Yowano 18
18
Kukwatiwa kwa Yeshu
(Mateo 26:47-56; Mako 14:43-50; Luka 22:47-53)
1Oho Yeshu amanishile kulombela, wayile na bandongesha bendi mu nciza ya kashinzi ka Kendiloni. Kuyo kwekalile mfuba, pe Yeshu wengininemo na bandongesha bendi. 2Yundashi ou wamubebele, walimukileko ndaba Yeshu niko ayilenga hamo na bandongesha bendi. 3Niho Yundashi alobele kanzunga ka banzita ba Baloma na bakakulama ku Litala lya Nyambi baya bafumine ku bakankombela ba bakulwane na Bafwalishi, bashimbile malambi na mimuni na bilwisho. 4Nohobene ndaba Yeshu walimukile nimwabyo ebye bikamwizilila, wayile kumbili, pe wambile kukwabo ngayi, “Kati mukushinga yani?”
5Bamukumbwile ngayi, “Yeshu waku Nazaleta.”
Yeshu wambile kukwabo ngayi, “Ami uno.”
Yundashi kami ou wamubebele wemanine hamo nabo. 6Oho ambile kukwabo ngayi, “Ami uno,” babokele mantenganyima bawile hanci. 7Niho abepwile kami ngayi, “Kati mukushinga yani?”
Pe bambile ngayi, “Yeshu waku Nazaleta.”
8Yeshu wakumbwile ngayi, “Namitongweze ngayi ami uno, haya ndi ami mukushinga, lehenu aba bantu bayenga.” 9(Ebye byatendiwile ngayi mazu wendi enge akupwisha aya ambile ngayi, “Ku baya wampanine nabulu kuyongeshaho hinge umo.”)
10Niho Shimoni Pita ou wekalile na mukwale wawuhomwene, watetele ndungo wa Mukulwane wa Bakankombela Nimwabo, pe wamuketwile litu lya ku shilyo. Lizina lya wuya mukamulimo niye Malikashi. 11#Mat 26:39; Mako 14:36; Luka 22:42. Yeshu wambile kuli Pita ngayi, “Homeka mukwale wobe mu shipushu, kati eye nkomoki anampana Tate, kaliha niku fwanina kuyinwa ndi?”
Yeshu ba kumutwala kuli Anashi
12Niho kanzunga ka banzita ba Baloma na bakulwane babo na banzita ba Bayunda, bakwatile Yeshu, pe bamumangile. 13Ha kutatika bamutwalile kuli Anashi, ndaba niye wengile muko wa Kayafwashi uya wengile Mukulwane wa Bakankombela Nimwabo mwaka uyo. 14#Yowa 11:49-50. Kayafwashi niye wabelele Bayunda ngayi shinafwanini ngayi muntu umo afwile bantu nimwabo.
Pita ukukana Yeshu
(Mateo 26:69-70; Mako 14:66-68; Luka 22:55-57)
15Shimoni Pita na ndongesha wamina bakonkele Yeshu. Uya ndongesha wamina walimukiwile kuli Mukulwane wa Bakankombela Nimwabo, nohobene wenginine na Yeshu mu shipango sha Mukankombela wa Mukulwane. 16Ngoboni Pita wemanine ha munkanda ku shipana. Niho uya ndongesha walimukiwile ku Mukulwane wa Bakankombela Nimwabo, watutikile ha munkanda niho ambile kuli mbuyama walaminenga ku shipana, pe wengizile Pita. 17Uya mbuyama walaminenga ku shipana wambile kuli Pita ngayi, “Kati nobe kami uli umo wa bandongesha ba nou muntu ndi?”
Pita wakumbwile ngayi, “Byo, kaliha nili umo wabo.”
18Pe bakamilimo na banzita ba Bayunda, bayibikile mundilo, pe bayotelenga hinga bemana, ndaba kwekalile mashika. Pita kami wemanine nabo hayota mundilo.
Mukulwane wa Bakankombela Nimwabo ukwipula Yeshu
(Mateo 26:59-66; Mako 14:55-64; Luka 22:66-71)
19Mukulwane wa Bakankombela Nimwabo wepwile Yeshu ha bya bandongesha bendi nanebye alongeshelenga. 20Yeshu wakumbwile ngayi, “Ninambanga mwaanancanana ku bakakaye nalongeshelenga mu mashinangonge na mu Litala lya Nyambi oku ba kungulukilanga Bayunda nimwabo. Kowa ebye nambile kuwi. 21Shumangani ukunyipwila? Yipula aba banyuvwile, ba kulimuka ebye nambile.”
22Oho Yeshu ambile ebye, mukakulama umo wemanine kuyo, wakamine Yeshu mbanda, pe wambile ngayi, “Ndabangani ukwamba noho ku Mukulwane wa Bakankombela Nimwabo?”
23Yeshu wamukumbwile ngayi, “Ndi ninamba byabibi, pe bitontolole. Ngoboni ndi ninamba shiwahe, shumangani unankamini?”
24Niho Anashi atumine Yeshu hinga amangiwa kuli Kayafwashi Mukulwane wa Bakankombela Nimwabo.
Pita ukukana kami Yeshu
(Mateo 26:71-75; Mako 14:69-72; Luka 22:58-62)
25Shimoni Pita wayotelenga mundilo hinga emana. Pe bamo bamwipwile ngayi, “Kati nobe kami kaliha uli umo wa bandongesha ba nou muntu ndi?”
Pita wakanine, pe wambile ngayi, “Byo, kaliha nili umo wabo.”
26Umo ha bakamilimo ba Mukulwane wa Bakankombela Nimwabo, kawushinda wa muntu uya aketwile Shimoni Pita litu, wambile ngayi, “Kati kaliha na ku mona na Yeshu mu mfuba ndi?”
27Pita kami wakanine, pe ha shikati shiyo, likombwe lya kuwile.
Yeshu ba kumutwala kuli Pilato
(Mateo 27:1-2, 11-14; Mako 15:1-5; Luka 23:1-5)
28Ku shikati sha lumenemene shikuma, bafumishile Yeshu kuli Kayafwashi, pe bamutwalile ku lukena lwa kalela wa Baloma. Bakulwane ba Bayunda, kaliha benginine mu lukena, ndaba bashingile kuliyelesha ngonehe mu shiheka shabo ngayi mwanga batweshe kulya bya Shimbo sha Kupitilila. 29Niho Pilato atutikile ha munkanda kukwabo, pe wabepwile ngayi, “Kati mulandu ngani mu kuyatishila ou muntu?”
30Bamukumbwile ngayi, “Shinga ou muntu shilolo atende mulandu, shinga kumuleta kukwobe tufwako.”
31Niho Pilato ambile kukwabo ngayi, “Mutwalenu enu bamwine mukamuyate ngo ku ndayano zenu.”
Bayunda bakumbwile ngayi, “Etu ngovu za kutwesha kuziha muntu tufwazo.” ( 32#Yowa 3:14; 12:32. Ebye byatendiwile ngayi mazu a Yeshu enge akupwisha aya ambile ku monesha lufu olwe akafwa.)
33Niho Pilato enginine kami mu lukena, wehanine Yeshu, pe wamwipwile ngayi, “Kati obe Mwene wa Bayunda ndi?”
34Yeshu wamukumbwile ngayi, “Ukwamba ebye na bihanganiko byobe ndi kuli bamina banakutongweze byami?”
35Pilato wakumbwile ngayi, “Kati ami nili Kayunda ndi? Bantu bobe obe mwine na bakankombela ba bakulwane nibo banakulete kukwami. Kati unatende bishini?”
36Yeshu wakumbwile ngayi, “Wene wami kaliha wa muno mu kaye, shinga wene wami wa muno mu kaye, shinga bakamilimo bami ba kulwa, ngayi nibule kupanikiwa ku Bayunda. Ngoboni wene wami kaliha wafuma mu kaye!”
37Niho Pilato ambile kukwendi ngayi, “Kati uli mwene ndi?”
Yeshu wakumbwile ngayi, “Obe unamba shiwahe ngayi nili mwene. Ebye nibyo nahemuwilile, kami ebye nibyo nezilile mu kaye, ngayi nipane wupaki wa kupwisha. Mukakupwisha ukuyuvwa lizu lyami.”
38Pilato wamwipwile ngayi, “Kati kupwisha bishini?”
Yeshu ukuyatiwila lufu
(Mateo 27:15-31; Mako 15:6-20; Luka 23:13-25)
Niho Pilato atutikile kami ha munkanda ku Bayunda, pe wabatongwezele ngayi, “Shilolo niwane mulandu mumwendi. 39Ngoboni mwekala na shiheka ngayi nimishobwelenga kayili umo ha Shimbo sha Kupitilila. Haya mukushinga ngayi nimishobwele Mwene wa Bayunda ndi?”
40Niho nimwabo babilikizile ngayi, “Byo, kaliha niye! Tushobwele Mbalambashi!” (Mbalambashi wengile kayili.)
Currently Selected:
Yowano 18: LLK
Highlight
Share
Copy
Want to have your highlights saved across all your devices? Sign up or sign in
Libuka Lya Kuyela © Bible Society of Zambia, 2020.
