Luka 24

Kushanguka kwa Yeshu

(Mateo 28:1-10; Mako 16:1-8; Yowano 20:1-10)

1Ku lumenemene shikuma ha mutena wa Shunda, bambuyama bashimbile lukumba luyo bawahishile, niho bayile ku shinzimbi. 2Bawanine limanya linandumuku ku shinzimbi, 3ngoboni oho bengininemo, kaliha bawanine mutuntu wa Mwene Yeshu. 4Oho bashili kulikomokela shikuma, bamonene balume babili bavwalile bivwalo bya kubyazima, bemanine kwakwipi nabo. 5Bambuyama batinine, pe banyongaminine hanci, bayo balume bambile kukwabo ngayi, “Ndabangani mu kushingila wamumi mukati ka bafu? 6#Mat 16:21; 17:22-23; 20:18-19; Mako 8:31; 9:31; 10:33-34; Luka 9:22; 18:31-33. Ufwamo muno, ngoboni nashanguku. Anukenu eshe ambile kukwenu oho ushili mu Ngalileya ngayi, 7‘Mwana Muntu unafwanini kupanikiwa mu maboko a bakawubi na kukolekiwa na ku shanguka ku bafu ha mutena wa wuhatu.’ ”

8Niho bambuyama banukile mazu wendi, 9pe babokele kufuma ku shinzimbi, batongwezele byuma nimwabyo ebye ku balikumi na umo na bamina nimwabo. 10Nibo Maliya waku Mangandalena na Njowana na Maliya manda Yakoba na bambuyama bamina bekalile hamo nabo bashimikile byuma ebye ku bantumwana. 11Ngoboni bantumwana kaliha bakulupilile bambuyama, ndaba mazu abo ayuvwanikile ngo byambo byowa. 12Niho Pita akatukile, wetukilile ku shinzimbi. Oho anyongamine na kwinangila mu shinzimbi, wamonene makwiza hinga abungana, pe wafumine na kukomoka eshe shatendiwile.

Mukala wa ku Emaushi

(Mako 16:12-13)

13Ha mutena bene uyo, bandongesha babili ba Yeshu bayile ku munzi wa Emaushi, wengile mukala wakulingana makilomita likumi na limo kufuma ku Yelushalema. 14Bayile hibalyambashana byuma nimwabyo biyo byatendiwile. 15Oho bambwelenga na kulyambashana, Yeshu wahenyenene kukwabo na kwenda nabo hamo. 16Ngoboni ngayi babulile kumulimuka. 17Yeshu wambile kukwabo ngayi, “Kati ngambolo ngani eze mu kuya na kwambola oku mwenda?”

Bemanine hinga bayena. 18Umo wabo wa lizina lya Kilyopashi wamwipwile ngayi, “Kati obe uli muyeni mu Yelushalema, ukubula kulimuka ebye binatendiwimo matena ano ndi?”

19Yeshu wabepwile ngayi, “Byumangani?”

Bamukumbwile ngayi, “Bya Yeshu waku Nazaleta. Wengile muluwe, mazu wendi nanebye atendele byengile bya ngovu ku meho a Nyambi na ku bantu nimwabo. 20Bakankombela ba bakulwane na babilolo betu bamupanikile ngayi ayatiwile kufwa, pe bamukolekele. 21Ngoboni etu twalumbezele ngayi niye eze akakulize Ishalela. Hinge noho, lelo hi mutena wa wuhatu kunyima ya kutendiwa kwa byuma ebye. 22Kami bambuyama bamo ba kukwetu banatukomokeshe. Baya ku shinzimbi lumenemene, 23ngoboni shilolo bawane mutuntu wendi. Pe banezi na kututongweza ngayi, banamono shimonekesho sha mangeloyi awa anabatongweze ngayi Yeshu hayoya. 24Bamo mu kazunga ketu nanibo banayi ku shinzimbi banawana ngonehe banamba bambuyama ndaba ninabo shilolo bamumone.”

25Niho Yeshu ambile kukwabo ngayi, “Enu bibulangana ba mitima ya kwihala kukulupila nimwabyo ebye bambile bamiluwe! 26Kati kaliha shinafwanini ngayi Kilishitu ayande nahiyo na kwingina mu wuwahe wendi ndi?” 27Pe Yeshu wabatontwelele byuma nimwabyo byatikitiwile ndaba yendi, kutatika kuli Moshesha kukuma na ku bamiluwe nimwabo.

28Oho bahenyenene ku munzi kuya bayilenga, niye wengile ngo ukushinga kubapitakana, 29ngoboni bamukandikile bambile ngayi, “Yikala netu, mutena walelakale, kami kuli na kushipa.” Niho ayile na kwikala nabo mu litala. 30Oho ekalile nabo kukulya, watolele linkende, wakambililile, walipabwile, pe wabapanikile. 31Niho meho abo ashinkulukile, pe bamulimukile, kami niye waziminine ku meho abo. 32Niho bambile umo kuwamina ngayi, “Kati mitima yetu kaliha yinambwatuku oho ambilenga netu mu nzila na kututontwelela obyo byatikitiwile?”

33Bakatukile ha shikati shiyo bene babokele ku Yelushalema, oku bakawanine balikumi na umo, hinga ba kunguluka hamo na bamina, 34pe bambile ngayi, “Mwa shikuma Mwene nashanguku! Nalimonekeshe kuli Shimoni.”

35Niho baya babili batongwezele obyo byatendiwile mu nzila nomo bamulimukilile Mwene oho apabwile linkende.

Yeshu ukulimonekesha ku bandongesha bendi

(Mateo 28:16-20; Mako 16:14-18; Yowano 20:19-23; Milimo 1:6-8)

36Oho baya babili bashili kwamba hanebye byatendiwile, wanguwangu Yeshu wemanine mukati kabo, pe wambile ngayi, “Ku mwena kwikale kukwenu.”

37Ngoboni bakankile na kutina, bahanganikile ngayi banamono kayebela. 38Yeshu wambile kukwabo ngayi, “Ndabangani mu kulikekula? Ndabangani muli na nkani mu mitima yenu? 39Monenu maboko wami na mawulu wami nka amibene. Nkwatenu mumone, ndaba kayebela kafwayo nyama na bifupa, ngonehe mu ku mona ngayi ami nilinabyo.”

40Oho ambile ebye, wabamoneshele maboko na mawulu wendi. 41Hinge noho babulile kukulupila ndaba ya ku wahilila na kukomoka, Yeshu wabepwile ngayi, “Muli na byakulya kuno ndi?” 42Bamupanikile mushunyi wa nyinci wakuyoha, 43niho atambwile wawulile ha meho abo.

44Yeshu wambile kukwabo ngayi, “Ebye nibyo namitongwezele oho nekalilenga nenu. Byuma nimwabyo byatikitiwa ndaba yami mu Ndayano za Moshesha na mu bamiluwe na mu Nyimbo binafwanini kutendiwa.”

45Niho Yeshu abanukishile ngayi bayuvwishishe ebye byatikitiwa. 46Wambile kukwabo ngayi, “Ebye nibyo byambiwile ngayi Kilishitu nafwanini kuyanda, pe akashanguke ku bafu ha mutena wa wuhatu, 47ngayi kutenguluka na kuyatila kwa wubi, ku shimikiwe mu lizina lyendi, ku bantu nimwabo, kutatikila mu Yelushalema. 48Enu muli bapaki ba byuma ebye. 49#Mil 1:4. Nikamitumina shikulupisho sha Tate, ngoboni tatililenu mu munzi wawunene, hantu munatambulu ngovu za kufuma muyilu.”

Yeshu ukutwaliwa kuyilu

(Mako 16:19-20; Milimo 1:9-11)

50 # Mil 1:9-11. Yeshu watwaminine bandongesha bendi kufuma mu munzi wawunene kuya ku Mbetani kuyo akatwile maboko wendi, niho abafuywezele. 51Oho ushili ku bafuywezela, walitapile nabo, niho atwaliwile muyilu. 52Nibo bamulemeshele, pe babokele ku Yelushalema hinga bawahilila shikuma. 53Bekalilenga mu Litala lya Nyambi bikati nimwabyo hibayemeza Nyambi.

Currently Selected:

Luka 24: LLK

Highlight

Copy