Tindinoowo 7
7
Hakkillo nafoowo nguurndam
1Anndireede ko wooɗi
ina ɓuri anndireede uurdi.
Nyannde maayde
ina ɓuri nyannde rimeede.
2Yaade galle maayraaɗo
ina ɓuri yaade galle jom fijo,
sabo maayde wo cakitte neɗɗo fuu,
sey buurɗo fuu miiloo ɗum e ley ɓernde mum.
3Cunu na ɓuri jaleeɗe
ngam cunu na niɓɓina yeeso de na laamna ɓernde.
4Ɓernde hakkilante wonaanaa suudu maayraaɗo,
de ɓernde puuyɗo wo suudu fijirde.
5Hettindaade pelooje hakkilante
na ɓuri hettindaade jimi puuyɗo.
6Jaleeɗe puuyɗo ina nandi e sawtu gi'e kuɓɓooje
ley fayande.
Ɗum du fuu wo ɗum ɓolum.
7Hollude ɓural na bonna jom hakkillo faa laatoo puuyɗo,
njeenaari ndi dagaaki du na tuunina ɓernde.
8Timmoode huunde na ɓuri fuɗɗoode mum,
munyal du na ɓuri manngu becce.
9Taa njaawaa ɓernude
sabo ɓernugol tawataakenaa e ɓernde puuyɗo.
10Ndeentoɗaa e ƴamude, «Ko waɗi de arande na ɓuri hannden?»
Filaade paamal majjum wanaa hakkillo.
11Hakkilantaaku ina wooɗi hono ndongu laaɓungu,
ina nafaa warooɓe ley adunaaru sorndu naange ndu.
12Hakkilantaaku na reena hono no buuɗi reenirta joomum nii,
ammaa nafaa hakkillo ina ɓuri noon:
Ingo wuurna joomiingo.
13Ndaaraa golle Laamɗo.
Moy waawi turtude ko o turi?
14Nyannde weltaare finii fu, mbeltoɗaa.
Nyannde mettorgal finii du, miiloɗaa,
sabo Laamɗo waɗii ɗe ɗiɗi fuu.
Ndelle tagaaɗo waawaa faamude ko warata.
15Ley nguurndam am ɓolam ɗam, walaa fuu ko mi yi'aay:
maayde dartiiɗo e ley dartaare muuɗum,
e bonɗo juunnaaɗo balɗe
de na heddi e bonanda muuɗum.
16Taa ɗuuɗin fonnditaare maa,
wooɗi du taa kollitoɗaa a jom hakkillo sanne
de pooɗanaa hoore maa halkere.
17Taa ɗuuɗin bone maa,
wooɗi du taa laatoɗaa puuyɗo,
de maaya illa wakkati maa hewtaay.
18Na wooɗi njogitoɗaa ɗum ɗo
de taa njoppaa ɗum too du.
Kulɗo Laamɗo jogoto ɗiɗum fuu.
19Hakkilantaaku ina semmbinɗina joomum
faa ɓura worɓe sappo ardiiɓe ngalluure.
20Ley adunaaru ɗo, walaa neɗɗo fay gooto dartiiɗo
gaɗoowo ko wooɗi mo walaa hakke.
21Taa ngattaa hakkillo maa e ko nanataa fuu
de nanaa maccuɗo maaɗa na yenne,
22sabo aɗa anndi aan e hoore maa
a yenniino woɓɓe.
23Ɗum fuu mi hiinyirii ɗum hakkillo, mbiimi: «Mi laatoto hakkilante», de tawumi ina woɗɗi kam. 24Faamude no kujje ngorri na luggi, na tiiɗi faamude. Moy waawi yi'ude ɗum?
25Mi tinnake e filnde e faamude e hiinyude hakkilantaaku, wooɗi mi faama no puuyndam boniri e no cuubu laatorii kaanɗi.
26Mi yi'ii ko ɓuri maayde kaaɗeefi: debbo laatiiɗo tuugol, mo ɓernde teppol e juuɗe callali. Kuloowo Laamɗo fu hisan mo, ammaa o nannginan gaɗoowo hakke.
27Tindinoowo wi'i «Wooɗi, inan ko taykiimi: Mi hiinyii huunde fuu gootel gootel faa mi yiita, 28de faa hannden mi yiitaay ko pilotonoomi ɗuum. Si goonga ley worɓe ujunere mi yi'ii gooto dartiiɗo ammaa ley rewɓe kaa mi yi'aay fay gooto. 29De inan ko njiimi ley tayka am: Laamɗo tagii neɗɗo wo ponnditiiɗo, ammaa o tewtanii hoore makko dabareeji ɗuuɗɗi.»
Currently Selected:
Tindinoowo 7: FBF
Highlight
Share
Copy
Want to have your highlights saved across all your devices? Sign up or sign in
© SIM International 2012, 2022
