyikalaho rina lyalyo ni Alon-bakuthi.

9Ruwa kawonekiase Yakobo, ili alewuya kuwuka Paddan-aramu, kambikia ona. 10 Ruwa kambia, “Rina lyapfo nyi Yakobo; ochikilahose nyi Yakobopfo, kyaindi Israeli lyechiwa rina lyapfo. Kamlaha rina lyake, Israeli.” 11 Ruwa kambia, “Inyi nyi Ruwa menyi pfinya, pfumbuka noengeṟeke; nowe mkambo na mamwingi fo mkambo fo wandu wechiwuka kopfo, na wamangi wechiwuka shitsinyi shapfo. 12Na orukalu njileliia nyamu Abrahamu na Isaki njechikuinenga iyo, na oshari lopfo numa yapfo njechiwanenga oruka-lo.” 13Ruwa kado huye awuka alya handu awei kechideda nao. 14 Yakobo kahoṟotsa ngo alya handu awei kechideda nao, ngo ya maho, kaishimbuo kaletsia huyayo kidaso kya mvinyo, na mafuda ha msinepfu huyayo. 15Yakobo kadumbuya rina handu halya Ruwa aweideda nao, nyi Betheli.

Ifeo lya Benyamini na opfu lo Raheli

16Wakawada kyaṟo wokia Betheli, tane kotsuhaa handu ha mchumie fo oweṟe washike Efrati, Raheli kawooko nyi mawawio ha ufee, mawawio hakaengeṟeka mnu. 17Nahong'u ili awewawio mnu, moambia mana kambia, “Kulaowuo, kyamba nochifee mana ungi o kisoṟo.” 18Nahong'u kechilekia moo, (kipfa nalepfa), kamdumbuya rina lyake nyi Benoni, kyaindi ndee nalemlaha nyi Benyameni. 19Raheli kapfa kaṟiko kulya njienyi ya Efratha, nyipfo Betlehemu. 20Yakobo kahoṟotsa ngo huya kipfu kilya kyake, nyiyo ngo ya kipfu kya Raheli mṟasa inu. 21Kiidima Israeli kaira kyaṟo, kailika ihema lyake ora lo kawi lo mnaṟa fo Ederi. 22 Nahong'u Israeli kekikaa kulya orukenyi, Rubeni kahenda ilaa na Bilha, mka o ndee, Yakobo kaicho mbonyitso.

Wana wa Yakobo

(1Mbo 2:1-2)

Nahong'u wana wo wa Yakobo waweshikie ikumi na wawi. 23Wana wa Lea nyi Reubeni mana mmbe o Yakobo, na Simioni na Lewi, na Yuda, na Isakari, na Zebloni. 24Wana wa Raheli nyi Yosefu, na Benyameni. 25Wana wa Bilha kisinga kya Raheli, nyi Dani na Naftali. 26Wana wa Silipa, kisinga kya Lea, nyi Gadi na Aseri. Iwa nyiwo wana wa Yakobo alefeeo kulya Padan-aramu.

Opfu lo Isaki

27 Yakobo kacha na ko ndee Isaki, kulya Mamre, mṟi fo Arba, nyipfo Hebroni, wuhenunyi kundu Abrahamu na Isaki wawei. 28Ohendo lo moo fo Isaki iwei maaka ihana na makumi nyanya (180). 29Nao Isaki kalekia moo, kapfa, kasangana na wandu wake, amku, wuku wucha. Wana wake Esau na Yakobo, wakamṟika.

Currently Selected:

MAWOOKIONYI 35: KIM2

Highlight

Copy