Mateo 5

Ncango zaha lipili

1Oho Yeshu amonene makunge a bantu, wakandamine ha lipili, pe wekalile hanci. Bandongesha bendi bezile kukwendi, 2pe watatikile kubalongesha.

Mfuywezi

(Luka 6:20-23)

3Bali na mfuywezi baya ba kuliyuvwa kushepwa mu moyo,

ndaba wene wa muyilu unengi wabo.

4 # Isha 61:2. Bali na mfuywezi baya ba kulila,

ndaba bakababengezeka.

5 # Nyi 37:11. Bali na mfuywezi baya ba kulilimbwilisha,

ndaba bakakona hano hanci.

6 # Isha 55:1-2. Bali na mfuywezi baya bali na nzala na linyontwa lya bya kulunga,

ndaba bakekuta.

7Bali na mfuywezi baya bali na nceshe,

ndaba bakabayuvwila nceshe.

8 # Nyi 24:3-4. Bali na mfuywezi baya banayele mu mitima,

ndaba bakamona Nyambi.

9Bali na mfuywezi baya ba kutabwela bantu,

ndaba bakatoyiwa ngayi bana ba Nyambi.

10 # 1Pita 3:14. Bali na mfuywezi baya bakuyandishiwa ha bya kulunga,

ndaba Wene wa muyilu unengi wabo.

11 # 1Pita 4:14. “Muli na mfuywezi ndi bantu ba kumitukana na kumiyandisha na kumibangila byabibi nimwabyo bya mahalo ndaba yami. 12#2Bya 36:16; Mil 7:52. Wahililenu na kutangala, ndaba ncuungu yenu yayinene muyilu. Eshe nisho bayandishile bamiluwe baya bekalileko enu oho shilolo muhemuwe.

Mushele na lumuni

(Mako 9:50; Luka 14:34-35)

13“Enu muli mushele wa hano hanci, ngoboni ndi mushele unahamuku, ukatobalishiwa nahiti? Kutwesha kutobiwa kami hiwufwako, nohobene, ukuyumbiwa hanci, pe bantu ba kuwulyata na mawulu.

14 # Yowa 8:12; 9:5. “Enu muli lumuni lwa kaye. Munzi unazikiwi ha shinkanda kutwesha kuholekiwa wufwako. 15#Mako 4:21; Luka 8:16; 11:33. Hinge bantu kutwesha kumunika lambi na kuyiyaka mu nceto ya lulonga lwa kukunama bafwako. Ngoboni ba kuyiyaka haya yiku moneka ngayi yimoneshe bali mu litala nimwabo. 16#1Pita 2:12. Nohobene lumuni lwenu lumunike ku bantu, ngayi mwanga bamone milimo yenu yayiwahe, pe bapane maleema kuli Tatiyenu wa muyilu.

Bilongesha bya ha ndayano

17“Hinga muhanganika ngayi ninezi na kumanisha mulao hinge ku longesha kwa bamiluwe, kaliha ninezi na kumanisha, ngoboni ninezi ngayi bitendiwe. 18Mwa shikuma nikumitongweza ngayi, hantu liyilu na hanci binapiti, kowa koma hinge kalizu kakashe katikitiwa kakafuma ku mulao, hantu nimwabyo binatendiwi. 19#Luka 16:17. Ou nimwendi ukakiluka zimo zazishe kuneze ndayano na ku longesha bantu noho, niye ukatoyiwa wamushe mu Wene wa muyilu. Ngoboni ou ukazombatala na kuzilongesha, ukatoyiwa wamunene mu Wene wa muyilu. 20Ndaba nikumitongweza ngayi, ndele kulunga kwenu kupitakane kuya kwa bakakulongesha ndayano na Bafwalishi, pe kukengina mu Wene wa muyilu mufwako.

Bilongesha bya ha kupilama

(Luka 12:57-59)

21 # Kut 20:13; Nday 5:17. Mwayuvwile eshe bambile bashikale ngayi, “Hinga uziha, kami ou ukuziha uku fwanina kuyatishiwa.” 22Ngoboni haya ami nikumitongweza ngayi, ou ukupilamina kawushinda wendi, uku fwanina kutwaliwa ku nkuta. Ngoboni ou ukutoya kawushinda wendi ngayi, “Uli shibulangana,” uku fwanina kutwaliwa ku mundilo wa Ngehena.

23Nohobene ndi ukutwala ntupu yobe kuli Nyambi ku kaala, pe hiukanuka ngayi uli na shambo na kawushinda wobe, 24shiya ntupu yobe kumbili ya kaala. Boka taha ukalyambwilile na kawushinda wobe, nihoboni uboke na kutupula ntupu yobe kuli Nyambi.

25Liyuvwashane wangu na uya ukuya mu kukuyatisha ku nkuta. Liyuvwashane nendi oho shilolo akakume ku nkuta, kutina ukakutwala ku mukakuyata, pe mukakuyata akakuyaka mu maboko a mukakulama, uya ukakupatilila mu tolongo. 26Mwa shikuma nikumitongweza ngayi kukafumamo wufwako hantu unamanishi kuyumba uya mulandu.

Bilongesha bya ha wunjenge

27 # Kut 20:14; Nday 5:18. Mwayuvwile eshe bambile ngayi, “Hinga mutendanga wumambe.” 28Ngoboni hano nikumitongweza ngayi ou nimwendi ukutilamina mbuyama na kulishoza, watenda kale nendi wumambe mu mutima wendi. 29#Mat 18:9; Mako 9:47. Ndi liho lyobe lya shilyo likukupukalisha ngayi utende wubi, litompole, pe uliyumbe. Ndaba shashiwahe kukwobe kuyumba shimamo shobe kupitakana ngayi lutu lwobe nimwalwo lukayumbiwe ku Ngehena. 30#Mat 18:8; Mako 9:43. Pe ndi liboko lyobe lya shilyo likukupukalisha ngayi utende wubi, liketule, pe uliyumbe. Ndaba shashiwahe kukwobe kuyumba shimamo shobe, kupitakana ngayi lutu lwobe nimwalwo lukayumbiwe ku Ngehena.

Bilongesha bya ha kuziha maluwo

(Mateo 19:9; Mako 10:11-12; Luka 16:18)

31 # Nday 24:1-4; Mat 19:7; Mako 10:4. “Shambiwile kami ngayi, ‘Ou nimwendi wa ku lubula mukazendi uku fwanina ku mu pana liñwati lya ku ziha maluwo.’ ” 32#Mat 19:9; Mako 10:11-12; Luka 16:18; 1Koli 7:10-11. Ngoboni haya ami nikumitongweza ngayi mulume wakulubula mukazendi ndele ndaba ya kutenda wunjenge, ukamwinga mukakutenda wunjenge ndi ukayekiwa. Kami nimwendi ou ukamuyeka, ukatenda nendi wumambe.

Bilongesha bya ha kulibeza

33 # Bal 19:12; Kul 30:2; Nday 23:21. “Kami mwayuvwile shambiwile ku bashikale ngayi, ‘Hinga mubeza bya mahalo, ngoboni tendela Mwene osho walibezele nendi.’ 34#Yako 5:12; Isha 66:1; Mat 23:22. Ngoboni ami nikumitongweza ngayi, hinga mubezanga, hinge na liyilu ndaba lyenga litanda lya Nyambi. 35#Isha 66:1; Nyi 48:2. Hinge hano hanci ndaba henga ha malyatilo a mawulu wendi, hinge na Yelushalema, ndaba lwenga lukena lwa Mwene wamunene. 36Kami hinga ubeza na mutwe wobe ndaba kutwesha kufutula luhuki lumo mu kutuba hinge mu ku shipa wufwako. 37Ngoboni mwambe ngayi, ‘Ee,’ hinga ngayi, ‘Byo,’ shaku nungako nimwasho, shikufuma ku mukawubi.

Bilongesha bya ha kubweshela wubi ku wubi

(Luka 6:29-30)

38 # Kut 21:24; Bal 24:20; Nday 19:21. “Mwayuvwile shambiwile ngayi, ‘Kubokeshiwe liho na liho, liyewe na liyewe.’ 39Ngoboni haya nikumitongweza ngayi, hinga mubweshela wubi ku muntu ukumibipishila. Ngoboni ndi muntu unakukama ha ntanta ya shilyo, mutengekele ntanta yamina kami. 40Kami ndi muntu ukushinga ku kuyatisha ngayi akuyangule shikobelo shobe, mushiyile na canci kami. 41Kami ndi muntu ukukukandikiza kwenda mukala umo, umushindikize mikala yibili. 42Ou ukukunyepa mupanike, hinga uyumina ou ukushinga kuwila kukwobe.

Kuhaka bakankole

(Luka 6:27-28, 32-36)

43 # Bal 19:18. “Mwayuvwile shambiwile nehe ngayi, ‘Haka ndambo yobe, pe zimba mukankole wobe.’ 44Ngoboni nikumitongweza ngayi hakenu bakankole benu, kami lombelelenu baya ba kumiyandisha, 45ngayi mwinge bana ba Tatiyenu wa muyilu. Ndaba ukututwishila bantu bababi na babawahe mutena wendi, kami ukulokeshela bakwoloka na bababi mvula wendi. 46Ndaba ndi mu ku haka baya ba kumihaka, mukawana ncuungu ngani? Kati baka mitelo kaliha nisho benganga nanibo ndi? 47Kami ndi mu kushangwisha tuhu bawushindawenu, mu kupitakana nahiti bamina? Kati bakalitunga kaliha batendanga noho ndi? 48#Bal 19:2; Nday 18:13. Ngonehe Tatiyenu wa muyilu enga wakulembuka, nohobene nenu lembukenu.

Currently Selected:

Mateo 5: LLK

Highlight

Copy