Luka 23

Yeshu ba kumutwala kuli Pilato

(Mateo 27:1-2, 11-14; Mako 15:1-5; Yowano 18:28-38)

1Kanzunga nimwako kakatukile katwalile Yeshu kuli Pilato, 2batatikile kumubangila ngayi, “Muntu ou tunamuwana ha shanwisha bantu betu na kukanisha bantu kutela mutelo kuli Nkeshali na kulitoya niye mwine ngayi niye Kilishitu Mwene.”

3Pilato wamwipwile ngayi, “Kati obe Mwene wa Bayunda ndi?”

Yeshu wakumbwile ngayi, “Ee, ngonehe eshe unamba.”

4Niho Pilato ambile ku bakankombela ba bakulwane na ku likunge lya bantu ngayi, “Shilolo niwane mulandu wakuyata ou muntu.”

5Ngoboni bazumananine shikuma ngayi, “Unakuleta mushunga nanebye aku longesha ku bantu nimwabo ba mu Yundeya. Watatikile mu Ngalileya haya unezi kuno.”

Yeshu ba kumutwala kuli Helonda

6Pilato oho ayuvwile noho, wabepwile ngayi, “Kati ou muntu waku Ngalileya ndi?” 7Oho alimukile ngayi Yeshu wafumine ku litunga lya Mwene Helonda, pe wamutumine kuli Helonda, ou wekalile ku Yelushalema ha shikati osho. 8Helonda oho amonene Yeshu wawahililile shikuma, ndaba nimwaka washingilenga kumumona. Kufuma ha shikati oho ayuvwile byendi, kami washingile ngayi amone Yeshu hatenda bikomokesho. 9Helonda wamwipwile mayipu amengi, ngoboni Yeshu kaliha wakumbwile shamina. 10Bakankombela ba bakulwane na bakakulongesha ndayano bamubangilile shikuma. 11Helonda na banzita bendi bamukendwile na kumukumangiza. Bamuvwalikile likwiza lya kulelema, niho bamubweshele kuli Pilato. 12Mutena uyo bene, Pilato na Helonda balyambwililile wuhoni ndaba shikati sha kunyima balizimbile.

Yeshu ukuyatiwila lufu

(Mateo 27:15-26; Mako 15:6-15; Yowano 18:39—19:16)

13Pilato niho ehanine bakankombela ba bakulwane na babilolo na bantu, 14wambile kukwabo ngayi, “Munandetele muntu ou mukwamba ngayi unashanwishi bantu. Ngoboni aha nashingishishi byendi ku meho wenu, nifwako kumuwana na mulandu mumwendi ku byambo nimwabyo ebye muli na kumubangila. 15Hinge Helonda shilolo awane mulandu mumwendi ndaba namubweshe kukwetu kowa mulandu anatende waku fwanina kumuzihila. 16Nohobene nikumuzipula tuhu na kumushobola ngayi aye.” 17Shikati nimwasho ha Shimbo sha Kupitilila wafwaninine kubashobwela umo wa batuyili.

18Ngoboni likunge nimwalyo babilikizile ngayi, “Muzihe! Tushobolwele Mbalambashi!” 19(Mbalambashi wayakiwile mu tolongo ndaba ya mulandu wa mushunga aletele mu munzi wawunene na wa mponde.)

20Nohobene Pilato washingile ku shobola Yeshu, pe wabepwile ka wubili. 21Ngoboni babilikizile ngayi, “Mukoleke! Mukoleke!”

22Pilato wambile kukwabo kawuhatu ngayi, “Ndaba ngani? Wubi ngani anatende? Nifwako kumuwana na mulandu mumwendi waku fwanina kumuzihila, nohobene nikumuzipula tuhu na kumushobola ngayi aye.”

23Ngoboni bazumananine na mazu akukangoka, babilikizile ngayi, “Akolekiwe.” Mazu wabo apitakanishile shikuma. 24Pe Pilato waketwile shambo ngayi kutendiwe eshe bakushinga. 25Washobolwele Mbalambashi ou bashingilenga, uya wayakiwile mu tolongo ndaba ya mulandu wa mushunga na wa mponde, niho abapanikile Yeshu ngayi batende ebye bashingilenga.

Yeshu ba kumukoleka ha shishempakano

(Mateo 27:32-44; Mako 15:21-32; Yowano 19:17-27)

26Oho banzita batwalilenga Yeshu, baliwanine na mulume waku Shilene, lizina lyendi Shimoni ou wafuminenga ku tuminzi, kwiza mu munzi wawunene. Bamukwatile na kumukulikisha shishempakano, pe washishimbile niho akonkelenga Yeshu munyima.

27Likunge lyalinene lya bantu bamukonkelenga. Hakati kabo hekalile bambuyama batuwilenga mbingo na kumulila. 28Yeshu wafutukile wambile kukwabo ngayi, “Enu bambuyama ba mu Yelushalema! Hinga mundila, ngoboni lililenu enu bamwine hamo na bana benu. 29Ndaba matena akwiza oho bantu bakamba ngayi, ‘Bali na mfuywezi bamiimba na Bambeleki bakubula kubeleka na mabele a kubula ku yamwisha!’ 30#Hosh 10:8; Kuh 6:16. Niho bantu bakamba ku mapili ngayi, ‘Wilenu hahetu!’ Na ku binkanda ngayi, ‘Tufwikenu!’ 31Ndaba ndi ba kutenda ebye oho mutondo wushili wakubombola, haya kukenga nahiti oho mutondo wakayuma?”

32Kwekalile bikelemi byamina bibili byatwaliwile hamo na Yeshu mu kuzihiwa. 33Oho bakumine ku mwanya wukutumbiwa ngayi, “Kangawe,” oku bamukolekele hamo na bikelemi bibili, shimo ku shilyo shamina ku shimoho. 34#Nyi 22:18. Yeshu wambile ngayi, “Tate, bayatile ndaba kulimuka bafwako eshe ba kutenda.” Niho balitapilile bivwalo byendi na kukuna nyela. 35#Nyi 22:7. Bantu bemanine na ku shembuka, ngoboni batulela bamukumangizile bambile ngayi, “Wapulwishile baminendi, alipulwishe niye mwine, ndi niye Kilishitu mukakuhatiwa wa Nyambi!”

36 # Nyi 69:21. Banzita kami bamukumangizile, bamupanikile waine ya vineka, 37pe bambile ngayi, “Ndi obe Mwene wa Bayunda, lipulwishe obe mwine!”

38Kwekalile mazu atikitiwile hayilu yendi mu Shingiliki na Shiloma na Shihebelu ngayi, “NIYE MWENE WA BAYUNDA.”

39Umo ku biyo bikelemi byakolekiwile hamo nendi wamukoshwelele ngayi, “Ndi obe Kilishitu, lipulwishe obe mwine nanetu!”

40Ngoboni wamina wamukalihilile ngayi, “Kati obe kutina Nyambi wufwako? Obe ukutambula ku shushuliwa ngonehe niye. 41Mwa shikuma etu tunafwanini ku shushuliwa ndaba tukutambula ncuungu ya milimo yetu, ngoboni ou muntu kaliha natende byabibi.” 42Niho ambile ngayi, “Yeshu, nyanuke oho ukakuma mu Wene wobe.”

43Yeshu wambile kukwendi ngayi, “Mwa shikuma nikwamba kukwobe ngayi, lelo ukwikala na nami mu Palandayishi.”

Lufu lwa Yeshu

(Mateo 27:42-56; Mako 15:33-41; Yowano 19:28-30)

44Shashingile kwinga shikati sha wulikumi na bibili kwekalile mincimpwe mu litunga nimwalyo, kukuma na ku shikati sha wulikumi na mutanu, 45#Kut 26:31-33. kami likwiza lya mu wumbo lya mu Litala lya Nyambi lyatabukile hakati. 46#Nyi 31:5. Yeshu wabilikizile na lizu lyalinene ngayi, “Tate, ni kupana moyo wami mu maboko wobe!” Oho amanishile kwamba noho wafwile.

47Oho mukulwane wa banzita amonene ebye byatendiwile, wayemezele Nyambi na kwamba ngayi, “Mwa shikuma ou muntu wengile wakwoloka!”

48Bantu nimwabo baya bezile na ku shembuka, oho bamonene ebye byatendiwile, babokele ku minzi yabo, balikamine ha tupumpo hinga baye na. 49#Luka 8:2-3. Nimwabo baya bamulimukile Yeshu na bambuyama baya bamukonkele ha kufuma ku Ngalileya, bemanine kwakutali na kutilamina byuma ebye.

Kufundiwa kwa Yeshu

(Mateo 27:57-61; Mako 15:42-47; Yowano 19:38-42)

50Kwekalile mulume watumbiwile Yoshefwa waku Alimatiya, umo wa bakankuta, wengile mulume wamuwahe, wakwoloka, 51kaliha wetabilile ku nimwabyo bahanganikile na nobyo batendele. Wengile waku Alimatiya munzi wa mu Yunda, uya watatilililenga kwiza kwa Wene wa Nyambi. 52Mulume uyo wayile kuli Pilato mu kunyepa mutuntu wa Yeshu. 53Wawupatwile ha shishempakano, wawuvungilile mu likwiza, pe wawulangikile mu shinzimbi shakabiwile mu mamanya, muyo mwabulile kufundiwa muntu. 54Wengile Mutena Wakuliwahishila, oho shilolo Mutena wa Kukatala utatike.

55Bambuyama obo bafumine na Yeshu ku Ngalileya, bakonkelenga Yoshefwa, pe bamonene shinzimbi na mutuntu wa Yeshu eshe bawulangikile. 56#Kut 20:10; Nday 5:14. Babokele mu kuwahisha wanga na mazi a lukumba akunuka shiwahe.

Ha Mutena Wakukatala, bakatalile kuya mwayila ndayano.

Currently Selected:

Luka 23: LLK

Highlight

Copy