MAWUTO HA WASU 12
12
1Kyasia matika nalyo mangi iya Herode kasotsa wa ipfo siṟinyi maata-ho mawoko kewatura. 2Kawaha-ho Yakobo na oshu ulya akeri manomae o Yohane. 3Kekiwona ke nyi kyachihia Wayuda kaengeṟa kawada na Petro. Nalyo kushikye kiheri kya mkate ilaimtarang'ashe. 4 Kekimaa imbada kamkumba kipfungyonyi, kamdambikya wasikari waana waana wamringe. Kahia nyi echimloṟa sumuhana na wandu kiheri Pasaka ilemida-ho. 5Kyasiang'u Petro kakaa a mringe kulya mba ya wapfungo, kya indi kochilingana iterewo Ruwa nyi siṟi kipfa kyake.
Malaika awuta Petro mmbenyi ya Wapfungo
6Kyasia lyandi Herode arie imloṟa sumuhana na wandu lya kio kilya kisongoe Petro kalaa madonyi a mbike kiidi kya wasikari wawi a mpfunge na mshe iwi, na oo moongo kya nja kwiho waringi weringa mba iya ya wapfungo. 7Naho kudi a ichu malaika o Mndumii kawonekya-ho na ipfo kiṟihenyi kukaaka ngela, kapang'alya Petro oo owarihu kambia, “Kekure wulalu kudi!” Na shipfunga shilya shikadawuka ipfo mawokonyi hake. 8Malaika ulya kambia, “Kufunge noṟae shadu.” Kawuta ado. Kawuya imbia, “Urawuye nguo yapfo ya huye nowenjituma numa.” 9Nao kaida na ipfo nja kamwituma numa. Ma nalamanye ke nyi mbonyi ya lohi injiwute nyi malaika, kahamba kulako nyi awona ndodo. 10Wakaida kiringo kilya kya kuwoka na kilya kya kawi. Wakashika oo kichuminyi kya menya kya njia ya kulya mṟinyi. Kikawaṟuhukya ki kyenyi wakaida na mbele akyo. Wakaida njia ya kulya mṟinyi imu wakamaa. Adi peṟeseng'u malaika ulya kamda-ho. 11Nahong'u Petro kekikupang'kyaho necha kahamba, “Wulalu ngamekumanyang'u kya lohi ke Mndumii nyio amduma malaika oke kanjiletsa owokony lo Herode na owedo lo wandu Wayuda lose.” 12Nao kechikusaṟa adi kahenda kulya kundo mba ya Maria ii, ulya akerimae o Yohane ichu ewio rina lyake lya kawi Marko, napfo nyi kusanzye-pfo wandu wafoi wechiterewa. 13Kyasia kekikapakapa mongo fo kichumi kisinga kika ewio rina lyake nyi Roda kacha yadanya. 14Nao kekimanya ṟu li nyi lya Petro nalakiṟuhwo mongo fulya kipfa kya sia iya imbode kaangusha na ipfo mba kaongwo, “Petro nyi ahoṟoki oo mongo wai.” 15Wakambia, “Nyi osukosuko ko!” Nao katimirya ke na wudo kii. Nawo wakahamba, “Ko mmalaika oke.” 16Petro kaengeṟa ikapakapa, nawo wekiṟuhwo wakambona wakawa mkahai. 17Nao kawakemya na owoko watsie. Kawaongoya chando Mndumii ambutie kulya mba ya wapfungo. Kawuya kahamba, “Kehenda kiongoyenyi Yakobo na wanawawama.” Kidima kakure-pfo kahenda kusamya kundo kungi. 18Kukye wasikari walya wakaṟihio mnu chando kilya kya Petro kiwiie. 19Nao Herode kekimpfula nalambone kawesa waringi walya kawawasa ke wawoho. Nao kasoka awuka kulya Yudaya kahenda kulya Kaisaria kakaapfo.
Opfu lo Herode
20Nao aweshimbye mnu wandu wa kulya Tiro na Sidon. Nawo wakakusanza wakamdumya wemterewa; wakiidima iwada mbuya na Bilasto ulya ei mheki o mangi wakamterewa ofoṟo, kiwewye nyi wuhinji wohinjya shindo shelya ipfo wumanginyi woke. 21Kikasia mfiri fumu-ho fuwei mteseheṟe Herode kakuṟika maṟao hake ha kiwumangi kadamya loṟeikehu loke lo wuitoṟi kawadedya. 22Nawo wandu wakairya ṟu lyehamba, “Ru li nyi lya Ruwa chi lya mndu o wandupfo.” 23Oweṟe cha ili malaika o Mndumii kamkapa nyi ili indi alalewikya Ruwa kiṟumi. Kalio nyi mashinu ai na moo kapfa. 24Nalyo idedo lya Ruwa likang'ana lyedung'ana. 25Na Barnaba na Saulo wekiidima iinutsya kihachi kilya wakawuka Yerusalemu wakawuya warie-pfo kimu nawo Yohane ulya elaho nyi Marko.
Barnaba na Saulo wasambuṟo na idumo
Currently Selected:
MAWUTO HA WASU 12: KIM2
Highlight
Share
Copy
Want to have your highlights saved across all your devices? Sign up or sign in
Kimochi Bible © Bible Society of Tanzania, 2016.
