Tindinoowo 8

1Moy fonndetee e hakkilante?

Moy waawi yiitude maanaa goɗɗum?

Hakkillo na laaɓina yeeso tagaaɗo,

ngo lallina ɓalingo muuɗum.

Haala ɗowtagol laamiiɗo

2Miin le, inan ko tinndinammi: kaybaa haala kaananke, sabo ɗum woni hunayeere nde ngaɗɗaa yeeso Laamɗo. 3Taa karanoɗaa woɗɗaade mo. Taa ciinaa daranaade ko boni du, sabo ko o muuyi ɗuum o waɗata. 4Wo haala kaananke kaan laamii, walaa bi'oowo mo: «Ɗume ngaɗataa nii?»

5Jokkuɗo yamiroore makko fuu wuurdan jam. Ɓernde hakkilante du annditan huunde fuu e waawtu muuɗum e no jeyi waɗireede. 6Sabo huunde fuu e wakkatim e ngaɗuki muuɗum, ammaa torra ɓii-Aadama na mawnani ɗum. 7Si goonga o anndaa ko waroyta. Moy hollata mo ko waɗoyta yeeso?

8Walaa fuu jogiiɗo baawɗe dow yonki muuɗum,

walaa du baawɗo neeɓtinande maayde,

walaa mo nde yoppata si wawtum hewtii.

Walaa fuu joppeteeɗo wakkati wolde,

noon du woni bonanda yoppirtaa bonɗo.

Haala dow bonɓe e lobbuɓe

9Mi yi'ii ɗum fuu nde miilinoomi sanne dow ko waɗetee ley sorndu naange fuu. Mi yi'ii tagaaɗo na jaaloo banndum, waɗa ɗum ko boni. 10Katin mi yi'ii bonɓe na uwee. Iɓe naatannoo suudu seniindu iɓe mburtowoo, de iɓe manee ley ngalluure to ɓe ngaɗannoo ko boni toon.#8:10 Woɓɓe na paama aayaare nde hono ni: Katin mi yi'ii bonɓe na uwee de yimɓe na njaha na ngarta de njeggiti bone mo ɓe ngaɗannoo oon. Ɗum du fuu wo ɗum ɓolum.

11Ko bonɓe carataake law ɗuum waɗi de ɓerɗe ɓiɓɓe-Aadama na kebbinaa waɗude ko boni. 12Si goonga, gaɗoowo hakke ina waawi waɗude ko boni kile hemre wooɗi balɗem njuutaa, ammaa miɗo anndi wo kuloowo Laamɗo kam heɓoyta ko wooɗi saabe kulol muuɗum Laamɗo. 13Ammaa bonɗo heɓataa jam sabo hulataa Laamɗo. Balɗe muuɗum njuutataa no ɗowki lekki juutirta laasara peewɗo.

14Ina woodi huunde ɓolde katin waɗeteende ley adunaaru: dartiiɓe ina njeɗee ngeɗu bonɓe de bonɓe njeɗee ngeɗu dartiiɓe. Ɗum du fuu wo ɗum ɓolum.

15Ɗum waɗi de teddinmi weltaare. Walaa fuu ko nafata neɗɗo ley sorndu naange ndu si wanaa nyaama, yara, weltoo. Ɗum ɗowtata golleeji muuɗum tampiriiji e nyalaaɗe ɗe Laamɗo hokki mo ley sorndu naange ndu.

16Mi waɗiino anniya faamude ko woni hakkilantaaku, e taykaade golleeji ɗi tagaaɗo gollata ley adunaaru faa gite mum meeɗataa ɗoyngol jemma e nyalooma fuu. 17Ndeen nji'umi ko Laamɗo waɗi fuu. Fay gooto waawaa faamude ko waɗata ley sorndu naange ndu. No joomum filorii ɗum fuu yiitataa. Fay si hakkilante wi'ii na anndi du, waawataa yiitude.

Currently Selected:

Tindinoowo 8: FBF

Highlight

Copy