MAWUTO HA WASU 11
11
1Kyasia wasu na wanawawama wai kulya Yudaya wakashitsyo mbonyi ke wandu wa mbaṟi njihenu nawo wameambya idedo lya Ruwa. 2Petro kekido nahende Yerusalemu walya wadine wakarekyana nao. 3Wehamba, “Nyi kuleida na ko wandu walawadine kolya nawo.” 4Petro kawooka iwaongoya kya osaaṟe kahamba. 5“Nyi njiwei kulya mṟinyi fo Yope njechiterewa ngatambahuka riso lya mrimenyi ngawona kiwonesyo kya kindo kii cha nguo nnene kyechisoka kiwuka ruwehu kyechisotso na makechu hakyo ha haana kikanjikoya. 6Ngakiambuya mnu njechikusaṟa ngawona-pfo mando hai na moo ha madende haana hai mando ha ngeṟenyi na shindo shekekuruo wanda na ndehe tsa kunu shia ruwehu. 7Ngaicho ṟu lyechinjiwia, ‘Kure Petro noshinje nolye!’ 8Ngahamba, ‘Manya, ote hoi Mndumii! Cha kipfa kindo kya ngafu ma kindo kilai kiharami kilemeide dumbunyi lyakopfo.’ 9Ṟu likambia lya kawi liwuka ruwehu, ‘Shishiheṟemtse nyi Ruwa ma kulashitane nyi shilai shiharami.’ 10Kindo ki kikawutika kido kaṟaṟu, kidima shindo shose shikakurwo na kulya huye-se shikadao ruwehu. 11Ate, oweṟe lo wandu waṟaṟu wakahoṟoka oo moongo fo mba iya kundu mbekeri, wawei wadume koko wawuka Kaisaria. 12Naho Mumuyo kanjiwia njiduane nawo ma ndawone njepfio nyi mdo. Nawo wanawawama wa waṟandaṟu wakaduana kimu na inyi. Lukaahenda na kulya mba ya mndu ulya, 13kaluongoya chando awonye malaika ahoṟoki ipfo mba koke kembia, ‘Duma wandu wahende kulya Yope nolahe-pfo Simon elaho nyi Petro. 14Msa echikuwia madedo sa hechikuendye okiio iyo kimu na wa kanyi kopfo wose.’ 15Nahong'u ilindi njiweasa ideda njidi Mumuyo Mwele kawasokya cha lilyandi alusokya so lya kuwoka. 16 Na inyi ngakumbuo-ho idedo lilya lya Mndumii ehamba ke, ‘Yohane nyi alepatisa na mṟinga, kya indi nyo mochipatiso na Mumuyo mwele.’ 17Kyasiang'u ipfo kundo Ruwa amewainengawo kisumbo kilya kilya aleluinenga so ili waidikye Mndumii Yesu Kristo na ikusirya nao aka inyi nyi inyi wu njidime ilehya Ruwa!” 18Wekiicho madedo halya wakatsia wakaṟumisha Ruwa wehamba, “Kyasia Ruwa ameinenga wandu wa mbaṟi njihenu mdumbuye fochiende moo.”
Siṟi ya Antiokia
19 Kikasia walya werahanyika kitewo nyi mawukiwa halya hewoneka kiheri Stefano alewoho wakahenda wakatana washika kulya Foenike na kulya Kipro na Antiokia. Walaongwo idedo lilya ko mndu ungi shile nyi ko Wayuda wo wawenyi. 20Ipfo kiidi kyawo kuwepfo womi wawukye kulya Kipro na Kirene nawo wekishika kulya Antiokia wakadeda na Wagriki wakaongwo ndumi ii ya sia ya Mndumii Yesu. 21Nalo owoko lo Mndumii lukakaa nawo lukaenenga mfeṟa fo wandu fung'anyi fomshika iidikya fukahalukya Mndumii. 22Kyasia ili oloho lo mbonyi tsi tsa wandu wo tsikashika madunyi ha siṟi iya ya Yerusalemu wakaduma Barnaba nahende natane ashika kulya Antiokia. 23Nawo kekishika-pfo na iwona wutonga wo Ruwa wuiho kachihio kawatutuma wose ke wakunde ikuwada na Mndumii kui ngoo njiwanzi. 24Cha kipfa awei mndu mcha amwichuṟe Mumuyo Mwele menyi wuidiki. Na mfeṟa fung'anyi fo wandu fukahalutsyo Mndumii. 25Nahong'u kakure-pfo kahenda Tarso ipfula-pfo Paulo. 26Kekimbona kamwende na Antiokia. Wakakaa wasanzi na siṟi ya hando ha maka fumu fose na ilosha wandu sa wafoi. Na kulewa na kulya Antiokia wa kiloshyonyi wakawooka idumbuyo rina nyi Wakristo. 27Mafiri naho iho waikimbi wakasoka wawuka Yerusalemu wakashika Antiokia. 28 Kukahoṟoka umu-ho owo, rina lyake ewio nyi Agabo, kaloṟa kui pfinya ya Mumuyo Mwele ke nyi kuicha njaa sa ing'anyi ikiṟe idung'ana wuyana wose. Nayo nyi yeshika mafiri halya ha Kaisari Klaudio. 29Na walya wa kiloshyonyi orio mndu chando awemwonyishe wakasanga shedaya wanawawama wai kulya Yudaya sha ndarama. 30Wakawuta wado wakadikya wameku walya kui owoko lo Barnaba na Saulo.
Siṟi yaengeṟa iliso Wukiwa
Currently Selected:
MAWUTO HA WASU 11: KIM2
Highlight
Share
Copy
Want to have your highlights saved across all your devices? Sign up or sign in
Kimochi Bible © Bible Society of Tanzania, 2016.
