Shitatiko 29

Yakobo ukukuma ku munzi wa Lambani

1Niho Yakobo anungileko kuya ha mukala wendi ku litunga lya bantu ba ku mushamuko. 2Abazumukile tuhu wakuma ku lishima lya ku mabuyishilo a bambelele na matanga ahatu a bambelele hinga alangana hanci kunkumo yalyo. Matanga anwinenga mu lishima olyo, lyekalile na limanya lyalinene hayilu yalyo. 3Shikati nimwasho oho matanga nimwawo akungulukilenga balishani ba bambelele bandumwinenga limanya hayilu ya lishima naku nwishawo. Niho babwesheleho limanya mu mwanya walyo kami.

4Yakobo wepwile balishani ngayi, “Enu bawushinda wami mu kufuma kuti?” Bamukumbwile ngayi, “Tukufuma ku Halani.”

5Wabepwile ngayi, “Mukulimuka Lambani muzukulya Nahole wa mulume ndi?” Bamukumbwile ngayi, “Ingoi, twamulimuka.”

6Wepwile ngayi, “Uli shiwahe ndi?” Bamukumbwile ngayi, “Uli shiwahe, mona mwanendi wa mbuyama Lakele uyo unakwiza na litanga lyendi.”

7Yakobo wambile ngayi, “Oho kushili mwaana kami shikati shilolo shikume sha kwingiza matanga, shumangani mu kubula kuzinwisha na kuzibwesha ku mabuyishilo?”

8Bamukumbwile ngayi, “Kutwesha kutenda noho tufwako hantu matanga nimwawo ana kunguluku hamo, kami hantu limanya linandumukuko, nihoboni tunwishe matanga.”

9Oho Yakobo ekalile na kwamba nabo, Lakele wakumine na litanga lya tatiyendi, ndaba niye wa abuyishilenga. 10Oho Yakobo amonene Lakele na litanga lya kanyantu kendi Lambani, wayile ku lishima, wandumwineko limanya, pe wanwishile bambelele. 11Niho Yakobo azupezele Lakele pe watatikile kulila ndaba ya ku wahilila. 12Yakobo watongwezele Lakele ngayi, “Ami mwana Lambeka kami nili kawushinda wa batatiyobe.” Niho Lakele etukile mu kutongweza batatiyendi.

13Oho Lambani ayuvwile lushango lwa mwipa wendi Yakobo, wetukile na kumushimbawila. Wamubumbatilile na kumuzupeza, kami wamutwalile mu litala. Yakobo watongwezele Lambani nimwabyo biya byamonekele. 14Niho Lambani ambile ngayi, “Mwa shikuma uli wami, waha mutima na mukeza wami.” Yakobo wakekalile kuyo ngonda ya nzimba.

Yakobo ukutendela milimo Lambani ngayi ayeke Lakele na Leya

15Lambani wambile kuli Yakobo ngayi, “Kaliha wafwanina kutenda nahiya milimo ndaba ngayi obe unengi kawushinda wami. Ncuungu ngani ukushinga ngayi nikuyumbile?” 16Lambani wekalile na bana ba bambuyama babili, wamukulwane watumbiwile Leya, wakanuke Lakele. 17Leya wengile wakulenkuka meho, ngoboni Lakele wengile wamuwahe shikuma.

18Yakobo washingile Lakele niho ambile ngayi, “Nikakutendela milimo myaka mutanu na yibili ndi ukwitabila ngayi niyeke Lakele.”

19Lambani wakumbwile ngayi, “Shikwinga shuma shashiwahe ngayi nimupane kukwobe kupitakana ku muntu washenge, twikale nimwetu hamo.” 20Yakobo watendele milimo myaka mutanu na yibili ngayi ayeke Lakele, kami shikati shamonekele kukwendi ngo matena amashe tuhu, ndaba niye wamuhakile.

21Niho Yakobo ambile kuli Lambani ngayi, “Shikati shinakumu, mpanike mwanobe ngayi mwanga niyeke.” 22Nohobene Lambani wapingile shimbo sha shifupawenga na kwihanako bantu nimwabo ba ku mbalila iyo. 23Ngoboni wushiku wuyo mumwanya wa Lakele, Lambani wahingishilemo Leya na kumuleta kuli Yakobo, pe balanganine wulili umo. 24Pe Lambani wapanine Zilipa ndungo wendi wa mbuyama kuli Leya kwinga ndungo wendi. 25Oho kwashile lumenemene Yakobo wawanine ngayi wengile Leya, wepwile Lambani ngayi, “Shumangani unatende nehe kukwami? Nka na kutendelanga milimo ngayi niyeke Lakele. Shumangani boni unanyongezele?”

26Lambani wakumbwile ngayi, “Kaliha shenga shiheka kuno sha ku yekiwisha kanuke ku maluwo na ku shiya mukulwane. 27Tatila hantu shunda ya shimbo sha maluwo yina mana, pe nika kupanika Lakele, ndi ukantendela milimo myaka mutanu na yibili yamina.”

28Yakobo wetabilile, pe oho shunda ya shimbo sha maluwo yamanine, Lambani wamupanikile mwanendi Lakele kami kwinga mukazendi. 29Pe Lambani wapanine ndungo yendi wa mbuyama Mbiliha kuli Lakele kwinga ndungo wendi. 30Nohobene Yakobo walanganine wulili wumo na mukazendi Lakele kami, pe wamuhakile shikuma kupitakana Leya. Pe watendelele milimo Lambani myaka mutanu na yibili yamina.

Bana ba Yakobo

31Nyambi ya Ngula oho amonene ngayi Leya kaliha uli na maluwo, pe wamupanine luhemo shawangu. Ngoboni Lakele wengile mumba. 32Leya wemitile, pe wabelekele mwana wa mulume. Niho amutumbile ngayi Lubena#29:32 Lubena: Mu Shihebelu kutontolola ngayi mona mwana. ndaba wambile ngayi, “Nyambi ya Ngula namono makando wami.” Haya mwa shikuma mukokwami ukahaka. 33Pe wemitile kami, wabelekele mwana wamina wa mulume. Niho amutumbile ngayi Shimiyoni#29:33 Shimiyoni: Kutontolola ngayi Nyambi unanyuvwu. ndaba wambile ngayi, “Nyambi ya Ngula unampaniki mwana wa mulume kami, ndaba unayuvwu ngayi kaliha nahakiwi ku maluwo.” 34Pe wemitile kami, wabelekele mwana wa mulume wamina. Niho amutumbile ngayi Levi#29:34 Levi: Kutontolola ngayi nanyakako. ndaba wambile ngayi, “Haya shikati shino nikuwana maluwo kuli mukokwami ndaba namubelekele bana bahatu.” 35Pe wemitile kami, wabelekele mwana wa mulume wamina. Niho amutumbile ngayi Yunda#29:35 Yunda: Kuyemeza. ndaba wambile ngayi, “Shikati shino nikayemeza Nyambi ya Ngula.” Niho luhemo lwendi lwemanine.

Currently Selected:

Shitatiko 29: LLK

Highlight

Copy