Mateo 15

Bihemwa bya bakulwane

(Mako 7:1-13)

1Niho Bafwalishi bamo na bakakulongesha ndayano, bafumine ku Yelushalema bezile kuli Yeshu, pe bepwile ngayi, 2“Ndabangani bandongesha bobe ba kukilukanga bihemwa bya bakulwane? Ndaba ba kulya kwakubula kuyowela ku maboko mu ku fwanina!”

3Yeshu waba kumbwile ngayi, “Ndabangani nanenu mu kukilukanga ndayano za Nyambi na kwombatala bihemwa byenu? 4#Kut 20:12; 21:17; Nday 5:16; Bal 20:9. Ndaba Nyambi wambile ngayi, ‘Lemeeka tatiyobe na mandiyobe,’ kami, ‘Nimwendi wakuhandula tatiyendi hinge mandiyendi mwanga azihiwe.’ 5Ngoboni enu mukwamba ngayi ndi muntu ukwamba kuli tatiyendi, hinge kuli mandiyendi ngayi, ‘Eshe nimwasho nafwanina kumiyavwa nashipaniki Nyambi,’ 6kaliha wafwanina kuyavwa tatiyendi na mandiyendi. Nohobene ndaba ya shihemwa shenu, mwazihi ngovu za lizu lya Nyambi. 7Enu bakashishweka, muluwe Ishaya wengile shiwahe oho alubulwile byenu ngayi,

8 # Isha 29:13. ‘Aba bantu ba kundemeeka na mivumbo yabo tuhu,

ngoboni mitima yabo yili kwakutali na nami.

9Nohobene, kowa nanebye bali na kundemesha,

ndaba ba ku longesha ndayano zinatendiwi ku bantu!’ ”

Byuma biku bipisha muntu

(Mako 7:14-23)

10Yeshu wehanine likunge lya bantu kukwendi, wambile kukwabo ngayi, “Nyuvwililenu kami muyuvwishishe. 11Eshe shikwingina mu kanwa Kubipisha muntu shifwako, ngoboni eshe shikututika mu kanwa nisho shiku bipisha muntu.”

12Niho bandongesha bezile kukwendi, pe bamwipwile ngayi, “Kati hiulimuka ngayi Bafwalishi shinabakoleshe ku mutima aha banayuvwu ebye unamba ndi?”

13Yeshu wakumbwile ngayi, “Mutondo nimwawo abulile kukuna Tate wa muyilu ukazuliwa. 14#Luka 6:39. Balehenu, banengi bantwamina ba wushishitwa. Ndi kashishitwa ukutwaminina minendi kashishitwa, pe wubili wabo bakawila mu liteke.”

15Niho Pita ambile ngayi, “Tutontwelele eye nguli.”

16Yeshu wambile kukwabo ngayi, “Kati nanenu ku yuvwishisha mufwako ndi? 17Kati kulimuka mufwako ngayi shuma nimwasho shenginanga mu kanwa, shayanga mu livumo, kami shatutikanga mulutu lwendi? 18#Mat 12:34. Ngoboni ebye byatutikanga mu kanwa byafumanga ku mutima, ebye nibyo biku bipisha muntu. 19Ndaba mu mutima wa muntu, nimo mwafumanga bihanganiko byabibi na kuziha na wumambe na lwiholwiho na wizi na mahalo na lihandu. 20Ebye nibyo biku bipisha muntu, ngoboni kulya kwakubula kuyowela ku maboko, Kubipisha muntu kufwako.”

Kukulupila kwa mbuyama

(Mako 7:24-30)

21Niho Yeshu akatukile kuyo, wayile ku litunga lya Tile naku Shindone. 22Kwezile mbuyama wa mu Kenaani uya wekalile muyo, wabilikizile ngayi, “Mwene, obe Mwana Ndavita, nyuvwileko nceshe, mwanami wa mushimbi uli na kuyanda shikuma na mayimbwe.”

23Ngoboni kaliha wamukumbwile hinge lizu limo. Bandongesha bendi bahenyenene kukwendi, pe bamunyepele ngayi, “Mubokeshe, ndaba uli na kutwingila miyoyo.”

24Niho Yeshu akumbwile ngayi, “Natumiwile tuhu ku bambelele ba kuyongala baka litala lya Ishalela.”

25Niho mbuyama ezile na ku funkama ku mawulu wendi, wambile ngayi, “Mwene, nyavwe!”

26Yeshu wamukumbwile ngayi, “Kaliha shinafwanini kuyangula bana byakulya na kubiyumbila ku batuwa.” 27Niye wakumbwile ngayi, “Ingoi Mwene, ngoboni hinge batuwa balyanga ncankuncanku zinapulumukili mu nceto ya tebulu ya hekulyabo.”

28Niho Yeshu amukumbwile ngayi, “Obe mbuyama, kukulupila kwobe kwakunene. Kutendiwe kukwobe ebye ukushinga.” Pe ha shikati shiyo bene, mwanendi wa mushimbi wanyongomanine.

Yeshu ukunyongomanisha bantu babengi

29Yeshu wafumine kuyo, wakulishile ku Liziba lya Ngalileya. Niho akandamine ha lipili, pe wekalile hanci. 30Makunge amanene a bantu bezile kukwendi, baletele bakakupenga mawulu na tushishitwa na bihole na bakakubula kwamba na babengi bamina, babayakile ku mawulu a Yeshu, pe wabanyongomanishile. 31Nohobene bantu bakomokele, oho bamonene bakakubula kwamba hibamba na bihole ba kunyongomana na ba kupenga mawulu banakwenda, tushishitwa bana ku mona, pe bayemezele Nyambi wa Ishalela.

Yeshu ukulisha makulukazi anaa a bantu

(Mako 8:1-10)

32Yeshu wehanine bandongesha bendi kukwendi, wambile ngayi, “Nili na nceshe hanelye likunge lya bantu, ndaba banekala na nami matena ahatu, haya bafwabyo byakulya. Kushinga ngayi nibabweshe na nzala nifwako, ndaba ba kutwesha kulungukila mu nzila.”

33Bandongesha bendi bakumbwile ngayi, “Muno mu libelelengwa tukuwana kuti mankende akutwesha kulisha elye likunge lya bantu?”

34Yeshu wabepwile ngayi, “Muli na mankende anga?” Bakumbwile ngayi, “Mutanu na abili na tuzinci twatushe.”

35Watongwezele likunge lya bantu ngayi bekale hanci. 36Niho ashimbile mankende mutanu na abili na zinci, wakambililile kuli Nyambi, wa apabwile, pe wapanikile ku bandongesha bendi, pe bandongesha bendi batapishilile bantu. 37Nimwabo balile kami bekutile. Oho bamanishile kulya, bandongesha batolele ncankuncanku za shalileko ozo zenzalishile bibondo mutanu na bibili. 38Obo balile bengile balume makulukazi anaa, kubula kulabako bambuyama na batwanuke.

39Oho Yeshu apanzanishile likunge lya bantu, wenginine mu wato, pe wayile ku litunga lya Mangandani.

Currently Selected:

Mateo 15: LLK

Highlight

Copy