Luka 6

Liyipu lya ha Mutena Wakukatala

(Mateo 12:1-8; Mako 2:23-28)

1 # Nday 23:25. Yeshu wapitile mu mafuba a loto ha Mutena Wakukatala. Bandongesha bendi oho bendelenga nendi batatikile kupulula loto bayinyokoshelenga mu maboko hibalya. 2Bafwalishi bamo bambile ngayi, “Kati ndabangani mukutenda byuma bya kubula ku fwanina ha Mutena Wakukatala?”

3 # Bal 24:9; 1Sha 21:1-6. Yeshu waba kumbwile ngayi, “Hinga mwatanga shilolo mulabe eshe atendele Ndavita, oho niye na bantu bendi bekalile na nzala? 4Wenginine mu Litala lya Nyambi, watolele mankende ayo atupuliwile kuli Nyambi, pe walile, kami wapanineko na bantu bendi. Ngoboni kaliha zengile ndayano zetu ngayi muntu nimwendi alye ayo mankende ndele tuhu bakankombela.”

5Niho Yeshu ambile kukwabo ngayi, “Mwana Muntu niye Mwene wa Mutena Wakukatala.”

Mulume wakunyata liboko

(Mateo 12:9-14; Mako 3:1-6)

6Ha Mutena Wakukatala wamina, Yeshu wenginine mu shinangonge na ku longesha. Mwekalile mulume wakunyata liboko lya shilyo. 7Baka ku longesha ndayano na Bafwalishi bamutilaminine na kushinga kumoneshesha ndi ukumunyongomanisha ha Mutena Wakukatala, ngayi mwanga bamubangilile byambo. 8Ngoboni Yeshu walimukile bihanganiko byabo, wambile ku mulume ou wekalile na liboko lya kunyata ngayi, “Katuka wimane kumbili ya bantu nimwabo.” Mulume wakatukile, pe wemanine kuyo. 9Niho Yeshu ambile kukwabo ngayi, “Nikumipula ngayi, kati ndayano zikwitabilisha kutenda biti ha Mutena Wakukatala? Tunafwanini kutenda byabiwahe hinge ndi byabibi? Hinge ndi tunafwanini kulamwina wumi ndi kuziha?” 10Yeshu wabaconcomekele nimwabo, pe wambile ku mulume ngayi, “Olola liboko lyobe.” Wolwele liboko lyendi, pe lyapolele.

11Ngoboni nimwabo bapilamine shikuma, niho batatikile kulyambashana umo na wamina eshe banafwanini kutenda Yeshu.

Yeshu ukuhata bantumwana likumi na babili

(Mateo 10:1-4; Mako 3:13-19)

12Ha shikati shiyo Yeshu wayile ku lipili mu kulombela, pe wakonkamine wushiku nimwawo na kulombela kuli Nyambi. 13Oho kwashile, wehanine bandongesha bendi, pe wahatile balikumi na babili baya atumbile ngayi bantumwana. 14Bengile Shimoni (ou Yeshu atumbile Pita) na Anduleu mukonzo wendi, Yakoba na Yowano, Fwilipu na Mbatolomewu, 15Mateo na Tomashi, Yakoba mwana Alufweya na Shimoni Kazeloti, 16Yundashi mukonzo wa Yakoba na Yundashi Ishikalyote ou wengile mukakumubeba.

Yeshu uku longesha na kunyongomanisha

(Mateo 4:23-25)

17Yeshu oho akunkulukile kufuma ku lipili hamo na bandongesha bendi, wemanine ha mbuwa. Kuyo kwekalile likunge lya bandongesha bendi na bantu babengi baya bafumine ku Yundeya na ku Yelushalema na ku shibumbo sha hahepi na Tile na Shindoni. 18Nibo bezile mu kuyuvwa mazu wendi na kunyongomanishiwa ku malweli wabo. Na baya bayandile na mayimbwe nabo banyongomanine. 19Bantu nimwabo bashingile kumukwata, ndaba kwafumine ngovu kukwendi, pe wabanyongomanishile nimwabo.

Mfuywezi na winga

(Mateo 5:1-12)

20Yeshu wayimbwile meho wendi ku bandongesha bendi, wambile ngayi,

“Muli na mfuywezi enu bakakushepwa,

ndaba Wene wa Nyambi ukenga wenu!

21Muli na mfuywezi enu muli na nzala wuluno,

ndaba mu kekuta!

Muli na mfuywezi enu mu kulila wuluno,

ndaba mukahepa!”

22 # 1Pita 4:14. Muli na mfuywezi oho bantu bakamizimba, oho bakamikana na kumitukana na Kubipisha lizina lyenu ndaba ya Mwana Muntu. 23#2Bya 36:16; Mil 7:52. Wahililenu ha mutena uyo na kutangala ndaba ncuungu yenu yikenga yayinene muyilu. Ndaba ebye nibyo batendele batatizabo ku bamiluwe ba Nyambi.

24“Ngoboni makando wenu bakakuheta,

ndaba munatambulu kubengezeka kwenu!

25Makando wenu enu munekutu,

ndaba mukekala na nzala!

Makando wenu enu mu kuhepa wuluno,

ndaba mukalila na kuyena!

26“Makando wenu oho bantu nimwabo bakamba shiwahe hahenu, ndaba eshe nisho batendele batatizabo ku bamiluwe ba mahalo.

Kuhaka bakankole

(Mateo 5:38-48; 7:12)

27“Ngoboni nikwamba kukwenu enu mu kunyuvwa. Hakenu bakankole benu, tendenu shiwahe baya ba kumizimba. 28Tandalishenu baya ba kumitukana, kami lombelelenu baya ba kumiyandisha. 29Ndi muntu ukukukama ku ntanta imo, umutengekele ntanta yamina kami. Ndi muntu ukushimba canci yobe, mwitabilishe kushimba shikobelo shobe kami. 30Pana kukwendi nimwendi ukunyepa kukwobe, kami ndi muntu ukukuyangula shuma shobe, hinga unyepa ngayi ashibweshe. 31#Mat 7:12. Nehi ukushinga bantu ngayi ba kutendele, tenda noho kukwabo kami.

32“Ndi enu mu ku haka aba ba kumihaka, mukatambwila bihi ncuungu? Hinge bakawubi ba ku haka aba ba kubahaka. 33Ndi mukutenda shiwahe aba ba kumitenda shiwahe, mukatambwila bihi ncuungu? Hinge bakawubi ba kutenda nahiyo. 34Kami ndi ukukolotesha tuhu aba ukukulupila ngayi ukatambula kukwabo, mukatambwila bihi ncuungu? Hinge bakawubi ba kukolotesha bakawubi na kutambula kami biya banakoloteshe. 35Ngoboni hakenu bakankole benu, kami batendenu shiwahe, pe bakoloteshenu na kubula kukulupila ngayi mukatambula kami. Ncuungu yenu yikenga yayinene nanenu mukenga bana ba Wakukangana. Ndaba niye wenga wamuwahe kukwabo bakubula kukambilila na bakawubi. 36Nohobene yikalenu na nceshe nehi Tatiyenu wenga wa nceshe.

Kuyata bamina

(Mateo 7:1-5)

37“Hinga muyata baminenu, ngayi Nyambi abule kumiyata, hinga munyanca baminenu, ngayi Nyambi abule kuminyanca. Yatilenu baminenu, pe nanenu Nyambi ukamiyatila. 38Panikenu baminenu, kami Nyambi ukamipana. Mukatambwila muhoshi, shifwanikizo shashiwahe shinanyukumuniwi, shinahomiwi kami shikwitika. Ndaba shifwanikizo eshe munafwanikizi nasho baminenu, nisho Nyambi akamifwanikiza nasho.”

39 # Mat 15:14. Yeshu wabatongwezele nguli eye ngayi, “Kati kashishitwa ukutwesha kutwaminina minendi kashishitwa ndi? Nka wubili wabo bakawila mu liteke? 40#Mat 10:24-25; Yowa 13:16; 15:20. Kowa ndongesha ukutwesha kupitakana mulongeshi wendi. Ngoboni ndongesha akamanisha kulilongesha ukenga ngo mulongeshi wendi.

41“Shumangani ukutilamina kahoni kali mu liho lya kawushinda wobe, ngoboni ukubula kutosha shitondo shili mu liho lyobe? 42Hinge ukutwesha nahiti kwamba ku kawushinda wobe ngayi, ‘Mbayi, nikufumishe kahoni kali mu liho lyobe,’ oho obe mwine ku mona shitondo shili mu liho lyobe wufwako? Obe mukashishweka! Fumisha taha shitondo shili mu liho lyobe, pe ukamona shiwahe ha kufumisha kahoni kali mu liho lya kawushinda wobe.

Mutondo na mikabo yawo

(Mateo 7:16-20; 12:33-35)

43“Kowa mutondo wawuwahe ukutwesha kuyima mikabo yayibi, hinge mutondo wawubi kutwesha kuyima mikabo yayiwahe wufwako. 44#Mat 12:33. Mutondo nimwawo ukulimukiwa ku mikabo yawo. Bantu kutwesha kubuya mikabo ya mukuyu ku mukona bafwako, kami kutwesha kubuya mikabo ya shinyanca ku mungawunga bafwako. 45#Mat 12:34. Muntu wamuwahe, watutwishanga byabiwahe ku wuheti wawuwahe wa mu mutima wendi, kami muntu wamubi watutwishanga byabibi ku wuheti wawubi wa mu mutima wendi. Ndaba kanwa kambanga ebye byenzala mu mutima.”

Bakakuzika matala babili

(Mateo 7:24-27)

46“Ndaba ngani mu kuntoya ngayi, ‘Mwene, Mwene,’ ngoboni kutenda ebye nikumitongweza mufwako? 47Nikamimonesha ou afweka muntu nimwendi ukwiza kukwami mu kuyuvwa mazu wami na kuwombatala. 48Niye ukufweka ngo muntu watendele litala lyendi, wakabile mwamutali, pe wazikile mwimbi wa litala lyendi ha limanya. Oho libazi lyezile, mikukila yakukulukilile ha litala liyo, ngoboni kaliha yatweshele kulinyenkanisha, ndaba lyazikiwile shiwahe. 49Ngoboni niye ukuyuvwa mazu wami na kubula kuwombatala, ukufweka ngo muntu watendele litala lyendi ha limvu ha kubula mwimbi. Oho libazi lyakukulukilile ha litala, pe litala lyashiwukile, kami ku shiwuka kwalyo kwabipile shikuma.”

Currently Selected:

Luka 6: LLK

Highlight

Copy