Yowano 19

1Niho Pilato abatongwezele ngayi bashimbe Yeshu, pe bamuzipule. 2Banzita batendele munana wa mihongela, pe bamuyakile ku mutwe. Bamuvwalikile shivwalo sha wuhombo, 3bezilenga kukwendi bamba ngayi, “Wuyoye myaka yayingi obe Mwene wa Bayunda!” Pe bamukamine zimbanda.

4Pilato watutikile kami, pe wambile kukwabo ngayi, “Monenu, nikamututwishila ha munkanda kukwenu, kami mulimuke ngayi nabulu kuwana mulandu mumwendi.” 5Niho Yeshu atutikile hinga avwala munana wa mihongela na shivwalo sha wuhombo. Pilato wambile kukwabo ngayi, “Monenu! Muntu owe!”

6Oho bakankombela ba bakulwane na babilolo bamumonene babilikizile ngayi, “Mukoleke! Mukoleke!”

Pilato wambile kukwabo ngayi, “Mushimbenu enu bamwine mukamukoleke. Ndaba nabulu kuwana mulandu mumwendi.”

7Bayunda bamukumbwile ngayi, “Twekala na ndayano, kuya naneze ndayano unafwanini kufwa, ndaba walitoyele niye mwine ngayi Mwana Nyambi.”

8Nohobene oho Pilato ayuvwile awa mazu watinine shikuma. 9Wenginine kami mu lukena, wepwile Yeshu ngayi, “Kati wafuma kuti?”

Ngoboni Yeshu kaliha wamukumbwile. 10Nohobene Pilato wambile kukwendi ngayi, “Kati kwamba kukwami wufwako ndi? Kulimuka ngayi ami nili na ngovu za kukushobola hinge ngovu za kukukoleka wufwako ndi?”

11Yeshu wakumbwile ngayi, “Kutwesha kwikala na ngovu hahami wufwako ndele zipanikiwe kukwobe kuyilu nohobene ou nampaniki kukwobe uli na wubi wawunene.”

12Oho Pilato ayuvwile ebye washingile nzila ya ku shobola Yeshu. Ngoboni Bayunda babilikizile ngayi, “Ndi ukushobola ou muntu, pe kaliha uli muhoni wa Nkeshali. Ou nimwendi ukulitoya niye mwine ngayi mwene, ukulwisha Nkeshali!”

13Oho Pilato ayuvwile awa mazu, watutwishile Yeshu ha munkanda, pe wekalile ha shipona sha kuyatishila mu mwanya ukutumbiwa ngayi “Mbanza ya Mamanya.” (Mu Shihebelu ngayi, “Ngabata.”) 14Wengile mutena wakuliwahishila Shimbo sha Kupitilila, oho mutena wahenyenene ku shikati sha wulikumi na bibili, Pilato wambile ku Bayunda ngayi, “Mwene yenu uno!”

15Ngoboni babilikizile ngayi, “Muzihe! Muzihe! Mukoleke!”

Pilato wabepwile ngayi, “Kati nikoleke mwene wenu ndi?”

Bakankombela ba bakulwane bakumbwile ngayi, “Mwene tufwaye ndele tuhu Nkeshali!”

16Niho Pilato abapanikile Yeshu ngayi bakamukoleke.

Yeshu ukukolekiwa

(Mateo 27:32-44; Mako 15:21-32; Luka 23:26-43)

Niho bashimbile Yeshu. 17Yeshu watutikile, pe washimbile shishempakano shendi, bayile nendi ku mwanya watumbiwile ngayi “Mwanya wa Kangawe.” (Owe ukutumbiwa mu Shihebelu ngayi “Ngolongota.”) 18Kuyo niko bakamukolekele. Bakolekele hamo nendi bantu babili umo ku liboko lya shilyo, wamina ku liboko lya shimoho. 19Pilato watikitile mazu a shilimukisho, pe wawayakile ha shishempakano, alabiwile ngayi, “YESHU WAKU NAZALETA, MWENE WA BAYUNDA.” 20Bayunda babengi balabile awa mazu, ndaba haya bakolekele Yeshu hengile hahepi na lukena. Mazu awa atikitiwile mu Shihebelu na Shingiliki na Shilatini. 21Niho bakankombela ba bakulwane bambile kuli Pilato ngayi, “Hinga utikita ngayi, ‘Mwene wa Bayunda,’ ngoboni utikite ngayi, ‘Ou muntu wambile ngayi, Ami Mwene wa Bayunda.’ ”

22Pilato wakumbwile ngayi, “Ebye natikiti, natikiti.”

23Oho banzita bamanishile kukoleka Yeshu, bashimbile bivwalo byendi babitapile mishiinzi yinaa, mushiinzi umo ku mukanzita na mukanzita. Bashimbile kami mukanjo wendi, watungiwile ha likwiza limo kufuma kuyilu kukuma na ku nceto kaliha wekalile na mingundo. 24#Nyi 22:18. Niho balyambashanine mukati kabo ngayi, “Hinga tu wu tabula, ngoboni tukune nyela tu mone ndi ukenga wa yani.” Ebye byatendiwile ngayi byatikitiwa binge bya kupwisha ngayi,

“Ba ku li tapila bivwalo byami mukati kabo,

na ku kuna nyela ha mukanjo wami.”

Ebye nibyo batendele bakanzita.

25Hahepi na shishempakano sha Yeshu kwemanine mandiyendi na mukonzo wa mandiyendi na Maliya mukokwa Kilopashi na Maliya waku Mangandalena. 26Oho Yeshu amonene mandiyendi na ndongesha ou ahakile shikuma hinga bemana hahepi, wambile kuli mandiyendi ngayi, “Mawa, mwanobe owo.”

27Niho Yeshu ambile ku ndongesha ngayi, “Mandiyobe owo.” Kufuma ku shikati shiyo uyo ndongesha wamutwalile ku litala lyendi.

Lufu lwa Yeshu

(Mateo 27:45-56; Mako 15:33-41; Luka 23:44-49)

28 # Nyi 69:21; 22:15. Ha shikati eshe, Yeshu walimukile ngayi byuma nimwabyo binamana, ngayi byatikitiwa binge bya kupwisha, pe wambile ngayi, “Nili na linyontwa.”

29Kwekalile lulonga lwenzalile na waine ya kushasha. Bazubikile shiponci mu waine, bashihomekele ku lutende lwa hishopu, pe bamuyakile ku kanwa. 30Oho Yeshu anwine waine ya yishashu, wambile ngayi, “Kunamana!”

Niho azebwile mutwe wendi, pe wafwile.

Yeshu ukuyahiwa ku lupati

31Niho Bayunda banyepele Pilato ngayi abetabilishe kupokola mawulu a bayo bantu bakolekiwile na kufumisha mituntu ha bishempakano. Banyepele ebye ndaba wengile Mutena Wakuliwahishila, kami kaliha bashingile ngayi mituntu yikale ha bishempakano ha Mutena Wakukatala, ndaba uyo Mutena Wakukatala wengile wawunene. 32Bakanzita bayile na kupokola mawulu a muntu wakutatika na wamina wa wubili, bayo bakolekiwile na Yeshu. 33Ngoboni oho bakumine kuli Yeshu, bamonene ngayi wafwakale, pe kaliha bapokwele mawulu wendi. 34Nohobene kanzita umo wayahile mulinga ku lupati lwa Yeshu, hohobene kwafumine mukeza na mema. 35Muntu wamoneneko wunapana wupaki, kami wupaki wendi wa kupwisha. Ukulimuka ngayi ebye akwamba bya kupwisha, ngayi nanenu mukulupile. 36#Kut 12:46; Kul 9:12; Nyi 34:20. Ndaba byuma ebye byatendiwile ngayi byatikitiwa binge bya kupwisha ngayi, “Kowa shifupa shendi hinge shimo shikapokoka.” 37#Zaka 12:10; Kuh 1:7. Kami kuli byamina byatikitiwa bikwamba ngayi, “Bantu bakatilamina kuli uya bayahile.”

Kufundiwa kwa Yeshu

(Mateo 27:57-61; Mako 15:42-47; Luka 23:50-56)

38Munyima yanebye, Yoshefwa waku Alimatiya ou wengile ndongesha wa Yeshu, ngoboni wengile wakuwi ndaba ya kutina Bayunda. Wayile na kunyepa kuli Pilato ngayi akashimbe mutuntu wa Yeshu. Pilato wetabilile. Niho ayile, wakashimbile mutuntu wa Yeshu. 39#Yowa 3:1-2. Nikondema uya wezile ha kutatika kuli Yeshu wushiku, wayile hamo na Yoshefwa. Nikondema washimbile miila na aloshi wanga wa livumba lyaliwahe wakukuma ku makilo makumi ahatu. 40Niho bashimbile mutuntu wa Yeshu, bawuzengelele mu likwiza lya kulelema hamo na lukumba mazi wa livumba lyaliwahe, ngo mwayila shiheka sha Bayunda sha kufunda. 41Ha mwanya uya bakolekele Yeshu, kwekalile mfuba, muya mu mfuba mwekalile shinzimbi shashipya muya hinga mwatanga kufundiwa muntu. 42Ndaba wengile Mutena Wakuliwahishila wa Bayunda, kami ndaba shinzimbi shekalile hahepi, pe balangikilemo Yeshu.

Currently Selected:

Yowano 19: LLK

Highlight

Copy