Mateo 16

Bafwalishi na Bashanduki bakushinga shikomokesho

(Mako 8:11-13; Luka 12:54-56)

1 # Mat 12:38; Luka 11:16. Bafwalishi na Bashanduki bezile kuli Yeshu na kumwezeka, pe bamunyepele ngayi abamoneshe shikomokesho sha kufuma muyilu.

2Yeshu waba kumbwile ngayi, “Mutena oho ukulela, mu kwamba ngayi, ‘Nzona kukekala linanga ndaba liyilu linafubili.’ 3Pe lumenemene mukwamba ngayi, ‘Lelo mvula ukuloka, ndaba liyilu linafumbuluku na ku shipa.’ Mukulimuka kutontolola eshe liku moneka liyilu, ngoboni kutwesha kutontolola bimonekesho bya bikati mufwako. 4#Mako 12:39; Luka 11:29. Mukoka ou wawubi na wa wunjenge ukushinga shikomokesho, ngoboni kowa shikomokesho shikatendiwa kukwenu, ndele shikomokesho sha Yona.” Niho Yeshu abashiyile, pe wayile.

Mumena wa Bafwalishi na Bashanduki

(Mako 8:14-21)

5Oho bandongesha ba Yeshu bazabukilile mu nciza ya liziba, bavulamine kushimba mankende. 6#Luka 12:1. Yeshu wambile kukwabo ngayi, “Keyenu, bengukenu ku mumena wa Bafwalishi na Bashanduki.”

7Nohobene balyambashanine umo na wamina ngayi, “Unamba nehe ndaba shilolo tushimbe mankende.”

8Yeshu walimukile ebye balyambashaninenga, pe wabepwile ngayi, “Enu bakakukulupila kwakushe! Bishini mu kulyambashana ngayi mankende mufwawo? 9#Mat 14:17-21. Kati ku yuvwishisha mufwako ndi? Kati kwanuka eshe napabwile mankende mutanu na kulisha bantu makulukazi mutanu mufwako ndi? Kati mwenzalishile zintumba zinga za ncankuncanku? 10#Mat 15:34-38. Hinge mankende mutanu na abili aya ekutishile makulukazi anaa, kati mwenzalishile bibondo binga bya ncankuncanku? 11Ndaba ngani mu kubula ku yuvwishisha ngayi kwamba bya mankende nifwako. Ngoboni keyenu ku mumena wa Bafwalishi na Bashanduki?”

12Niho bandongesha bayuvwishishile ngayi kaliha wabatongwezelenga bya kukeya ku mumena wa mankende, ngoboni ngayi bakeye kuku longesha kwa Bafwalishi na Bashanduki.

Pita ukutontolola Yeshu

(Mako 8:27-30; Luka 9:18-21)

13Oho Yeshu akumine mu litunga lya Sheshaliya Fwilipu, wepwile bandongesha bendi ngayi, “Kati bantu ba kutoya Mwana Muntu ngayi yani?”

14 # Mat 14:1-2; Mako 6:14-15; Luka 9:7-8. Niho bakumbwile ngayi, “Bamo bakwamba ngayi Yowano Mukakuzubilisha, bamina bakwamba ngayi obe Eliya, kami bamina bakwamba ngayi obe Yelemiya, hinge umo wa bamiluwe.”

15Yeshu wabepwile ngayi, “Haya enu mukwamba ngayi ami yani?”

16 # Yowa 6:68-69. Shimoni Pita wakumbwile ngayi, “Obe uli Kilishitu Mwana Nyambi wakuyoya.”

17Yeshu wakumbwile ngayi, “Obe Shimoni, mwana Yona uli na mfuywezi, ndaba ebye unatontololo kufuma ku muntu bifwako ngoboni kuli Tate uli muyilu. 18Ami nikukutongweza ngayi, obe uli Pita, pe ha limanya elye nikatendaho litengo lyami, kami ngovu za lufu kukatwesha kulipitakana zifwako. 19#Mat 18:18; Yowa 20:23. Nikakupanika makiyi a Wene wa muyilu. Eshe nimwasho ukamanga hano hanci shikamangiwa kami muyilu, pe nimwasho eshe ukamangulula hano hanci, shikamangululiwa kami muyilu.”

20Niho Yeshu acincikile bandongesha bendi ngayi hinga bamutontolola ku muntu ngayi niye Kilishitu.

Yeshu ukwamba bya makando na lufu lwendi

(Mako 8:31—9:1; Luka 9:22-27)

21Kufuma ku shikati shiyo Yeshu watatikile kutongweza bandongesha bendi ngayi, “Nafwanini kuya ku Yelushalema, mwanga nikayandishiwe shikuma ku bakulwane ba Bayunda na bakankombela ba bakulwane na bakakulongesha ndayano. Pe nikazihiwa, ngoboni nikashanguka ha mutena wawuhatu.”

22Niho Pita amutwalile ku mbali, pe watatikile kumukalihila ngayi, “Nyambi akane ngayi ebye hinga bitendiwa kukwobe, obe Mwene.”

23Ngoboni Yeshu wafutukile, pe wambilile Pita ngayi, “Fuma kukwami obe Shatana. Uli shipukalisho kukwami. Ndaba bihanganiko byobe, kaliha nibyo bihanganiko bya Nyambi, ngoboni bya bantu.”

24 # Mat 10:38; Luka 14:27. Niho Yeshu ambile ku bandongesha bendi ngayi, “Nimwendi ukushinga kunkonka, alihupwize niye mwine, ashimbe shishempakano shendi, pe ankonke. 25#Mat 10:39; Luka 17:33; Yowa 12:25. Ndaba nimwendi ukushinga kupulwisha wumi wendi ukawuyongesha, ngoboni niye ukuyongesha wumi wendi ndaba yami ukawuwana. 26Kati muntu ukuwanaho bihi, ndi ukuheta byuma nimwabyo bya mu kaye, ngoboni ha kuyongesha wumi wendi? Hinge kati muntu ukapana bishini ngayi atambashane na wumi wendi? 27#Mat 25:31; Nyi 62:12; Lom 2:6. Ndaba ngayi Mwana Muntu ukeza na mangeloyi mu wuwahe wa Tatiyendi, niho shikati osho ukapana ncuungu ku muntu na muntu ngo ku milimo yendi. 28Mwa shikuma nikwamba kukwenu ngayi kuli bamo bali hano, baya bakabula kufwa, hantu banamono Mwana Muntu heza mu wene Wendi.”

Currently Selected:

Mateo 16: LLK

Highlight

Copy