Shitatiko 34
34
Shekemu uku kandamika kulala na Ndayina
1Mutena umo Ndayina mwana Yakobo na Leya, wayile na kuzingula bambuyama bamo Bakenaani. 2Oho Shekemu, mwana Hamole wa mulume wa Kahivi, ou wengile mwene wa litunga liyo, oho amumonene Ndayina, wamukandamikile kulala nendi, pe wamubipishile. 3Ngoboni wawanine ngayi kankanga Ndayina wa ku fwanina, pe wamuhakile, wezekele kumubengezeka. 4Shekemu niho epwile tatiyendi Hamole ngayi, “Nikushinga munyekele ou kankanga ngayi enge mukazami.”
5Yakobo wayuvwile ngayi mwanendi Ndayina unahanduliwi, ngoboni ndaba bana bendi babalume bekalile ku mabuyishilo na zingombe, kaliha watendele shuma shimo hantu oho babokele. 6Pe Hamole tata Shekemu wayile na kwamba na Yakobo, 7oho bana ba Yakobo babalume niho ha kukuma kufuma ku mabuyishilo. Oho bana ba Yakobo bayuvwile eshe shambo, bakomokele na kupilama shikuma ngayi Shekemu unatende shuma shashibi na kuhandula bantu Baishalela ha kukandamika kulala na mwana Yakobo. 8Hamole wambile kukwabo ngayi, “Mwanami Shekemu unashingi mwanobe, hekulu. Yitabila amuyeke. 9Tokonoko tuliyuvwashane mu kuliyekela, tukayeka banabenu, kami enu mukayeka banabetu. 10Niho mukazika muno mu litunga lyetu hamo nanetu, mu kutwesha kuzika nimwako oku mukushinga na kulandisha nahiya tuhu na kuheta wuheti.”
11Niho Shekemu ambile kuli tata Ndayina naku bampanzendi ngayi, “Nyintabilenu pe nikamipana nimwabyo ebye mukushinga. 12Ntoyelenu byonda mukushinga, pe mutoye na ndando na ku yika ndamisha ngo omo mu kushingila ha kankanga. Nikamipanika nimwabyo ebye mu kutoya, ndi mu kunyintabila tuhu ngayi nimuyeke.”
13Bana ba Yakobo bakumbwile Shekemu na tatiyendi Hamole mu nzila tuhu ya ku bongezeka, ndaba Shekemu wahandwile mpanzabo Ndayina. 14Bambile ngayi, “Kutwesha kwitabila mpanzetu kuyekiwa ku muntu wakubula kuya ku mukanda tufwako ndaba shiyo shinengi sha lihandu kukwetu. 15Tukutwesha kwitabila ndi enu mukenga nehi etu na kutwala balume nimwabo ku mukanda. 16Niho tuketabila kuliyekela.Tukazika mukatikenu pe tukenga bantu bamo nanenu. 17Ngoboni ndi kwitabila mazu wetu mufwako ngayi muye ku mukanda, pe tukashimba mpanzetu wa kankanga na kuya nendi.”
18Mazu wabo awahililishile Hamole na mwanendi Shekemu ku mutima, 19pe Shekemu kaliha wehalile kutenda eshe shambiwile, ndaba wahakile mwana Yakobo wa kankanga. Pe Shekemu wengile ndumbana wamuleemu mu ba lupashi lwendi nimwalwo.
20Hamole na mwanendi Shekemu bayile ku shikungulukilo ku mbalila yaku lipangati lya munzi, pe bambile ku bantu babo ba mu munzi ngayi, 21“Aba bantu bengakale bandambo betu, balehenu tuzike nabo hamo mu litunga pe bendenga nahiya. Litunga linengi lyalinene kukwabo kami. Tokonoko tuyekenga bana babo ba bambuyama kami nibo bayeke banabetu. 22Ngoboni bantu aba banetabili kwikala mukatiketu kwinga bantu bamo na netu, ndele tuhu ndi tukutwala balume nimwabo ku mukanda ngonehe nibo baya ku mukanda. 23Kati bimuna nimwabyo na byuma nimwabyo baheta kukenga byetu bifwako ndi? Nohobene tokonoko tubetabilenu, pe bazike mukatiketu.” 24Bantu nimwabo ba muyo mu munzi bakungulukile betabilile kunebye babatongwezele ba Hamole na Shekemu, pe balume nimwabo bayile ku mukanda.
25Oho kwapitile tuhu matena ahatu, balume bashili kukola bitombo bya mukanda, bana ba Yakobo babili, Shimiyoni na Levi, mpanza Ndayina, batolele mikwale yabo, benginine mu lukena, niho bazihile balume nimwabo. Oho bantu hinga babula kutatilila shuma eshe, 26kukambikaho Hamole na mwanendi Shekemu. Niho batutwishile Ndayina mu litala lya Shekemu, pe bayile. 27Ha kumanisha kuziha aba balume, bana ba Yakobo bamina bapukwile lukena nimwalwo, kubweshelamo kuhanduliwa kwa mpanzabo. 28Bashimbile matanga wabo na zingombe na bambongolo na byuma nimwabyo byamina mu lukena namu mafuba. 29Bashimbile byuma nimwabyo bya ndando na bambuyama nimwabo na batwanuke, pe bapukwile byuma nimwabyo bya mu matala.
30Yakobo wambile kuli Shimiyoni na Levi ngayi, “Munanyaka mu wukalu, haya bamwine litunga nimwabo, Bakenaani na Bapelizi na bantu nimwabo bamina bakanzimba. Nifwabo bantu babengi, ndi ba kulifungila hamo mu kundwisha, pe ba lupashi lwami nimwabo na nami tukalobeshiwa.”
31Ngoboni bakumbwile ngayi, “Kutwesha kwitabila mpanzetu ngayi atendiwe kwinga ngo mbuyama walwiholwiho tufwako.”
Currently Selected:
Shitatiko 34: LLK
Highlight
Share
Copy
Want to have your highlights saved across all your devices? Sign up or sign in
Libuka Lya Kuyela © Bible Society of Zambia, 2020.
