Shitatiko 30

1Oho Lakele amonene ngayi luhemo ufwalwo lwa kubeleka na Yakobo bana, wayuvwililile yayiyendi lihungu, pe wambile kuli Yakobo ngayi, “Mpane bana, ndelewa nikafwa.”

2Yakobo wapilaminine Lakele wambile ngayi, “Kutwesha kushimba mwanya wa Nyambi nifwako. Niye unashinki luhemo lwobe.”

3Lakele wambile ngayi, “Ndungo yami ou Mbiliha, lala nendi, ngayi atweshe kumbelekelako mwana. Mu nzila eye mwanga nikawane bana kupitila mumwendi.” 4Nohobene wamupanikile ndungo yendi Mbiliha pe Yakobo walalile nendi. 5Mbiliha wemitile, wabelekelele Yakobo mwana wa mulume. 6Niho Lakele amutumbile ngayi Ndani#30:6 Ndani: lizu likuyuvwanika ngonehe lizu lya mu Shihebelu likutontolola ngayi mukakushambisha. ndaba wambile ngayi, “Nyambi unanyimanini. Unayuvwu malombelo wami, pe unampana mwana wa mulume. 7Mbiliha ndungo ya Lakele wemitile kami, wabelekelele Yakobo mwana wa mulume wawubili.” 8Niho Lakele amutumbile ngayi Nafwitali#30:8 Nafwitali: Likuyuvanika na lizu lya mu Shihebelu ngayi mukakulwa. ndaba, “Nalu ngunga ya wunyambi na yaya, ngoboni namupitakana.”

9Oho Leya amonene ngayi luhemo lwendi lunemana, pe wapanikile ndungo yendi Zilipa kuli Yakobo kwinga mukazendi. 10Niho Zilipa abelekelele Yakobo mwana wa mulume. 11Niho Leya amutumbile ngayi Ngandi#30:11 Ngandi: Lizina elye mu Shihebelu likutontolola ngayi wakutandala., ndaba wambile ngayi, “Nili wakutandala.” 12Zilipa wabelekelele Yakobo mwana wa mulume wawubili. 13Niho Leya amutumbile ngayi Asha#30:13 Asha:Kutontolola mu Shihebelu ngayi ku wahilila., ndaba wambile ngayi, “Nili waku wahilila, pe haya bambuyama bakantumba ngayi wakutandala.”

14Ha shikati sha kuteza loto, Lubena wayile ku mafuba wakawanineko Mandileki#30:14 Mandileki: Bahanganikile ngayi wenga wanga wakushungikila mbuyama ngayi abeleke, pe kami wenga wanga wa maluwo. pe wawuletele kuli mandiyendi Leya. Lakele wambile kuli Leya ngayi, “Mpeko ku wanga wa mwanobe wa maluwo.”

15Ngoboni Leya wakumbwile ngayi, “Kati shinengi shuma shashiwahe kukwobe ha kunyangula mukokwami ndi? Haya ukushinga kami kunyangula mandileki.”

Lakele wambile ngayi, “Ndi ukumpanika mandileki, pe ukutwesha kulala na Yakobo wushiku walelo.”

16Oho Yakobo ezilenga kufuma ku mfuba mazolo, Leya wayile na kumushimbawila, pe wambile ngayi, “Uku fwanina kulala kukwami wushiku walelo ndaba na kuyumbili na mandileki ya mwanami.” Nohobene wakalalile nendi wushiku wuyobene.

17Nyambi wakumbwile lilombelo lya Leya. Niho emitile, pe wabelekelele Yakobo mwana wa mulume wa mutanu, 18ou atumbile ngayi Ishaka#30:18 Ishaka: Likuyuvwanika na lizu lya mu Shihebelu ngayi mukakuwana ncuungu., ndaba Leya wambile ngayi, “Nyambi unampana ncuungu, ndaba napaniki ndungo yami kuli mukokwami.” 19Pe Leya wemitile kami, wabelekelele Yakobo mwana wa mulume wa mutanu na umo. 20Niho amutumbile ngayi Zembuloni,#30:20 Zembuloni: Likuyuvwanika na lizu lya mu Shihebelu kutontolola ngayi tambula hinge bishemo. ndaba wambile ngayi, “Nyambi unampaniki shishemo shashiwahe. Haya mukokwami ukanyakako ndaba namubelekele bana babalume mutanu na umo.” 21Ha kukotoka wabelekele mwana wa mbuyama, ou atumbile ngayi Ndayina#30:21 Ndayina: Lizina likutontolola shuma shimo na Ndani, lizu likuyuvwanika ngonehe lya mu shihebelu likutontolola ngayi mukakushambisha. Ngoboni mu mabuka a shihebelu kaliha batontolola bya lizin lya Ndayina..

22Niho Nyambi ya Ngula anukile Lakele, wakumbwile lilombelo lyendi, pe washinkwilile luhemo lwendi. 23Wemitile, wabelekele mwana wa mulume, pe wambile ngayi, “Nyambi unamfumishi lisheni ha kumpana mwana wa mulume.” 24Niho amutumbile ngayi Yoshefwa, Nyambi ya Ngula mwanga ampane mwana wa mulume wamina.

Yakobo na Lambani bakuliyuvwashana

25Oho Yoshefwa wahemuwakale, Yakobo wambile kuli Lambani ngayi, “Ndehe niyenga kukwetu. 26Mpanike bakazami aba natendelenga kukwobe milimo na bana bami, pe nikaya. Ndaba ukulimuka milimo eye na kutendela.”

27Ngoboni Lambani wambile kukwendi ngayi, “Nyintabilishe kwamba eshe nashingishishi mu ku taha namono ngayi Nyambi ya Ngula unantandalishi ndaba yanobe. 28Ntoyele ncuungu yobe, pe nika kupanikayo.”

29Yakobo wambile ngayi, “Obe mwine ukulimuka eshe nakutendele milimo, kami naneshe matanga wobe a bimuna anavulu ndaba ami ninawalama shiwahe. 30Oho shilolo nikume kuno, wekalile na byabishe, ngoboni haya binahanya shikuma, kami Nyambi ya Ngula unakutandalishi oku nimwako ninayinga. Haya ami nikabalika shikati ngani kulishingila bya mu litala lyami?”

31Lambani wepwile ngayi, “Nikakupanika bishini?” Pe Yakobo wakumbwile ngayi, “Kushinga zincuungu zamina nifwako, nikazamina kulama matanga wobe, ndi ukwitabila ebye nikwamba. 32Lelo nikuya ku matanga wobe nimwawo na kutapulula bana ba bambelele nimwabo ba kushipa naba ba mankenca na nimwabo ba kubalanga hinge bana ba bampongo nimwabo ba mankenca nanaba ba kubalanga. Eze nizo zikenga tuhu zincuungu zami. 33Matena a kumbili ukalimuka ngayi nengile muntu wa kupwisha, oho ukeza na kutilamina ha zincuungu zami, ndi ukawana mpongo wakubula mankenca hinge wakubula mabalamabala hinge ndi mbelele wakubula ku shipa, pe ukalimuka ngayi unengi wa kuyiba.”

34Niho Lambani ambile ngayi, “Shashiwahe shitendiwe ngonehe unamba.” 35Ngoboni ha mutena uyo Lambani, wafumishile bikungwe bya bampongo na bankaziwa ba mankenca na ba mabalamabala na nimwendi wekalile na lya kutuba, kami wafumishile bambelele nimwabo ba kushipa. Wabiyakile mu maboko a bana bendi. 36Niho afumine kuli Yakobo na litanga elye, wayile mukala wa matena ahatu. Yakobo walamine matanga ashalileho a Lambani.

37Niho Yakobo ashimbile myahi ya kubombola ya mipulanga na mitondo yamina ya kuyo, pe wayubwileho makombombo ngayi myahi yikale na minkululu ya kutuba. 38Wayakile myahi eye kumbili ya mankuluba a mema oku anwininenga matanga. Wa wayakileko, ndaba bimuna balikandaminenga oho bezilenga mu kunwa mema. 39Oho bampongo balikandaminenga kumbili ya myahi bafumbatilenga na kuhema bana ba minkululu naba mankenca na ba kubalanga.

40Yakobo watapulwile bambelele ku bampongo, pe wabapenzeshele ku ba minkululu naku bimuna ba kushipa ku matanga a Lambani. Mu nzila eye walitendelele litanga lyendi na kubula kubayaka hamo na litanga lya Lambani.

41Oho bimuna ba kushuwa balikandaminenga, Yakobo wayakile myahi kumbili yabo ku mankuluba akunwina, ngayi mwanga batweshe kufumbatila mukati ka myahi. 42Ngoboni kaliha wayakilenga kumbili ya bimuna ba kupopa. Nohobene ba kupopa bengile ba Lambani na bangovu bengile ba Yakobo. 43Mu nzila eye Yakobo wengile wa kuheta shikuma. Wekalile na matanga amengi na bandungo na makamela na bambongolo.

Currently Selected:

Shitatiko 30: LLK

Highlight

Copy