Mateo 4

Kwezekiwa kwa Yeshu

(Mako 1:12-13; Luka 4:1-13)

1 # Bah 2:18; 4:15. Niho Moyo watwalile Yeshu mu libelelengwa mukwezekiwa kuli Shatana. 2Munyima ya kuzila kulya matena makumi anaa mwaana na wushiku Yeshu wayuvwile nzala. 3Oho Shatana ezile kukwendi, pe wambile ngayi, “Ndi uli Mwana Nyambi, layelela awa mamanya afutuke mankende.” 4#Nday 8:3. Ngoboni Yeshu wakumbwile ngayi, “Kwatikitiwa ngayi, muntu ku fwanina kuyoya na linkende tuhu wufwako. Ngoboni ukayoya na mazu nimwawo akufuma mu kanwa ka Nyambi ya Ngula!”

5Niho Shatana amutwalile ku Yelushalema, Lukena lwa Kuyela, pe wamuyakile hayilu ha mamaninino a Litala lya Nyambi. 6#Nyi 91:11-12. Pe wambile kukwendi ngayi, “Ndi uli Mwana Nyambi, kilukila hanci, ndaba kwatikitiwa ngayi,

‘Nyambi u ka layelela mangeloyi wendi ngayi baka ku lame,

pe baka ku baka na maboko wabo,

ku tinisha liwulu lyobe kulituntula ku limanya.’ ”

7 # Nday 6:16. Yeshu wakumbwile kukwendi ngayi, “Kwatikitiwa kami ngayi, ‘Hinga wezeka Nyambi ya Ngula, Nyambi yobe.’ ”

8Shatana kami wamutwalile ha lipili lyalitali shikuma, pe wamumoneshele matunga nimwao a hano ha kaye na wuwahe wawo. 9Wambile kukwendi ngayi, “Ebye nimwabyo nika kupana, ndi ukashintama ku manungo na kundemesha.”

10 # Nday 6:13. Yeshu wakumbwile kukwendi ngayi, “Fuma kukwami obe Shatana! Ndaba kwatikitiwa ngayi, ‘Uku fwanina kulemesha Mwene Nyambi yobe na kumutendela milimo niye tuhu.’ ”

11Niho Shatana amushiyile, kami mangeloyi ezile amutendelele milimo.

Yeshu ukutatika mulimo wendi mu Ngalileya

(Mako 1:14-15; Luka 4:14-15)

12 # Mat 14:3; Mako 6:17; Luka 3:19-20. Yeshu oho ayuvwile ngayi Yowano ba na muyaka mu tolongo, wayile ku Ngalileya. 13#Yowa 2:12. Watuntukile ku Nazaleta, wayile na kwikala mu Kapenauma, munzi wa hahepi na Liziba lya Ngalileya, mu litunga lya Zembuloni na Nafwitali. 14Ngayi kutendiwe ebye ambile muluwe Ishaya ngayi,

15 # Isha 9:1-2. “Litunga lya Zembuloni na litunga lya Nafwitali,

nzila yikuya ku liwate,

mu nciza ya Yondana, Ngalileya wa Bakamatunga.

16Bantu aba bekalilenga mu mincimpwe,

banamono lumuni lwalunene.

Kami baya bekalilenga mu litunga lya mubombola wakufwa,

lumuni luna ba muniki.”

17 # Mat 3:2. Kufuma ku shikati shiyo, Yeshu watatikile ku shimikila ngayi, “Tengulukenu, ndaba Wene wa muyilu uli hahepi.”

Yeshu ukwihana bakakushashila banaa

(Mako 1:16-20; Luka 5:1-11)

18Yeshu oho akulishilenga ku Liziba lya Ngalileya, wamonene muntu na mukonzo wendi, Shimoni ukutumbiwa Pita na mukonzo wendi Anduleu. Bamanyikilenga kanyanzi kabo mu liziba, ndaba bengile bakakushashila. 19Yeshu wambile kukwabo ngayi, “Nkonkenu, nikaminga bakakushashila bantu.” 20Wanguwangu bashiyile tunyanzi twabo, pe bamukonkele.

21Oho ayile kumbili wamonene babili bamina muntu na mukonzo wendi, Yakoba na Yowano bana ba Zebende, bekalile mu wato na tatiyabo Zebende, hibatungulula tunyanzi twabo. Yeshu wabehanine. 22Wanguwangu bashiyile wato wabo na tatiyabo, pe bamukonkele.

Yeshu uku longesha na ku shimikila na kunyongomanisha

(Luka 6:17-19)

23 # Mat 9:35; Mako 1:39. Yeshu wapitilenga mu Ngalileya nimwamo, walongeshelenga mu mashinangonge, washimikililenga ncango zaziwahe za Wene. Wanyongomanishilenga bantu baya bekalile na malweli nimwawo na makolano. 24Mpupo yendi yatumbalalile mu Shiliya nimwamo, pe baletele kukwendi bakakukola nimwabo bekalile na malweli a mishoboshobo, baka mayimbwe na baka kamfunya na baka lukuku, pe Yeshu wabanyongomanishile. 25Likunge lyalinene lya bantu baya bafumine ku Ngalileya na ku Minzi Likumi naku Yelushalema na ku Yundeya na mu nciza ya Yondana bamukonkele.

Currently Selected:

Mateo 4: LLK

Highlight

Copy