Tindinoowo 10
10
1Buubi baatuɗi na mbonna uurngol nebbam,
noon puuyndam seeɗa du bonnirta hakkillo e teddeengal.
2Ɓernde hakkilante yaaran ɗum to wooɗi,
ɓernde bonɗo du yaara ɗum to boni.
3Fay no puuyɗo yaarata dow laawol noon wo rafi hakkillo,
ina holla yimɓe fuu puuyndam mum.
4Si hooreejo tikkanii maa fu,
taa dillu nokku maa,
sabo heesindaare na sawra boofi mawɗi.
5Inan masiiba mo njiimi ley sorndu naange ndu,
boofol ƴuurungol to hooreejo:
6fuuyɓe toownete nokkuuje ɗuuɗɗe,
de tedduɓe leeƴinee.
7Mi yi'ii maccuɓe na mbaɗɗii pucci hono ɓiɓɓe laamu,
de ɓiɓɓe laamu na njaha e koyɗe hono no maccuɓe noon.
8Basoowo ngayka saaman ley makka,
liɓoowo kokuwol du, mboddi ŋatan ɗum.
9Lakkitoowo kaaƴe nawnoto,
noon cehoowo leggal du nawnirta hoorem.
10Si hunnduko jammbere mettii fu,
sanaa semmbe tawee,
de wo hakkillo waddata jaalagol.
11Si mboddi jom sirri ŋatii fu,
walaa fuu ko ndi nafata jom sirri oon.
12Haalaaji hakkilante wo moƴƴere,
ammaa ɗi puuyɗo ɗiin na kalka ɗum.
13Fuɗɗoode haala mum wo puuyndam,
cakitte makka wo kaanɗi bonɗi.
14Haalaaji puuyɗo na keewi du.
Walaa annduɗo ko finata jaango.
Moy waawi hollude mo ko waroyta caggal makko?
15Gollal puuyɗo tampinta ɗum,
o anndaa fay no o naatirta wuro.
16Wayyoo, bone woodanii leydi ndi suka laamii,
de ɓiɓɓe laamu mayri na mbeltoo gilla weeti.
17Barke woodanii leydi ngoodundi kaananke dimo
de ɓiɓɓe laamu mayri na nyaama wakkati kaanɗo
faa keɓa semmbe wanaa faa keɓa njaram.
18Si neɗɗo na hoyfi fu, kummbudi suudum wo saaman.
Si juuɗem na njaasi du, suudum wo si'an.
19Nyaamndu na wadda mbelirka, njaram du na seyna,
de buuɗi kaa na kumta huunde fuu.
20Taa njennaa kaananke fay ley miilo maa,
Taa kuɗaa jom jawdi ley suudu maa to pukkotoɗaa,
sabo foondu na waawi yaarande ɗum haala maa,
fiirooru na waawi yaarande ɗum kabaaru majjum.
Currently Selected:
Tindinoowo 10: FBF
Highlight
Share
Copy
Want to have your highlights saved across all your devices? Sign up or sign in
© SIM International 2012, 2022
